Hilassi Ergaano 26
26
Baawulo ꞌHeroodhi Agiribbahi lammaatteete ortiis ka isiyeyyeeda
1Agiribba ꞌdeerka wihi us Baawulo iyidah, “Antohi at awtaah u isikaayyeeddo a khabta.” Baawulo la dahan ficche iꞌduu isiyeyyeede. 2“Agiribbahi karnate, an maalinka weyti hamaada chirri an ortaah toollo ꞌdee wihi ꞌdooꞌdi Yaꞌhuud ikacheekti ortaah ka isiyeyyeedo. 3Kach ka la, a jeenteti ati hugummeti Yaꞌhuud ichoow wihi icho worsataan tuumman igaratti. Toollaka a kihawwaasde samacchaar on idaganso.”
4“Yaꞌhuud tuumman uus rucchuleet saggi an ijire a garta. Saggi an uus an delde an ileey ichoow ilkerengeetti weene Yeerusaleem on ifiddiye a gartaan. 5Icho geeddi deer a igarteen. Chirri icho ꞌdoonaan, saggi an Farissaayo ieheet a cheekaan. Farissaayo la, a rabittoo Yaꞌhuude rabitohi addane Yaꞌhuud ꞌdirihiis wihi Waakh ꞌdoono mujjum raahto. 6Wihi toolla liikahukkumo la, a jeenteti an wihi goorat Waakh aacchinyeteenyo iayyiche khajjeel ikakhabo. 7Khajjeela la a ki yaafohi Issiraayele tomon ichoow lammee ibeen ichoow maalim Waakh iwahtaane icho sugaan. Karnatoow jeenteti khajjeelane ꞌdooꞌdi Yaꞌhuud icheekta. 8Atinhi Yaꞌhuude, saggi Waakh ꞌdooꞌdi tuume omoot ikasookahcho wohoo liiubaaꞌdan iigoonna!”
9“Ani rubeyteey laka wihi an tissibe, wihi an abuuꞌd tuummane yeele, antohi magah Yeessohi Naasarete tirrimaa. 10An antohi kuhaaniyyohi wewween ka ꞌdooꞌdi Waakhe ittaawe jeela a gesse, maanti layagiis la ani laka a ayyiche. 11Geeddi buure an kolba minkoo weysiite Yaꞌhuude kabaha koo gela ꞌdee icho jaha toro Yeessohi icho igafaan iholin leheet. Jeenteti an icho weyti iꞌdiiꞌduu, ilkerengeetohi ili yeelan kijiro laka irde, ꞌdee icho sina omhicha.”
Baawulo saggi us anki Waakh ikuurgiye cheeka
(Hilassi Ergaano 9:1-19, 22:6-16)
12“Sulhaassoo iꞌdee ka khadaabi antoote kuhaaniyyohi wewween isiicheen khabaayi anki ilkerengeetti Damaasko miinsade. 13Eti weenoow, geeddi maalimeet jit raahaayi banayhi serey kayimiyye wihi orraheet laka kaababo ani ichoow ꞌdooꞌdi kootte iraaho ꞌdolloheenyo guꞌddeen. 14Nah tuummamba il guꞌdubne, anna hooyi afi Ibiraaniya ka, ‘Saawulo, Saawulo, a iꞌdoh ani sina iomhissa? At a iꞌdi heeri wussi ooyohiis tulcho, bolokh isikeeno,’ idowo daage.”
15“ꞌDeerka wihi an worsade, ‘Kamur at a ayyo?’
“Kamur la wihi us isoolaabe, ‘An a Yeessohi at sina omhisso. 16Toollaka kahe tolosso. An a kisoobahe ꞌdee iꞌdi falfateey u kisoobahsada, garti wihi ani imiinsane at agarte ichoow wihi an yomboka kisootuso laabta. 17ꞌDooꞌdaah ichoow yaafohi Yaꞌhuud ieheynane an kiergadi a kaariba. 18Icho kiergada ꞌdee walah abissa indo furnamaane, mugꞌdi kasoolaabta banayhi Waakh goya keenta, miigti Seytaan kasoolaabta Waakh iurgiyissa. Iꞌda ka uskeelicho a liikakuta, toro icho laka kakhuufnaanki icho ikakhuufaan ka ꞌdooꞌdi Waakh soobahsate goyaka meessi icho muꞌdane ꞌhelaan.’ ”
Baawulo hiliis cheeka
19“ꞌDeerka Agiribbahi karnate, an fooltabchoti an serey ka arge, ma raahiwwaayin. 20Anna kolooraat ilkerengeetti Damaasko Yeedi Waakh kacheeke. Yomboka ilkerengeetti weene Yeerusaleem ichoow ili Yaꞌhuudiya tuumman ichoow ꞌdooꞌdi Waakh igaranne Yeedi Waakh icheeke. Wihi an cheeke la a saggi icho uskeelicho ikasoonokhtaane icho Waakh ikuurgiyaane, fiddihicho ka saggi icho rumanka uskeel ikasoonokhteen tusaan. 21Jeentetaase ꞌdooꞌdi Yaꞌhuud anihi minki Waakhe buure kajiro ikhabte, iigaasan leheet. 22Iꞌdaasenyi ichoowka maalinka Waakh a igargaare. Jeenteti toolla an inta itoollo an ꞌdooꞌdi weynaan laa ichoow ꞌdooꞌdi wewween ba ileeyyeedo a jeentetaas. Wihi an eldi a wihi goorat ꞌdooꞌdi Waákh íyeyyeedo ichoow Muusa ba ꞌdee berri a yateehiin cheekeen on. 23Wihi icho cheekeen, Ki Lasubhe sina lakawaaricha, toro eti oraate omoot kasookaho yateehe, ꞌdee ꞌdooꞌdiis ichoow yaafohi Yaꞌhuud ieheynan banayhi saggi Waakh icho iribo tusa.”
24Geedda Baawulo isiyeyyeedo ka, Feestas Baawulo kariire wihi us iyidah, “Baawulo at a sirgo! Soonnaankaahki buure a kisirgooche!”
25Baawulo wihi us Feestas ilaabe, “Eti ween, an sirgo menye, yeeda an kaayyeedo la a yeedi rummaate, a yeedi eti iiꞌd khabo. 26Agiribbahi karnate, an roorro laane kileeyyeeda. Wihi an tissibo, at wahanyeyyoha tuumman a garatta. A mehe inti dagsan ma lakayeelin. 27Agiribbahi karnate, at chiirnaanneti ꞌdooꞌdi goorat Waákh íyeyyeedo a rummeysatta? Saggi at irummeysatti a garda!”
28Agiribba ꞌdeerka wihi us Baawulo iyidah, “Kol at geedda rucchul on ka et Kiriisto ikayeesso koogtahe?”
29Baawulo la wihi us ilaabe, “Geeddoo rucchul ommos geeddoo deer eheetteey ka ba, Waakhe daaha ati kalday la menye, ꞌdee ꞌdooꞌdi maalinka idagansati tuumman iꞌdeey u Yeesso kakhuufa, hiinaanka an hidanahe on liihidin menye.”
30Karnat ichoow gaafana ichoow Beernike ichoow ꞌdooꞌdi addan tuummamba sookahe. 31Min kabaheene, geedda icho isleeyyeedaan wihi icho yidaaheen, “Eta walah us yeelo omoot ommos hiinaan muꞌdan mele.”
32Agiribba la wihi us Feestas iyidah, “Eta kootte Kaaysar ikooyin ka, a geeddi lafuro.”
ទើបបានជ្រើសរើសហើយ៖
Hilassi Ergaano 26: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.
