Maafiù 3
3
Wo Jɔ̀ɔŋ Gùà Nyùnɔ̀ɔŋ naŋ gbòò ke mìè Dayàa
(Mài 1.1-8; Luù 3.1-18; Jɔ̀ɔŋ 1.19-28)
1E teenga lii sùà wo Jɔ̀ɔŋ Gùà Nyùnɔ̀ɔŋ naŋ wa hnè ke fòùngà e diì wòaà sùà ko Jùdià yèè wò naŋ tɔ̀ɔ̀tù gbòà ke mìè Dayàa. 2Wo Jɔ̀ɔŋ naŋ wa wòò anyùùŋ nyaŋ wààŋ, “Fèiŋ maŋ tùwo naanààiŋ màŋ jɛwɛ niŋ kìlà koɓɛ̀ Dayài, esaɓù kɛ̀ e Kànà àìjɛnɛ̀ɛŋ è gbɛ̀ɛ̀.” 3Wo Jɔ̀ɔŋ nàŋ yaà wo nyùnɔ̀ɔŋ wo wɛ̀ijìɔ Àzaayà naŋ wa wòò kiiuŋ wààŋ,
“Wo nyùùŋ bà yaà kpàaŋ sùà ke fòùngà e diì wòaà sùà wààŋ,
‘Bànèbaneìŋ ke dòmaàŋ wèè wo Kanaà,
bàneìŋ ke dòmaŋ jìlɛŋ wèè wo kaaìŋ diɛŋ!’ ”
4Wo Jɔ̀ɔŋ hewa gɔ̀àà maŋ deè bàànè maŋ dùùm ɗòsòo. Wò naŋ wa dìkìè e tɛ̀kì wɔŋ fɛ̀ì yilì e tɛɛuŋ nɛ̀, e kìlà enɛ̀jeuŋ nɛ̀ nàŋ yaà wa aŋ gɔungɔ̀ gbeegbèè nyaŋ yaà aŋ gɔ̀ì. 5Anyuùŋ zimgbe e yìwìà ko Jùlusɛ̀làm, wɔŋ fùɔ̀ŋ Jùdiàa, yèè anyùùŋ e yìwìà maŋ kpàlàùŋ kpàlàùŋ maŋ gbiŋ sùà e gbɛ̀ɛ̀ e wùìyèɛ àŋ nyaaŋ Jɔɔɗììŋ lɛ kɔɔ naŋ wa kɔ̀ ko nɛ̀ɛ̀uŋ niìŋ. 6Àŋ naŋ wa wòò maŋ keì naanààŋ nyiŋ màŋ, yèè wo Jɔ̀ɔŋ naŋ nyiŋ wa gùò e Wùìyè Jɔɔɗììŋ nɛ̀ sùà.
7Nààŋ wo Jɔ̀ɔŋ naŋ wa yɛ̀mɛ̀ anyuùŋ zimgbe e yìwìà ke gbòò aŋ Fɛlosiì nyaŋ yèè aŋ Sadusiì nyaŋ sùà àŋ yaà hìnìè ko nɛ̀ɛ̀uŋ niìŋ wèè wo nyiŋ gùà, wò naŋ nyiŋ woò wààŋ, “Nyɛ̀iŋ nààŋ kaì nyɛɛ̀ nyɛɛ̀ŋ, ɓòò naiŋ woò nààŋ nàŋ ɓɛ̀nɛ̀ŋ dùàŋ e nimilàa sìwè, e yèɛ wo Dayà yaà hinie woiŋ tùàŋ lɛ? 8Nyɛ̀nɛìŋ maŋ keì maŋ do nàŋ tɔɔ̀ kɛ̀, tɔɔɓaa nàŋ fè maŋ tùwo naanààiŋ màŋ jɛwɛ. 9Ɓɔ̀ nìŋ gongò ngèè pɛɛ kòɓɛ̀ nyɛ̀iŋ biì kɛ̀ nàŋ ɓɛ̀nɛ̀ŋ dùàŋ e nimilà sìwè, esaɓù kɛ̀ nìŋ naŋ woò nààŋ nìŋ yewe ke kpòò Eɓulɔhɛɛ̀ɛŋ sùà. Miŋ woòiŋ e tɔɔɓaaà kɛ̀ wo Dayà ɓɛ̀nɛ̀ŋ ɓèmè le dùò lɛɛ̀ wo niŋ kìlà anyuùŋ kpùuŋ aŋ nɔ̀ŋ aŋ jɔ̀à wèè wo Eɓulɔhɛɛ̀ŋ. 10E gbuu kòò è yaà naàŋ nɛ̀wɛ niŋ tɛ wèè e kɛ̀ɛ̀kɛ̀ɛ̀ maŋ kùù maŋ e hàì koɓɛ̀ maŋ kuù gùlò maŋ. Ke kùù gbiŋ ke yèɛ gò