I VA KORINDO 15
15
1Kaliye, a vamanji, njongola oku vu wivaluisa ndomo ndo kundili ondaka yiwa, eyi wa tavi, kuenda wu tãi vokuayo, 2haiyo vu popelua layo nda vu kakatela muẽle kokuayo, okuti ka wa taveli olivova.
3Catete nda linga haico cinene ceci okuti, ndo kundili ondaka nda tambulavo ame. Ondaka yaco yeyi, Kristu wa fila akandu etu ndeci ca tukula ovisonehua. 4Wa kendiwa. Wa pinduiwa veteke liatatu, ndeci ca tukula ovisonehua. 5Yu wa moleha ku Kefa, noke kekui liaco la vavali. 6Kovaso yaco wa moleha onjanja yimue ku vakuetavo ovita vitãlo via supa. Omanu vaco pa kamba naito okuti vosi nda va kasi toke lilo, vamue puãi va pekela. 7Yu wa moleha ku Tiago, noke kovapostolo vosi. 8Kesulilo wa moleha kokuange, haime nda citiwila vetavo ndoluselu. 9Momo ame sule kovapostolo vosi. Sia posokelele oku tukuiwa upostolo, momo nda kangisa ekongelo lia Suku. 10Puãi, locali ca Suku, ñasi ndeci ñasi. Ocali caye kokuange ka ca ndingililile esanda. Koku talavaya nda piãla vosi. Ame hameko puãi, te ocali ca Suku ci kasi lame. 11Oco, ci kale ame, ci kale ovo, oco muẽle tua kunda kuenje haico wa koleli.
12Cilo, nda tu kunda tuti, Kristu wa pinduiwa kuava va fa, vamue pokati kene va popia ndati vati, Ka kuli epinduko liava va fa? 13Nda ka kuli epinduko liava va fa, Kristu layevo nda ka pinduiwile. 14Kuenje nda Kristu ka pinduiwile, nda okulongisa kuetu kua linga esanda, lekolelo liene laliovo nda lia linga esanda. 15Nda oco, etu tua linga olombangi via Suku viuhembi, momo tua imbila Suku uvangi wokuti wa pindula Kristu. Puãi, nda ocili ava va fa ka va pinduiwa, nda Suku ka pinduile Kristu. 16Momo nda ava va fa ka va pinduiwa, ndaño Kristu ka pinduiwile. 17Nda Kristu ka pinduiwile ekolelo liene lia linga esanda, kuenje lopo vu kasi vakandu ene. 18Oco, vana va pekela ale vu Kristu, lavovo va nyõleha. 19Nda elavoko lietu lio ku Kristu lia sulila lika vomuenyo ulo, nda pokati komanu vosi etu tete tua sesamela oku kuatelua ohenda.
20Ondaka yocili puãi yeyi, Kristu wa pinduiwa kuava va fa, haeye epako liatete kuava va pekela. 21Momo, ndeci okufa kueya mekonda liomunu, haico mekonda liomunu kueyavo epinduko liava va fa. 22Momo, ndeci vosi va fila ku Adama, haico vosi va muila omuenyo vu Kristu. 23Puãi vosi omunu omunu komangu yaye. Kristu eye epako liatete, noke vava va tiama ku Kristu eci a tukuluka. 24Noke kuiya efulilo, eci Kristu a eca usoma ku Suku, haeye Isia, pana okuti wa imula ovoviali osi lovosoma osi kuenda unene wosi. 25Momo Kristu o viala toke a kapa ovanyali vaye vosi vemẽhi liolomãi viaye. 26Unyali o sulako oku imuha Kufa. 27Momo Suku wa pokuisila viosi vemẽhi liolomãi viaye. Puãi eci ci popiwa citi, Viosi via pokuisua, ca lomboloka okuti Suku, u wa vi pokuisa ku Kristu, eye muẽle wa supapo. 28Puãi, eci Suku a pokuisa ale viosi kokuaye muẽle, oco Omõlaco layevo o pokola ku Suku, u wa pokuisile k'Omola ovina viosi, okuti koviluvo viosi Suku eye Fu.
