Maafiù 2
2
Anyuùŋ kɛ̀ɛ̀jii nyàŋ e yìwìà ko fùlìè gɔɛɛ̀
1Àŋ naŋ wa kùmìè wo Jisɛ̀ ko jawaì àŋ nyaaŋ ko Bɛfilehɛɛ̀ŋ wɔŋ fùɔ̀ŋ Jùdiàa sùà, e teengaà wo Hɛɛlɔ̀ yaà wa wo kana lɛ̀. E tèèngà guùŋ bi sùà, anyuùŋ kɛ̀ɛ̀jii bà aŋ yè nyaŋ naŋ wa nyìmè yèè àŋ kiɛ̀ŋ e fàsai e nyaàiŋ dè e ɗewe kiiɛ̀ maŋ ɗu màŋ jaà ke nyiliɛ̀ lɛ naŋ hnè. Anyùùŋ bi naŋ wa e yìwìà e tèèngà ko fùlìè gɔɛɛ̀ yèè àŋ naŋ yɛ̀mɛ̀ e jɛ̀ì kìì maŋ ɗu màŋ ke nyiliɛ̀ yèè àŋ naŋ hnè ko Jùlusɛ̀làm, 2yèè àŋ naŋ dawè nyààŋ, “Kàmààŋ kòò àŋ naŋ kùmìè wo jɔ̀àa wo yèɔ do nàŋ nɔ̀ŋ wo kànà aŋ Juùù nyaŋ wɔ̀? È naiŋ yɛ̀mɛ̀ wɔŋ ɗuuŋ nɔɔ̀ŋ ko fùlìè gɔɛɛ̀ yèè è naiŋ hnè wèè euŋ kìɛ̀ŋ ɓɛ̀ɛ̀jàa.”
3E teengaà wo Kanaà Hɛɛlɔ̀ naŋ wa tɛɛ̀ kòmò lɛ, ke jiiuŋ nɛɛ̀ŋ naŋ wa mɔɔnɛ̀ŋ e hààwè anyùùŋ nyaŋ gbiŋ ko Jùlusɛ̀làm e nyaàiŋ dè ebò bi. 4Wò naŋ nyààŋ aŋ kànà sìèfeìŋ zòòlo nyàŋ yaà aŋ kààmɔ̀ɔ̀ŋ maŋ Sàwà Dayà nyaŋ yèè wò naŋ nyiŋ dawè wààŋ, “Kòò àŋ do naŋ kùmìè wo Kulaìɔ?”
5Aŋ nàuŋ fasai nyààŋ, “Àŋ douŋ nàŋ kùmìè ko jawaì àŋ nyaaŋ ko Bɛfilehɛɛ̀ŋ lɛ, wɔŋ fùɔ̀ŋ Jùdiàa sùà, e fèfoo tɛɛ̀ wo kèèlà Dayàa naŋ wa sìngè wààŋ,
6‘Nyɛ̀iŋ nààŋ nyùùŋ nyaŋ ko Bɛfilehɛɛ̀ŋ e dìì wɔŋ fùɔ̀ŋ Juɗàa diɛŋ,
nyìmaìŋ kɛ̀ wo Dayà gò nììngè è jawaiŋ nɛ̀ fɛ̀ɛ̀ màŋ jawa gbeegbèè maŋ è fèemàŋ wɔ̀ŋ fùɔ̀ŋ Juɗàa sùà.
Esaɓù kɛ̀, e yìwìà nyɛ̀iŋ ko sùà wo ɓɛ̀màŋɗì doo nàŋ fòlò
wèè wo yɛ̀mɛ̀ anyunùim nyàŋ diɛŋ ko Ezɔ̀ɛ̀.’ ”
7Kpeiŋ wo Hɛɛlɔ̀ naŋ nyààŋ anyuùŋ kɛ̀ɛ̀jii nyàŋ yaà wa kààmè wo jɔaa kòmaŋ jɛiɔ̀ wɔ, ke gbùnuo sùà yèè wò naŋ nyiŋ dawè sèè mààŋ kiìŋ è teenga titi àŋ naŋ yɛ̀mɛ̀ wɔŋ ɗuɔ̀ ko fùùiŋ. 8Kpeiŋ wò naŋ nyiŋ tùɔ̀ŋ ko Bɛfilehɛɛ̀ŋ yèè wò naŋ nyìŋ woò wààŋ, “Kɔ̀àaìŋ ko Bɛfilehɛɛ̀ŋ niŋ tùàŋ wo jɔ̀à wɛɛ̀ maŋ nɔnɔŋ tɛ̀ɛ̀ kaiŋ. Yèè sèè nìŋ yɛmɛ̀uŋ nɔŋ fa, kɛ̀ɛiŋ maŋjɛ̀wɛ niŋ gbaìyìim jii, wèè miàŋ pɛɛ miŋ ka miŋ kiɛ̀uŋ e ɓɛ̀ɛ̀jàa.”