kòmàŋ maŋ kuù kòmàŋ kɛnɛ yɛ̀, kè do nàŋ nɔ̀ŋ kɛ̀ɛ nyiŋ aŋ nyiŋ gbìàŋ ko hmɔ̀iŋ. 11Sèè è nɔ̀ŋ wèè miàŋ, mìŋ yààìŋ nɔŋ gùùyà sùà e wùìyè wèè e tɔɔ̀ kɛ̀ nàŋ fè maŋ tùwo naanààiŋ màŋ jɛwɛ. Kɛɛ wo nyùùŋ bà kòò wò yaà hinie eɓìèmàŋjɛ̀wɛ̀ miàŋ, wò kuwa e gààŋ eim nìàŋ, yèè miŋ siàŋ ngèè pɛɛ tɛ̀ɛ̀ wèè ka kòà màŋ bauŋ màŋ. Kɛɛ wuŋ, wò doiŋ nàŋ gùùyè wo Jìnàŋ Nɛɛmaàŋ yèè e hmɔ̀ɔ̀ŋ. 12Wò kuwa wɔŋ sɛmɛ̀ŋ fùùnyàŋ e kpàliuŋ nɛ̀ ko sìwè wèè wo fùàŋ e kpàliuŋ nɛ̀. Wò do nàŋ gbònògbònò e kpàli kɛnɛɛ̀ wo niŋ gbìàŋ ko kɛiŋ, kpeiŋ kɛ̀ wò hàmàŋ maŋ kpàli dɛɛ màŋ wò miŋ gbìàŋ ko hmɔ̀ɔ̀ŋ, yèè e hmɔ̀ɔ̀ŋ bi fè wa nàwèè nyime.”
Wo Jɔ̀ɔŋ gùà Jisɛ̀
(Mài 1.9-11; Luù 3.21, 22)
13E teenga lii wo Jisɛ̀ naŋ yèwè wɔŋ fùɔ̀ŋ Galaliìɔ sùà, yèè wò naŋ kɔ̀ koɓɛ̀ e wùìyèɛ àŋ nyaaŋ Jɔɔɗììŋ nɛ, ko yèi wo Jɔ̀ɔŋ yaà wa lɛ̀. Wò nao wa kɔ̀ wèè wo Jɔ̀ɔŋ wouŋ gùà. 14Kɛɛ wo Jɔ̀ɔŋ naŋ wa kàmè ɗewe wèè wo kìlà wo Jisɛ̀ ke jii yèè wò nauŋ woò wààŋ, “Miàŋ nàŋ henàŋ hnè ko nɛ̀ɛ̀ŋ muìŋ wèè maim gùà, wèè kiɛ̀ŋ mùŋ naŋ hnè ko nɛ̀ɛ̀ŋ miìŋ?”
15Kɛɛ wo Jisɛ̀ naŋ wa fàsàì yèè wò naŋ wòò wo Jɔ̀ɔŋ wààŋ, “Tɔ̀ e nɔ̀ŋ yɛi nyɛ̀nɛŋ niŋ e teenga lɛɛ̀ sùà esaɓù kɛ̀, yàwi nààŋ gbiŋ kuwa eiŋ niŋ nyɛ̀nɛ̀ŋ e nɔ̀ŋ e tɔ̀ɔ̀nyaàŋ màànààŋ wo Dayà manaŋ wèè eiŋ nyɛ̀nɛ̀ŋ lɛ.” Yèè wo Jɔ̀ɔŋ naŋ nyimèè wèè wouŋ gùà.
16Nààŋ wo Jɔ̀ɔŋ naŋ wa gùò Jisɛ̀, wo Jisɛ̀ naŋ fòlò e wùìyèɛ sùà. Ko fɛɛ̀feìŋ ke nyiliɛ̀ naŋ yilè yèè wò naŋ yɛ̀mɛ̀ wo Jìnàŋ wo Kanaà Dayà yàaùŋ dèyà sùà diɛŋ mààŋ wo poopoò. 17Kpeiŋ wo Dayà naŋ gbòò e yìwìà ko àìjɛnɛ̀ŋ wò naŋ woò wààŋ, “Muàŋ nàŋ yaà wo Jɔ̀àfelaa miɔ̀ŋ, wo yèɔ mìŋ manaŋ wɔ̀. Ke jii naim fɔ̀ weèum.”
ទើបបានជ្រើសរើសហើយ៖
Maafiù 3: WFESD
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Gola New Testament Translation and Literacy Project © Bible Society in Liberia, 2019.