29Nda hacoko vakuaku papatisiwila ava va fa ale, hẽ, va ci lingila nye? Nda ocili ava va fa ka va pinduiwa, vakuavo va papatisiwila nye? 30Ame hẽ, nye ñasilili ño-o lohele olowola viosi? 31A vamanji, ndaño ndu lipandeli vu Kristu Yesu Ñala yetu haimo mopia siti, Fa fa eteke keteke. 32Mopia ndeci ci popia popia omanu kuenje mula siti, Ndaño nda yaka lovinyama via tema ke Efeso, haimo nda ca ñuatisa ndati? Nda ava va fa ka va pinduiwa, tu li, tu nyui, momo hẽla tu fa. 33Ko ka kembiwi. Akamba vãvi va nyõla ovituwa viwa. 34Pasuki. Kuati olondunge viesunga. Ko ka lingi vali akandu. Momo vamue ka va kũlĩhile Suku. Ndi ci popela oku u kutisi osõi.
35Umue puãi o pula hati, Ava va fa va pinduiwa ndati? Etimba va pinduiwa lalio li kala ndati? 36Ove wa wulua. Eci o kũla ove muẽle ka ci tundi te ca fa. 37Leci o kũla, hetimbako eli liya noke, te olumema luaño, nda luotiliku, nda lumue luiñi. 38Suku puãi o lu iha etimba ndomo a panga, ombuto etimba liayo, ombuto etimba liayo. 39Olositu viosi ka via lisokele. Kuli eyi yomanu, leyi yovinyama, leyi yolonjila, leyi yolosi. 40Kulivo atimba okilu latimba oposi, puãi ulamba wokilu u likasi, lu woposi u likasi. 41Kuli ulamba wekumbi, owo wiñi, wosãi wiñi, wolombungulu wiñi, momo olumbungululu lolumbungululu ovolamba avio a litepa.
42Haico okupinduka kuava va fa. Eci ci kũlĩwa ci futa, eci ci pinduiwa ka ci futi. 43Etimba li kũlĩwa liesepu, eli li pinduiwa liulamba. Etimba li kũlĩwa ka li kuete ongusu, eli li pinduiwa li kuete olohõlo. 44Etimba li kũlĩwa etimba liositu yaño, eli li pinduiwa liespiritu. Nda kuli etimba liositu kulivo etimba liespiritu. 45Oco ca sonehiwa citi, Omunu watete Adama wa linga ukuamuenyo. Adama wa sulako wa linga Espiritu li muisa omuenyo. 46Uku'Espiritu puãi heyeko tete, te ukuamuenyo wetimba noke uku'Espiritu. 47Omunu watete wa tunda posi, ukuaposi; omunu wavali wa tunda kilu. 48Ndomo mua tuwa ukuaposi haimo mua tuwa vakuaposi. Ndomo mua tuwa ukuailu haimo mua tuwa vakuailu. 49Ndeci tua setahaisua ukuaposi haico tu setahaisua ukuailu. 50A vamanji, eci mopia ceci, ositu losonde oku piñala usoma wa Suku ka ci tava. Haico evi vi futa ka vi piñala evi ka vi futi.
51Tali, ndu sapuili elumbu. Ka tu pekela vosi, puãi vosi tu pongoluiwa 52ocisalukila, ndokupakula kuiso, pokusika kuolumbeta lua sulako. Momo olumbeta lu popia, kuenje ava va fa va pinduiwa, ka va futi vali kuenje etu tu pongoluiwa. 53Momo etimba eli li futa li wala eli ka li futi, leli U fa li wala eli ka li fi. 54Eci puãi eli li futa li wala eli ka li futi, leli li fa li wala eli ka li fi, oco ci lingiwa ocili ondaka ya sonehiwa hati,
Kufa wa taka voku yula.
55A Kufa, okuyula kuove ku kasi pi?
A Kufa, olumõla luove lu kasi pi?
56Olumõla luokufa ekandu. Ongusu yekandu ovihandeleko. 57Pandu pandu ku Suku u o tu muisa oku yula la Mitakati Yesu Kristu, Ñala yetu.
58Oco, a vamanjange wa soliwi, lingi vakuepandi, haivo va tuamela. Olonjanja viosi lingi vakuambili yupange wa Ñala, omo wa kũlĩhi okuti vu kasi vu Ñala oco upange wene ko lingi wolivova.
ទើបបានជ្រើសរើសហើយ៖
I VA KORINDO 15: EMB63
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Umbundu Bible © United Bible Societies, 1963.