Hilassi Ergaano 27
27
Baawulo koobanhi ilkerengeetti Rooma isohti lakorcha
1Chirri saggi nah ilkerengeetti Rooma ili ꞌDeylaan kajirto kooban ka iiranni lagooche ka, Baawulo ichoow ꞌdooꞌdoo addane hidan ba, Yuuliyashi koobbintoo iskareet itoollo, Koobbin Kaaysar layadeeh iween dahan lagesse. 2Koobanhoo ilkerengeetti Adaramaadiya kayimiy korre. Koobanha dowwanoha ka a kahaane ꞌdee boroofenhi Aassiya ka ilkerengeetohi bey afiche kijiro tottolossata. Etoo Aristaarkos layadeehe ilkerengeetti ꞌDessaloonika kayimiy laka a nah leejire. ꞌDessaloonika la boroofenhi Makedooniya kajirta.
3Ibeenki kaas sookhuccho ka ilkerengeetti Siidon gelle. Yuuliyas la weyti Baawulo ihaagganeete, ꞌdiiche irte, aalassiis iirte icho la wihi us ꞌdoono siicheen. 4Intaas kakahne, kurti bicche dahcho kijirto Kuuburo layadeeh berihiche tabne, a mehe hafari kooban jeycho ankaas ka a deefaa. 5Chirri nah bey aficheki boroofenneti Kiliikiya ichoow Bambiiliya kijiro katabne bey dah kagoonne ichoowka ilkerengeetti Muura boroofenhi Lukkiya kajirto nimiy ka, kooban kasooyegne. 6Intaas ka eti koobbintoo iskareet itoollo, koobanhi ilkerengeetti Alekisaandariya kayimiyye ili ꞌDeylaan isohti ꞌhele, nah korche. 7Jeenteti hafari miige kooban ijeychuu, ibeenneti ittaawe samacchaar on sohanne, ichoowka nyif ka ilkerengeetti Kiniidas idowwaanne. Hafar la kooban jit buuche, ꞌdeerka inti Salmoone layadeehe kurti bicche dahcho kajirto Kireete layadeeh gurrotichee tabne. 8Nyif ka beyti buure afiche iranne ichoowka inti kooban katolossataane Afi Haaggan layadeeh ka tolossanne. Intaas la, ilkerengeetti Laasaaya ma kadeer.
9Ibeenneti ittaawe a kutte, toro la ibeenki orran Yaꞌhuud af hiiti a kute, hayti orran hafar weyti miigyahe la a soomarte. Geeddaka sohoti orran koobanhi buure ka lasohti a geeddi us omoot laka keeno. Baawulo ꞌdeerka ꞌdooꞌd tootooche, 10“Era, wihi an kase, chirri inno orey isohanne, meehi kooban kajiro a baaba, kooban laka uskulaataane, enenyet gaasoo laka tuuma,” iyidah. 11Iꞌdaasenyi eti koobbinti iskareet itoollo wihi Baawulo essi menye wihi kootte eti kooban iween ichoow wihi eti kooban leh yidaaheen on raahe. 12Meessi Afi Haaggan layadeeh inti kooban hayohi roffo fiddiyaan mee gone, ꞌdooꞌd buurtiis koobanhi orey isohti gooche, ilkerengeetti Foonige eleelin ꞌdoonaanee. Afaas Kireete kijiro a geeꞌddime, bicchehiche la gurro ichoow miige yeyaan.
Ire beyti buure goyaka weyti uskulaatta
13Maanti hafaroo samacchaare gurro kayimiy ka, ꞌdooꞌd kol wihi icho ꞌdooneen yateehiine koogyahe. ꞌDeerka birti kooban jeyisso soolaabeene kurti bicche dahcho kajirto Kireete afiche tabeen. 14Geeddoo rucchul on ka, hafaroo weyti miigenye, “Hafari Miigeet,” layadeeh kurti bicche dahchee ka sookahe, 15kooban guꞌdde. Jeenteti hafar kooban ilaabe u, kooban woynaan ꞌdiinne, ꞌdeerka hafar on kooban woye. 16Chirri nah kurti rucchule Kawuuda bicche dahcho kajirto gurrotiche eleelle ka, koobanhi rucchule koobanhi addan ꞌdubiis kanyutan nyif ka bicche goya kasoobihinne, kooban korinne. 17Inkoo icho koobanhi rucchul koobanhi buure kookkhicheen ka, yabarre kooban iliis kajurkhicheen, uus jejjebinee. Koobanhi yoohti Liibiya bicche iliis kijiro jeychaane karooreen. Darfohi kooban woyo yagcheene ꞌdee hafar kooban a woyo. 18Hafaraas miige ma yaasin ba ichoowka ibeenki kaas sooraaho ka, meehi kooban goya kajiro beyti buure goya kalugꞌdeen, uus bicche kooban khaatinee. 19Ibeenki kaas sooraaho ka, dahanohicho ka yabarre ichoow meehi koobanoot sesseyeen. 20Ibeenneti ittaawe nah orrah ma argine, ommos yiyyihimo ma argine, hafar la weyti on kakhayma, ichoowka khajjeeli nah laribo rogne.
