Efeesso 5
5
Jiroti banayhi Waakh dakhtaan
1Atin a nyaakhuti Waakhe us weyti ꞌdoono gone, taba giꞌde, fataliis jira. 2Wihi atin haaggissaan tuumman ka, ꞌdooninti atin enenyet ꞌdoontaan a laargo, saggi Kiriisto inno iꞌdoone ichoowka us iroonoteen u jirotiis isoobahchuu. Ulla sadakha ichoow soorriyoti uyuugenye Waakh liibahche yitah.
3Atin a ꞌdooꞌdi Waakhe munyee gone, uus goytiin ka wahanyeyyohi iꞌdee jirin, ꞌdooꞌdi isidisanne isleeurꞌdo ommos biꞌdiri nool ommos suujoonki uurassiin goya kasoobaho ommos ꞌdamaam. 4Toro la ma haaggan chirri atin wihi lakhaanyee kaayyeeddaane, ommos atin yeedi indigir ikhabin kaayyeeddaane, ommos chuunki suuje ischuuntaan. Wahanyeyyohaas ma atin imalin. Atinhi wihi Waakh atin iyeele usu kalaꞌd ikalaabtaane haaggan. 5Waha tissiba giꞌde, eti sohoꞌddarri kaassohti ommos eti biꞌdire ommos eti ꞌdamaame, eti iꞌdee wihi us ꞌdamaam iyahe waakkhakh kayeessa gone, koo kaldaye dakh Kiriisto ichoow dakhi Waakh muꞌdan mele.
6Uus etoo kalday laka yeedi ilmarhaatteet ka atin ekkeysan. Iꞌdi tahe jeenteti wahanyeyyohi iꞌdee u, holi Waakh ꞌdooꞌdi usú iraahin a isoobaha. 7Maantaka ꞌdooꞌdi uskeelaas yeelo awalhinna.
8A mehe atin rubeytiin goorat ꞌhor mugꞌdi eheete, iꞌdaasenyi atin ichoow Kamur wohoo kalday a tahiin gone, banaye titaaheen. Maantaka fatali ꞌdooꞌdi banaye jira giꞌde. 9A mehe banayha gurnaanki us delo a haag tuumman ichoow wihi fissan tuumman ichoow wihi rummaat tuumman. 10Toro la wihi Kamur kahamaadicho ꞌdonꞌdoona. 11Taba wahanyeyyohi ꞌdooꞌdi mugꞌdi goya kijiro gurnaan idelin iꞌdaaru laka araahina, wihi icho yeelaan ꞌdow isoobahcha. 12Iꞌdi tahe a lakhaanyo laka chirri inno wihi icho dagsi ka yeelaan kaayyeeno. 13Iꞌdaasenyi chirri banay wohoo katoollaan, wahaas wihi icho rumanka yahiin a laarga. 14Iꞌdi tahe banay walah tuumman wihi icho yahiin a tusaan. Jeentetaase mehe liiessa ya,
“Atiha uꞌdurto, sookahe,
omoot kasookahe,
Kiriisto la banayhiis a atin kiifchaa.”
15ꞌDeerka saggi atin ijirtaan weyti yuubsada. Saggi ꞌdooꞌdi ꞌdalammee iijirina, iꞌdaasenyi saggi ꞌdooꞌdi kharayyee ijira. 16Jeenteti waha ibeenneti enenyet uskeel yeelo iyahiin u, ibeenki Waakh atin siicho dakkhan mujjum khaadda, saggi rumanka Kiriisto liiraaho tusa. 17Maantaka saggi ꞌdooꞌdi ꞌdalammee iijirina, iꞌdaasenyi wihi Kamur atinhi yeessaan ꞌdoono abda. 18Taba, farsoti sabiib ka meleefu iitaahana, a mehe jiroti uskeeli buurenye iꞌdaanu layeelo keenaan. Iꞌdaasenyi Rubeyti Munyee a atin buuhisso. 19Iꞌda ka Sabuuri Yeedi Waakh goya kayimiy ichoow geeyohi Waakh lakasaaꞌdo ichoow geeyohi Rubeyti Munyee atin siisso a iskaleeyyeeddaan. Uurassiin ka Kamur geeyo idowa. 20Toro la magah Yeesso Kiriistohi Kamureene ka, kol dakkhan Waakkhi Aabbaheene walah tuumman ka kalaꞌd ilaaba.
21Wihi ꞌdaꞌddaboot, jeenteti atin Kiriisto iinkaanyittaan u, taba giꞌde, af iiskutina.
Mindischo a iꞌdi Kiriisto ichoow ururiissa
(Kolossaay 3:18-19, 1 Beetero 3:1-7)
22Deyyeho, taba makhaaballetiin aficho akutina, saggaas atin Kamur afiis ikutin u. 23A mehe makhaabal usu matakki makhaabassiise, saggi Kiriisto matakki ururiis iyahuu. Kiriisto la usu ururiiski iꞌdi sartiise ꞌDoorribehichee. 24Toolla saggi urur Kiriisto Kiriisto afiis ikutin u, arame laka walah tuumman ka iiche makhaabaliche afiis kutin.
25Makhaaballe taba, saggi Kiriisto ururiis iꞌdoone us jirotiis icho ikasoobahchuu, atin laka oboorrihiin ꞌdoona. 26Kiriisto la iꞌdane yeele, ꞌdee dikhnaanki us bicche ichoow Yeediis ka dikhe ka ururiis munyaacha. 27Toro la iꞌdane yeele, ꞌdee berri ururiis tuumman ankiis keena. Urura la a ki ababo, el ikhabine ommos ichamammowine ommos wohoo suuje fool ka ikhabin, iꞌdaasenyi a ki munyeenye toro la wohoo rucchul laka liikacheekan. 28Saggaas on u, makhaaballe laka saggaas maanta iche sartiche iꞌdoonto oboorrihiche a iꞌdoonto. Eti makhaabassiis ꞌdoono a isꞌdoona. 29A mehe a ꞌdowe et koloo kalday laka sartiis ꞌdiiꞌdo mele, iꞌdaasenyi ebba sartiis a goollicha toro la lagta. Kiriisto laka ururiis iꞌda on yeela. 30Iꞌdi tahe inno a iꞌdi miilassi sartiissa. 31Saggi Chiirnaanneti Waakh ka liichiiruu, “Jeentetuu mejel aabbahiis ichoow abartiis a kataba, usu ichoow makhaabassiis la wohoo kalday yateehiine lammacho ba sartoo kalday yateehiin.”#5:31 Uumaccho 2:24. 32Chiirnaankaas aytoo weyti weene dagsane kaayyeda. Iꞌdaasenyi yeedaas ka ani Kiriisto ichoow ururiissa kaayyeeda. 33Iꞌdaasenyi taba etiin ba saggi us isiꞌdoono makhaabassiis a iꞌdoono, makhaabál la makhaabaliche a inkaanyitto.
ទើបបានជ្រើសរើសហើយ៖
Efeesso 5: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.