9-10Nààŋ àŋ naŋ wa kùmìè e yèɛ wo kanaà Hɛɛlɔ̀ naŋ nyiŋ woò lɛ, àŋ naŋ kɔ̀. Yèè nààŋ àŋ yaà wa kɔɔyɛ, àŋ naŋ ɓɛìŋ yɛ̀mɛ̀ wɔŋ ɗù guùŋ nɔ̀ɔŋ àŋ naŋ wa yɛ̀mɛ̀ ko fùlìè gɔɛɛ̀ wɔŋ. Nààŋ àŋ naŋ wa yɛ̀mɛ̀ wɔŋ ɗuɔ̀, e zɔlɔ̀ naŋ nyiŋ wa dìè maŋ jii sùà. Yèè wɔŋ ɗuɔ̀ naŋ nyiŋ nɔ̀ŋ ko feìŋ e jèèsùà aŋ hàì koɓɛ̀i wo jɔaà hawa wa lɛ̀. 11Àŋ naŋ jɔ̀ ko saaìŋ koɓɛ̀i wo jɔ̀àa yaà wa lɛ̀, auŋ yɛmɛ̀ wò hawa wo yèyeuŋ nɔɔ̀ŋ wo Mèèle kùàŋ sùà, kpeiŋ àŋ naŋ dè maŋ gɛ̀ɛ̀nìŋ nyiŋ màŋ dìì yèè àŋ naŋ kìɛ̀ŋ wo jɔ̀àa e ɓɛ̀ɛ̀jàa. Aŋ naŋ wa hìɛ̀ŋ manɛ̀ŋ kìɛŋ mààŋ e goò, wɔŋ kùùkɔ̀ɔ̀ dò siaàŋ àŋ nyaaŋ nyààŋ filɛnkinsɛ̀ŋ, yèè e bù kpààì kana e yèɛ àŋ nyaaŋ nyààŋ mɛɛ̀ yèè àŋ nauŋ miŋ kiɛ̀ŋ e yìwìà maŋ sulo nyiŋ màŋ sùà.
12Yèè wo màìkà Dayàa naŋ kìɛ̀ŋ anyuùŋ kɛ̀ɛ̀jii nyàŋ e go e gɔagòo sùà kɛ̀ ɓɔ̀ àŋ kɛɛ̀ ɓɛìŋ kòɓɛ̀ Hɛɛlɔ̀i, yèè àŋ naŋ wa ɓèmè ke dòmaŋ joo àŋ naŋ kɔ̀ fuɔŋ nyiŋ.
Wo Jòòsɛ naŋ kɔ̀ɔ̀ wo Meelè yàà wo Jisɛ̀ ko Ijè maŋ dùaŋ dùaŋ
13E teengaà anyuùŋ kɛ̀ɛ̀jii nyàŋ naŋ wa kɛ̀ɛ̀ maŋjɛ̀wɛ lɛ̀, wo màìkà wo Kanaà Dayà naŋ fòlò wo Jòòsɛ feìŋ e gɔagòo sùà yèè wò nauŋ woò wààŋ, “Wo Hɛɛlɔ̀ do nàŋ nɔ̀ɔ̀ŋ kààmè wo jɔ̀àa wèè wouŋ jìwà. Weètii yewà dìì muŋ ɓemè wo jɔ̀àa yaà wo yèyeuŋ nɔɔ̀ŋ niŋ ka wɔŋ fùɔ̀ŋ Ijèɔ sùà maŋ dùaŋ dùaŋ. Yèè jèeiŋ noo e jèèsùà kaiŋ woò kɛ̀ kiìŋ nìŋ do nàŋ nyɛ̀nɛ̀ŋ.”
14Wo Jòòsɛ naŋ yèwè dìì yèè wò naŋ ɓèmè wo jɔ̀àa yaà wo yèyeuŋ nɔɔ̀ŋ wɔŋ dùùm wiiŋ yèè àŋ naŋ kɔ̀ ko Ijè. 15Kuŋ wò naŋ wa jeè e jèèsùà wo Hɛɛlɔ̀ fà. Tɛɛ̀ naŋ wa kaaìŋ wèè e nyɛ̀nɛ̀ŋ e yèɛ wo Kanaà naŋ wa wòò wo wɛ̀ijìuŋ lɛ e hɛɛnɛ̀ŋ, nààŋ wò naŋ wa woò wààŋ, “Mìŋ naŋ nyààŋ wo Jɔ̀àfelaa miɔ̀ŋ e yìwìà ko Ijè.”
