LUKA 2
2
1Koloneke viaco Soma Augusto wa imba olukuambi hati, Olofeka viosi vi lisonehise. 2Okusonehiwa kuaco oko kuatete, kuenje kua lingiwa eci Kurénio a viala ko Suria. 3Oco vosi va enda oku ka lisonehisa, u kimbo liavo, u kimbo liavo. 4Kuenje Yosefe wa tunda ko Nasara yo vo Galilea, wa enda ko Yudea, kimbo lia Daviti, onduko yalio Beteleme, momo eye ukuepata lia Daviti. 5Wa ka lisonehisa kumue la Maria ondombua yaye, haeye wa kulilua. 6Oco, eci va kala oko, oloneke viaye vioku cita via tẽla. 7Kuenje wa cita uveli waye, omõla ulume, yu wo vungila ponanga, kuenje, omo vonjo yolongende ka va sangelemo apa va kala, oco wo langeka vocililo colongombe.
8Vofeka yaco mua kala ovangombo va lala lala vusenge oku lava olomeme viavo kuteke. 9Kuenje ungelo wa Yehova wa va tukulukila, lulamba wa Yehova wa va tuila, usumba ka va likuete. 10Ungelo wa popia lavo hati, Ko ka yokoki ño, momo tali, ndu sapuili ondaka yiwa yesanju lia lua liya komanu vosi. 11Momo etaili vimbo lia Daviti muo citilui Upopeli, eye Kristu Ñala. 12Eci cu lingili ondimbukiso ceci, Vu ka sanga oñaña ya vungiwa ponanga, ya pekela vocililo colongombe. 13Haico owiñi wolohoka viokilu wa kala kumue lungelo, kuenje va sivaya Suku, vati,
14Kilu, ulamba ku Suku.
Kilu lieve, ombembua pokati komanu Suku a sanjukila.
15Oco, eci ovangelo va tunda kokuavo ha va endi kilu, ovangombo va livangula vati, Tu endi ko Beteleme, tu ka tali eci ca pitako, ca tu sapuila Ñala. 16Oco va yayulako, kuenje va sanga Maria la Yosefe kuenda oñaña ya pekela vocililo colongombe. 17Eci va yi mola va sapula ondaka yomõla ya va sapuilua. 18Vosi va ci yeva va komoha ondaka ya va sapuilua lovangombo. 19Maria puãi wa soleka olondaka evi viosi oku vi sokolola vutima waye. 20Oco ovangombo va tiukila oku tumbangiya loku sivayaila Suku ovina viosi va yeva, haivio va mola ndeci ca va sapuilua.
21Oco, eci a tẽlisa eteke liecẽlãla, hailio eteke lioku seviwa, oco vo luka Yesu, haiyo onduko ya tukuiwa lungelo osimbu ka miniwile handi.
22Eci oloneke viavo vioku liyelisa ndovihandeleko via Mose via tẽla, oco vo tuala ko Yerusalãi. 23Momo ca sonehiwa vovihandeleko via Yehova okuti, uveli wosi ulume o situlula olucito o tukuiwa o kola ku Yehova. 24Oco va enda oku u tumbika ku Yehova kuenda oku lumba ocilumba ndeci ca tukuiwa vovihandeleko via Yehova okuti olonende vivali, pamue ivuvu vivali violopomba. 25Vo Yerusalãi mua kala ulume, onduko yaye Simeone, eye ukuesunga, haeye ukuakusumbila Suku, kuenje wa lavoka okulembelekua kua Isareli. Espiritu Sandu wa kala laye. 26Co situluilua le Espiritu Sandu okuti ka moli okufa te tete wa mola Mesiya ya Ñala. 27Yu wa songuiwa le Espiritu oku iñila vonembele. Kuenje eci olonjali via nenamo okamõla Yesu oku linga eci ca ka tukuilua lovihandeleko, 28oco Simeone, oku ka angata, wa sivaya Suku, kuenje hati,
29Kaliye, a Cime cange, ci tava oku eca ukuenje wove lombembua,
ndeci wa likuminya.
30Momo ovaso ange a mola epopelo liove,
31lina wa angiliyila kovaso olofeka viosi,
32hailio li linga ocinyi ci tuila vakualofeka,
kuenda ulamba womanu vove, va Isareli.
33Kuenje isiaye la inaye va komoha ovina vio popiwila. 34Simeone wa va sumũlũisa, kuenje wa popia la Maria inaye hati,
Tala, omõla u wa kapelua olukonyo letumbuluko lia va lua vi Isareli,
kuenje o linga ondimbukiso yi patãlãiwa,
35okuti ovisimilo viovitima via lua vi limbuluka.
Unga u tomavo olusole utima wove.
36Kua kalavo ukãi umue Ana. Eye uprofeto, omõla a Fanuele, ukuepata lia Asere. Eye wa kuka ca lua, wa kala la veyaye anyamo epanduvali tunde pokukueliwa kuaye, 37yu wa kala ocimbumba toke wa tẽla akui ecelãla kanyamo kanyamo akuãla. Ka tundile vali vonembele puãi wa fendelamo ño-o uteke lutanya loku likandangiya okulia loku likutilaila. 38Haico eya, yu wa pandula Suku, kuenje, vosi va lavoka eyovo lia Yerusalãi, wa va vanguila Yesu.
39Eci va mala ovina viosi viovihandeleko via Yehova, va tiukila ko Galilea, kimbo liavo, ko Nasara. 40Kuenje omõlaco wa kula, wa kuata ongusu, haeye we yuka olondunge, kuenda ocali ca Suku ca kala kumue laye.
41Olonjali viaye via enda enda ko Yerusalãi, kofesta yo Pascoa, unyamo kunyamo. 42Eci a tẽla ekui lianyamo kanyamo avali, oco va lamanelako ndocituwa cavo. 43Eci ofesta ya pita kuenje va kasi ale vonjila oku tiukila, umalehe Yesu wa siala konyima vo Yerusalãi. Olonjali viaye ka via ci kũlĩhile, 44puãi, omo va soka vati, O kasi vendo, oco va enda ño etulo, yu vo sanda pokati ka vangandiavo lolonjiwe viavo. 45Eci ka vo sangele va tiukila ko Yerusalãi oku u sanda. 46Kovaso yoloneke vitatu vo sanga vonembele, wa tumala pokati kalongisi oku va yevelela loku va pula pula. 47Kuenje vosi vo yeva va komoha olondunge viaye latambululo aye. 48Eci vo mola va lisalukako kuenje inaye wo pula, hati, Amõlange, nye wa tu ci lingila? Tala, ame la so tua ku sanda lohele ya lua. 49Eye wa va kumbulula, hati, Nye wa sandeli? Ka wa kũlihili okuti nda sesamela oku kala oku kuli ovina via Tate? 50Eci a popia lavo ka ca va lombolokele. 51Oco wa lokila kumue lavo, weya ko Nasara, kuenje wa pokoyola kokuavo. Inaye wa patekela olondaka evi viosi vutima waye.
52Kuenje Yesu wa amako kolondunge lo kutunga kuenda oku soliwa la Suku lomanu.
ទើបបានជ្រើសរើសហើយ៖
LUKA 2: EMB63
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Umbundu Bible © United Bible Societies, 1963.
