OVILINGA 24
24
1Eci pa pita oloneke vitãlo, oco ocitunda cinene, Ananiya, kuenda akulu vamue, veya longanji yimue Tertulo, yu va pindika Paulu ku Nguluvulu. 2Eci Paulu a kovongiwa, Tertulo wa fetika oku u pindika, hati.
A Kuku, a Soma Feliki, ove fu, omo kokuove tu muila ombembua ya lua, lomo vunoño yoku sokiya ofeka, okuti ovina via lua vofeka yilo vi penguluka, 3oco etu, kuosi tu kasi, tu ci panduila ño-o. 4Puãi, sanga hu kavisa, hu peya siti, Tu linge ohenda, tu yevelile okandaka ketu. 5Momo ulume u, tuo sanga okuti onjaki. O wengola ovosuanji pokati ka va Yudea vosi voluali luosi, haeye usongui wocisoko ca va Nasiri. 6Eteke limue wa seteka oku vĩhisa onembele, puãi tuo kuata, kuenje tua yonguile oku u tetuluila lovihandeleko vietu. 7Puãi Kesongo Lusia weya, wo pola povaka etu, kuenje wa pañinya olomindiki viaye oku iya kokuove. 8Oco, ove muẽle, nda u pula, o tẽla oku limbuka ovina viosi tuo pindikila.
9Va Yudea va tavavo vati, Ovina evi viosi viocili.
10Eci Nguluvulu o payuila leka oku popia oco Paulu wa kumbulula hati,
Omo ndi ci okuti ove wa linga onganji yofeka yilo anyamo alua oco njimba ondaka yange lesanju. 11Ndeci o tẽla oku kũlĩhisa, tunde nda lamanela ko Yerusalãi oku ka fendela, ekui lioloneke koloneke vivali ka via supile. 12Ka va la sanga okuti ñasi loku lipatãla lomunu pamue oku tutuminya owiñi, ndaño vonembele, ndaño volosunangonga, ndaño vimbo. 13Ndaño ovina va vi mindikila kokuove ndopo eci, ka va tẽla oku vi imbila uvangi. 14Eci navapo ceci, okuti, Ndukuanjila yimue yi tukuiwa la vamue vati, Ocisoko cesanda. Ndeci vakuanjila yaco va fendela Suku yolosekulu vietu haico ame ndu fendela. Nava kovina viosi viovihandeleko levi via sonehiwa vovaprofeto. 15Ame ñuete elavoko ku Suku hailio ovo va kuetevo, okuti kuli epinduko lia vakuesunga lava havakuesungako. 16Oco ndi lipindisaila kovina viosi okuti ñala lutima we lipua ku Suku lo komanu. 17Eci pa pita anyamo a lua ndeya oku nenela ofeka yange ombango yolosuke kuenda ovilumba. 18Eci nda kala loku eca ovilumba viaco va sanga vonembele, puãi va sanga tupu nda yelisua, kuenje ka kua kaile owiñi ndaño onjuela. 19Puãi kueya va Yudea vamue va tunda ka Asia, nda ovo va kuete ondaka lame, nda ovo veyile kulo kokuove oku mindika. 20Nda hacoko, avandeti va sapule ño evĩho va sanga kokuange cina va nalamisa kovaso onjango. 21Mbi ca kala ondaka yimuamue nda vilikiya eci nda talama pokati kavo, siti, Etaili kovaso ene ñasi loku sombisiwila epinduko lia vakualufa.
22Puãi Feliki, omo onjila yaco yo lomboloka, oco wa va amisilapo, hati, Eci Kesongo Lusia eya oco netulula ondaka yene. 23Yu wa handeleka kesongo liocita hati, Ulume u a yikiwe, puãi a laviwe lohenda. Ka va ko timbuiye vakuavo va yongola oku u kuatisa.
24Eci pa pita oloneke vimue oco Feliki weyako lukãi waye Drusila, eye u Yudea. Feliki wa tumila Paulu kuenje wo yeva ndomo a lombolola ekolelo lioku kolela Yesu Kristu. 25Kuenje eci a kala loku lombolola esunga, lesuluviko, kuenda ekanga li laika oku iya, oco Feliki wa yokoka, yu wa kumbulula hati, Kuende handi. Eci mola evelo hu tumila vali. 26Wa ci popia tupu wa lavoka okuti Paulu o wiha olombongo, oco wo tumaila olonjanja via lua ha vangola laye. 27Puãi, eci pa pita anyamo avali, oco Porkio Festo a piñala komangu ya Feliki. Feliki, omo a yongola oku sanjuisa va Yudea, wa sia Paulu vokayike.
ទើបបានជ្រើសរើសហើយ៖
OVILINGA 24: EMB63
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Umbundu Bible © United Bible Societies, 1963.
