Efeesso 6
6
Waansihi nyaakhut ichoow ꞌdooꞌdi nyaakhut dele miinsan
1Nyaakhut, jeenteti Kamur u, taba wihi ꞌdooꞌdi atin dele atin idowo raaha. A mehe iꞌdaas a iꞌdi mujjume. 2Amuri Waakh mehe yadeeh ya, “Aabbahaah ichoow abartaah inkaanyit.” Amuraas a ki oraate Waakh wohoo kaayyiche. 3Wihi us ayyiche la a mehe ya, “ꞌDee wihi tuummane atin isoobaho a wihi haaggane, toro harrata ka warwaara.”#6:3 Deewutoronomi 5:16. 4Ooyenye taba, atin laka nyaakhutiin akaahholloonna, nyaakhutiin saggi Kamur iꞌdoono isooweynaacha, waanicha fatali incheenka kootte icho jiraan abcha.
Waansihi bowꞌdayyo ichoow kamurreticho miinsan
5Bowꞌdayyo, taba kamurretiinti harrata walah tuumman ka yeedicho raaha. Inkaanyit ka ichoow roorro ka wihi icho ꞌdoonaan tuumman yeela, uuri haaggan ka la yeela. Saggi atin Kiriisto ikihissaan on icho laka ihila. 6Yeedicho raaha. Waha la geeddi icho atin argaane atin icho kahamaadissaan kalday on mee, iꞌdaasenyi taba iꞌdi bowꞌdayyo Kiriistuu yeedicho raaha, wihi Waakh ꞌdoono tuum uurassiin ka yeela. 7Hili atin haaggissaan la, hamaad ka haaggicha, saggoo atin weeli enenyet ihissaan menye, saggoo atin Kamur ikahissaan iyeela. 8A mehe wihi atin garattaan, eti bowꞌdee ommos ki bowꞌda ieheynan eheetteey ka ba, Kamur enenyet tuumman wihi haaggane us yeelo ka kalaꞌd a guta.
9Toro la Kamurre taba atin laka saggaas on u bowꞌdayyohiin haag on iyeela. Iitiftoonna, a mehe saggi atin igarattaan u atin tuumman Kamuroo kaldaye goobi Waakh ka khabtaane, ulla gar badah ma gatti.
Waakh gaaddi Seytaan lakadiho tuumman a atin siiche
10Ayti ꞌdaꞌddaboot talla. Atin ichoow Kamur a wohoo kalday gone, taba miigtiisti weyti buure ka miigowa. 11Gaaddi diho Waakh atin siiche tuumman gessada, ꞌdee ekkeysihi Seytaan ka mujjum tolola. 12Iꞌdi tahe dihoti inno kajirro, ti weeli enenyet isladiho mee. Inno karnatohi ginnayyohi anto leh ichoow wahanyeyyohi harratane sussuuje iche isdihna, toro la ginnayyohi meessi saraat dakhti iche isdihna. 13Maantaka gaaddi diho Waakh atin siiche tuumman gessada, ꞌdee maanti suujoon atin isoobaho ka jeyin tudduba. Toro la inkoo atin wahanyeyyoha yeesseen mujjum jeyin a tabuuꞌdiin. 14ꞌDeerka mujjum tolossada. Runti Waakh iꞌdi saab u dabar kahiida, wihi fissane atin kol dakkhan yeessaan la iꞌdi gaaddi kach atin jeyissuu gessada. 15Toro la mujjum tolossada, Wori Haaggane nebey lakeelo a iꞌdi kobohi atin gessatteene, diho itannabatteen. 16Wihi addan la, kakhuufnaanki atin Waakh kakhuuftaan gaacchaankiin kayeelda. Gaacchaanka lahawti ꞌdab khabto Seytaanki uskeel leh atin kasoogangano atin kajeycha. 17Ribnaanki Waakh atin ribe la iꞌdi koofiyati gaꞌdaare matah walah atin kajeyissuu ichoow Yeedi Waakhe iꞌdi birlabi Rubeyti Munyee u khaata. 18Taba kol tuumman saggi Rubeyti Munyee atin iwoytuu weysi ichoow daahti fil tuummane ka Waakh wahda. Iꞌda yeessaani toorribda, toro kol dakkhan garrahsada ꞌdooꞌdi Waakh tuumman Waakh iwaha.
19Ani laka Waakh isoowaha, ꞌdee chaꞌan yeyyeedo, Waakh wihi an adeeh a isiicho, ꞌdee roorro laan enenyet wihi dagsane Wori Haaggan miinsan a icheeko. 20Jeenteti Wora Haaggan u, anihi meel Kiriisto kijiro jeela kijira. Waakh wahda, ꞌdee wora roorro laan saggi imale a icheeko.
Bariitoti ꞌdaꞌddaboote Baawulo erge
21Tuuchikohi koo Kiriisteenye an weyti ꞌdoono, toro hili Kamur ka falfeenye lakakhuufo, woreey tuumman a atin isoocheeka, ꞌdee saggi an ijiro ichoow wihi an yeelo abattaan. 22Jeentetaase usu atin ikasooerga, ꞌdee saggi nah ijirro abattaane toro la uur atin miigoocha.
23Waakkhi Aabbaheene ichoow Yeesso Kiriistohi Kamure ba ꞌdooꞌdi Kiriisto rummeeste nebey kakaalaan. Toro icho ba ꞌdooninti atin isꞌdoontaan ichoow kakhuufnaanki atin Waakh kakhuuftaan atin siichaan. 24Waakh ba ꞌdooꞌdi tuummane Yeesso Kiriistohi Kamureene ꞌdooninti imassan ka ꞌdoono imaala.
ទើបបានជ្រើសរើសហើយ៖
Efeesso 6: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.