I VA KORINDO 16
16
1Kaliye kondaka yovilumba vioku kuatisa olosandu, ene lingi ndeci nda lombolola ale kakongelo o ko Galatia. 2Eteke liatete kosimanu ene vosi, omunu omunu a siliye cimue ndomo a sumũlũha, okuti eci njiya ka va vetiya vali oku kongola. 3Eci mitila, numa ko Yerusalãi ava va kuete ukanda wene wuvangi, oku ka tuala ombanjaile yene. 4Nda ci sesamela oku endavo ngenda lavo.
5Njiya puãi kokuene eci mita vo Makedonia, momo tete mita vo Makedonia. 6Kuenje mbi ñala lene, pamue mbi ñala lene olosãi viosi viombambi, okuti ene vu ñatula kuoha ngenda. 7Si yongola oku u moli cilo poku pita ño ombamba. Ndavoka oku kala lene oloneke vimue nda Ñala wa panga. 8Puãi ñala handi ke Efeso toke ko Pendekoste, 9momo kua njulukila epito linene lioku linga upange wa lua, kuenje ava va tamalala va lua.
10Eci Timoteo a pitila u kuatisi okuti o lisanja pokati kene, momo o kasi loku linga upange wa Ñala ndeci ame. 11Oco lomue ka ko tombe. U wilisi vonjila lombembua okuti iya vali kokuange, momo ndu lavoka kumue la vamanji.
12Kondaka yukuetu Apolosi, ndo pilika cimue okuti enda la vamanji vakuavo oku u pasuli. Puãi ka ca kaile ocipango ca Suku okuti u pasuli cilo. Iya kokuene eci a mola evelo liaco.
13Lavululi. Tuameli vetavo. Kuati utõi. Kolisiko. 14Cosi vu linga ci lingi locisola.
15A vamanji, wa kũlĩhi okuti vakuanjo ya Stefana ovo olomongoloke via tete va Akaya, kuenje va litumbika ocili kupange woku kuatisa olosandu. 16Ndu vetiyi okuti omanu ndava vu sesamela oku va pokola, kuenda oku pokolavo ku vosi va talavaya vupange waco. 17Nda yolela okuiya kua Stefana la Fortunato la Akaiko momo va ndembeleka osimbu sia tẽlele oku u moli, 18momo va kavuluisa utima wange ndeci va kavoluaisa ovitima viene. Oco, sumbili omanu va tuwa ndava.
19Akongelo o ka Asia o lami. Akuila la Priska kumue lekongelo liongolokela vonjo yavo vo tumisi ocilamo co vu Ñala. 20Vamanji vosi vo lami. Lilami pokati lesipulo li kola.
21Ame ndi Paulu, ocilamo cange ndi ci soneha leka liange muele. 22Ndu lami siti, Nda omunu ka sole Ñala, a siñaliwe. Ñala yetu iya. 23Ocali ca Ñala Yesu Kristu ci kale lene. 24Ocisola cange ci kale lene vosi wu kasi vu Kristu Yesu. Amene.
ទើបបានជ្រើសរើសហើយ៖
I VA KORINDO 16: EMB63
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Umbundu Bible © United Bible Societies, 1963.