OVILINGA 25
25
1Festo, eci a tẽlisa oloneke vitatu vioku viala, oco wa tunda ko Kaisarea kuenje wa lamanela ko Yerusalãi. 2Ovitunda vinene kuenda akulu va va Yudea va sapula Paulu ku Festo, yu vo pinga vati, 3Tu linge ohenda. U tumila oku iya kulo ko Yerusalãi. Vovitima va sima ongombo yoku u lavekala ha vo wipaila vonjila. 4Festo wa kumbulula hati, Paulu o kasi vokayike vo Kaisarea, haiko njila ndopo. 5Oco, vamue va kuete omoko pokati kene va ende lame. Nda omunu waco o kasi leko ovo va ko patisa.
6Oloneke a kala lavo ekui ka lia supile, pamue mbi ecelãla. Kovaso yaco wa lokila ko Kaisarea. Hẽla yaco wa yala ekanga kuenje wa tumila Paulu. 7Eci Paulu eya, va Yudea va tunda ko Yersualãi vo ñuala ocingonja, vo wasa ovako a lua, ovako aco puãi ka va tẽlele oku a imbila uvangi. 8Paulu wa lombolola ohasa yaye hati, Sia sinilile ovihandeleko via va Yudea, ndaño vionembele, ndaño via Kaisare. 9Puãi Festo, omo a yongola oku livondela la va Yudea, wa pula hati, O yongola oku lamanela ko Yerusalãi okuti oko ha ku tetuluila ovina evi? 10Paulu puãi wa kumbulula hati, Nãi pekanga lia Kaisare opo ca sesamela oku netuluila. Va Yudea sia va lingile cimue ndeci ove wa kũlĩha ciwa! 11Oco, nda ndindingaĩvi okuti nda linga cimue ca sesamela okufa, ame si yuvula okufa. Puãi nda ovina evi va mindikila viesanda, lomue o tẽla oku makuila kokuavo. Ame nukula Kaisare. 12Oco Festo, eci a vangula la vakuekanga, wa kumbulula Paulu hati, Omo wa tukula Kaisare wenda ku Kaisare.
13Eci pa pita oloneke vimue oco Soma Agripa la Bernike veya ko Kaisarea oku lama Festo. 14Omo va kalako oloneke via lua oco Festo wa sapuila Soma ondaka ya Paulu, hati, Feliki wa sia kulo ulume umue omandekua. 15Eci ndaile ko Yerusalãi, ovitunda vinene lakulu va va Yudea vo pindika, kuenje va pinga okuti ndu pisa. 16Nda va kumbulula siti, Hacituwa ca va Romako oku pakula ño omunu ocali, osimbu u wa pindikiwa ka limuile lolomindiki viaye iso liso okuti o kumbulula ondaka vo pindikila. 17Oco, eci va liongolola palo, sia kaile osimbu, puãi hẽla yaco haico nda yala ekanga, kuenje nda linga siti, Va nene ulume waco. 18Eci olomindiki viaye via votoka ka vio pindikilile cimue cĩvi kovina ndo sokelele. 19Puãi vo kuatela ño olonamalala vimue viefendelo liavo, kuenda vimue viumue wa fa, Yesu. Ulume waco puãi, onduko yaye Paulu, wa popia hati, Yesu lopo o kasi lomuenyo. 20Omo ca muiya oku kũlĩhisa ovina evi oco ndo pula siti, O yongola oku enda ko Yerusalãi, okuti oko ha ku tetuluila olondaka evi? 21Puãi, eci Paulu a pinga okuti o yikiwa toke o tetuluiwa la Kaisare, oco nda handeleka okuti o yikiwa muẽle toke ndu tuma ku Kaisare. 22Agripa wa popia la Festo hati, Lamevo njongola oku liyevela omunu waco. Festo wa kumbulula hati, U yeva hẽla.
23Oco, hẽla yaco, Agripa la Bernike veya lulamba wa lua, kuenje va iñila vonjo yekanga kumue la vakesongo lalume va kemala vimbo. Festo wa tuma hati, Neni Paulu, kuenje Paulu wa neniwa. 24Oco Festo a linga hati, A Soma Agripa, lene vosi vu kasi kulo letu, vu lete omunu u. Va Yudea vosi vo pindika kokuange, ndaño ko Yerusalãi, ndaño kulo. Va vilikaiya vati, Eye ka sesamela oku kala vali lomuenyo. 25Ame puãi, eci nda sanga okuti ka lingile cimue ca sesamela okufa, oco, omo eye muẽle a tukula Kaisare, ame nda panga oku u tuma kokuaye. 26Puãi, omo si kuete ondaka yocili yoku u pindika layo ku Ñala yange Kaisare, oco ndo nena kokuene, ca piãla kokuove, a Soma Agripa. Ndo nena okuti eci tu mala oku u pula oco sanga cimue coku soneha. 27Momo kokuange ci linga ño esanda oku tuma ño omandekua osimbu ka vo tukuilile eko.
ទើបបានជ្រើសរើសហើយ៖
OVILINGA 25: EMB63
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Umbundu Bible © United Bible Societies, 1963.