Aŋ jɔ̀àkàiŋ jɔa nyàŋ àŋ naŋ wa jìwè nyaŋ
16Nààŋ wo Hɛɛlɔ̀ naŋ wa nyìmè kɛ̀ anyuùŋ kɛ̀ɛ̀jii nyàŋ àuŋ zuwò, wò naŋ wa tuù. Yèè wò naŋ kìɛ̀ŋ e gààŋ koɓɛ̀ aŋ kààlòòɗùàuŋ nyàŋ wèè aŋ jìwà aŋ felaajɔa nyàŋ gbiŋ e fèèmàŋ maŋ dòà tìyèe e dèyà koɓɛ̀ aŋ kòmaŋ jɛ̀ì nyaŋ ko Bɛfilehɛɛ̀ŋ yèè maŋ kpàlàùŋ kpàlàùŋ maŋ gbiŋ sùà ko Bɛfilehɛɛ̀ŋ. Tɛɛ̀ zà naŋ wa kaaìŋ esàɓù e nɛ̀ɛŋ aŋ nyuùŋ kɛ̀ɛ̀jii nyàŋ naŋ wa wòò wo Hɛɛlɔ̀ lɛ e nyaàiŋ dè e teengaà àŋ naŋ wa yɛ̀mɛ̀ wɔŋ ɗuɔ̀ ko fùlìè gɔɛɛ lɛ.
17Yèè e yèɛ wo Dayà naŋ wa woò lɛ naŋ hɛɛnɛ̀ŋ, nààŋ wò naŋ wa gbùùyè wo wɛ̀ijìɔ Jɛ̀lèmaayà sùà. Wò naŋ wa woò wààŋ,
18“Anyùùŋ nyaŋ naŋ kòmò ke mìè nyùùŋ ko jawaì àŋ nyaaŋ Làmauŋ lɛ,
ke mìè gòla keekèè.
Wo Lechɔ̀ yaà gulie wèè aŋ jɔ̀àuŋ nyàŋ,
yèè wò naŋ gè maŋhɛɛ wèè auŋ pɔwɔ̀ maŋ mìè gbòà jii nyingè sùà,
esaɓù kɛ̀ aŋ jɔ̀àuŋ nyàŋ gbiŋ àŋ fà.”
Wo Jòòsɛ kɛ̀lɛ̀ɛ̀ wo Mèèle yaà wo jɔaà Jisɛ̀ maŋjɛ̀wɛ e yìwìà ko Ijè
19Nààŋ wo Hɛɛlɔ̀ naŋ wa naàŋ fɔ̀, wo màìkà wo Kanaà Dayà naŋ fòlò wo Jòòsɛ feìŋ e gɔagòo sùà ko Ijè, 20yèè wò nauŋ woò wààŋ, “Yewà dìì, muŋ ɓemè wo jɔ̀àa yaà wo yèyeuŋ nɔɔ̀ŋ muŋ kɛlɛ̀ɛ̀ nyiŋ maŋjɛ̀wɛ wɔŋ fùɔ̀ŋ Ezɔ̀ɛ̀ɔ sùà. Esaɓù kɛ̀, anyùùŋ nyaŋ manaŋ wa aŋ pɔ̀ɔ̀ wɔŋ nyììŋ jɔ̀àa nyàŋ àŋ fà.” 21Kpeiŋ wo Jòòsɛ naŋ yèwè dìì yèè wò naŋ ɓèmè wo jɔ̀àa yaà wo yèyeuŋ nɔɔ̀ŋ, yèè àŋ naŋ kɛ̀ɛ̀ maŋjɛ̀wɛ wɔŋ fùɔ̀ŋ Ezɔ̀ɛ̀ɔ.
22Kɛɛ nààŋ wo Jòòsɛ naŋ wa kòmò kɛ̀ wo Àkiiliɔ̀ dè ebɛ̀ŋ wo dèdauŋ nɔɔ̀ŋ Hɛɛlɔ̀, wèè wo nɔ̀ŋ wo kànà fuɔɔ̀ŋ wèè wɔŋ fùɔ̀ŋ Jùdiàa, e jùùɛ naŋ wa nyɛ̀nɛ̀ŋ wo Jòòsɛ wèè woo ka. Kpeiŋ e gɔagòo sùà, wo Dayà nauŋ woò wààŋ wo ka wɔŋ fùɔ̀ŋ Galaliìɔ sùà. 23Yèè wo Jòòsɛ naŋ kɔ̀ɔ̀ ke kpoouŋ nɛɛ̀ŋ yèè àŋ naŋ jɛ̀ì ko jawaì àŋ nyaaŋ ko Naazɔ̀ɛ̀ lɛ. Tɛɛ̀ naŋ wa kaaìŋ wèè kɛ̀ e nyɛ̀nɛ̀ŋ e nɛ̀ɛŋ wo wɛ̀ijìɔ naŋ wa woò lɛ e hɛɛnɛ̀ŋ kɛ̀, “Àŋ douŋ nàŋ nyààŋ wo jɔ̀à kùmìàŋ ko Naazɔ̀ɛ̀.”
ទើបបានជ្រើសរើសហើយ៖
Maafiù 2: WFESD
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Gola New Testament Translation and Literacy Project © Bible Society in Liberia, 2019.