VA ROMA 6
6
1Nda oco, tu popia ndati? Tu kala ño-o hũ loku linga akandu okuti oco ocali ci supoke? 2Oco hacoko. Etu tua fa ale koku linga akandu, vekandu hẽ tu kalamo vali ndati lomuenyo? 3Ele, ka wa kũlĩhili okuti etu vosi tua papatisiwila vu Kristu Yesu tua papatisiwilavo vokufa kuaye? 4Oco tua kendiwila kumue laye omo tua papatisiwila vokufa kuaye, okuti, ndeci Kristu a pinduiwa kuava va fa lulamba wa Tate, haico etu tu endaenda lomuenyo wokaliye.
5Momo nda tua tokekisua kokuaye vokufa ndoku kuaye, ka kuli atatahãi, tu tokekisuavo kokuaye vepinduko ndeli liaye. 6Tua kũlĩha okuti omunu wetu wale wa valeliwila kekulusu kumue laye oku nyõla etimba liekandu, okuti ka tu lingi vali apika vekandu, 7Momo omunu wosi wa fa wa yovuisua kakandu. 8Puãi, nda tua fila kumue la Kristu tu kolela okuti tu muilavo omuenyo kumue laye. 9Momo tua kũlĩha okuti, omo Kristu a pinduiwa kuava va fa oco ka fi vali. Okufa ka ku u viala vali. 10Eci a fa wa fa olumue kekandu, puãi omuenyo a mola wo tiamisa ku Suku. 11Haico ene, limbuki okuti kekandu wa fi, puãi omuenyo vu kasi lawo vu Kristu Yesu u tiama ku Suku.
12Oco, ekandu ka li ka viale vatimba ene a fa fa ndokuti vu pokuisua lalio koloñeyi viao. 13Ndaño ovimatamata viene ko ka vi eci kekandu ndovimaleho vievĩho, puãi ene lieci ku Suku ndava va pinduiwa kokufa yu va kasi lomuenyo. Ovimatamata viene vi eci ku Suku ndovimaleho viesunga. 14Momo, omo ka vu tiamela kovihandeleko te kocali, oco ekandu ka liu viali vali.
15Puãi nye? Tu linga ño ekandu omo katuapikako vali vovihandeleko puãi tuapika vocali? Hacoko. 16Ka wa kũlĩhili he okuti, nda wa litumbiki ku-umue ha vu lingi apika va pokola, wapika muẽle vu vu pokola kokuaye, ci kale oku litumbika kekandu U loña kokufa, ci kale oku litumbika kepokolo li loña kesunga? 17Puãi, pandu pandu ku Suku, omo ene wa kaili apika vekandu, cilo haene vu pokola kovilongua ndeci wa likuminyi, lepokolo liene li tunda ocili kovitima. 18Wa yovuiwi kakandu kuenje wa lingi apika va vumba vesunga. 19Ñasi loku popia ndeci ci popia popia omanu, momo, nda hacoko, lokuleñela kuene kuetimba, ka cu lomboloki. Oco, ndeci ale wa ecaili ovimatamata viatimba ene kupika wevĩho kuenda koku vokiya ehuko kehuko, haico cilo, eci ovimatamata viatimba ene kupika wesunga, okuti vu kola ocili.
20Momo, eci wa kaili apika vekandu, ka wa tiameli kesunga. 21Puãi onima ye wa sangeli kovina viu kutisi cilo osõi? Esulilo liavio okufa. 22Puãi cilo, omo wa yovuiwi kekandu kuenje wa lingi apika va Suku, oco onima yene okukola, kuenje esulilo liakuo omuenyo ko pui. 23Momo onima yekandu okufa, puãi ocali ca eciwa la Suku oco omuenyo ko pui vu Kristu Yesu Ñala yetu.
ទើបបានជ្រើសរើសហើយ៖
VA ROMA 6: EMB63
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Umbundu Bible © United Bible Societies, 1963.