21Inkoo ꞌdooꞌd geeddi deer golol laan fiddiye ka, Baawulo orcho tolossate, “Era chaꞌatin kootte waansiheey raahteene, kurti bicche dahcho kijirto Kireete inno fiddiine, ꞌdanota tuumman ma inno isoobahto, waha tuumman la ma waayno,” yidah. 22“Iꞌdaasenyi toolla a atin hawwaasde aburꞌdowina! Etiinkoo kalday laka jirotiis ma waayo, kooban on massata. 23Ibeenkate Waakkhi an kiis ahe toro an ihilo hertiistoo garabaaya tolossatte, 24wihi iche itidah, ‘Baawulo, roorro akhabin! Ati Kaaysar ortiis a tolossatta. Haaggi Waakhe buure ka, ꞌdooꞌdi kooban kaaleejiro tuumman, koo kalday laka ma yamuut.’ 25Era, toollaka aburꞌdowina! Wihi tahe an Waakh a kakhuufa, iꞌdaas liiyidah on la tateeh. 26Iꞌdaasenyi hafar a inno woya, kooban la kurohoo bicche dahcho kajiro ka kichekoo kajejjebaan.”
27Uuꞌ goorat hafari miige sookahe, teeba lamma kutte. Beyti Buurenye Meditereeniya goyaka hafar kolba ankoo nah iwoye. Chirri il ekka seley kagowe ka, ꞌdooꞌdi kooban woyo kol nah ili kafafsan idowwaanne koogyahe. 28Yabari wohoo huleese kahidanyihiine bicche geeddicho lakarerreego bicche kalugꞌdeene, bicche geeddicho rerreegeen. Bicche la a geeddi mitta tomon affar. Iꞌdaaru toro orey isohteene, geeddi bicche hogyahiin rerreegeen. Bicche la mitta tomon seyyah yitaaheen. 29Jeenteti icho koobanhi daddaabo ka jejjebo ikarooraan u, kooban ꞌdubiis ka gaꞌdaarreti kooban toollisso, affar bicche goya iꞌdiicheene, ili baryo Waakh iwahteen. 30ꞌDooꞌdi kooban woyo ichohi firdo ꞌdoonaane koobanhi rucchul beyti buure goyaka il iwoyeen. Ichohi gaꞌdaarreti kooban toollisso kooban orcho laka gelin ꞌdoono iskayeeleen. 31Baawulo la chirraakka wihi us eti koobbinti iskareet itoollo ichoow iskar ba iyidah, “Sammata ꞌdooꞌda kooban woyo ifiddiyin, etiin bahsati mele.” 32Iskare ꞌdeerka yabarreti koobanhi rucchul jeyisso goosse, kooban irteen.
33Geeddi il ibaryin Baawulo ꞌdooꞌd tuumman hawwaaste gololoor a yumheen. Wihi us iyidah, “Atin ibeen tomon ichoow affar kutte roorro kaldach on kijirteene golol laan fiddiiteen, walah atin tumheen mele. 34Toollaka a atin hawwaasde gololoor amha, ꞌdee noolaada, iꞌdi tahe etiinkoo kalday laka iꞌdoo rucchul laka ma yateeh.” 35Baawulo la inkoo us waha yidah ka, makaatetoo sookkhiche, icho tuumman orcho ka Waakh kalaꞌd ilaabe. ꞌDeerka makaate jebche yuhum. 36Icho tuummamba uur miigowe gololoo yumheen. 37Nahi kooban iskaleejirre isgoya a et kud lamma ichoow et tomon teeba ichoow et lih. 38Inkoo icho geeddi icho ꞌdoonaan yumheen ka, ꞌdargaayye beyti buure goya isayeen huleesi kooban kajiro nuglaacheen.
Ire kooban jejjebissa
39Chirdeer ka harratoo icho ikasin beyti buure afiche ka argeen. Iꞌdaasenyi bey afiche ka intoo harra bicche kamarsantahe yooh khabto argeen. Wihi icho goocheen a ichohi chiꞌicho yabuuꞌdiin kooban yoohtaas eleelicho. 40Wihi gaꞌdaarreti kooban toollisso khucche goocheene bicche goya iꞌdiicheen. Chirraakka yabarreti khoꞌdoommeti kooban lakawoyo khucchisso laka soofurfureen. ꞌDeerka dafarti oraate kooban woyto hafar goyaka taageene, beyti buure afiche miinsateen. 41Iꞌdaasenyi kooban yoohti bicche goya kajirto guꞌddeene, yoohe kooban toollisse. Kooban matakkicho la yooh geleene kooban sesseeh agaafteen. Irti miigenye biccheet kooban ꞌdubicho guꞌdubte, jejjebisse.
42Iskare la mali iche khabte, a ki iche ꞌdooꞌdi hihhidan bakkisso, iicho bicche taagine firdinee. 43Iꞌdaasenyi eti koobbinti iskareet itoollo usuhi jiro Baawulo ribo ꞌdoona, mali iskare khabte hosse. Amur bahche ꞌdee eti bicche taagnaan garti koloo bicche goya a kidiho, harrati kafafsan a imaaho. 44ꞌDooꞌdi sooꞌhade la ebba khoꞌdoonkoo ommos meehi addane koobanoote khabta, ꞌdee bicche afiche imaaha. Iꞌdaas yeelle nah tuummamba harrati kafafsan nebey eleelle.
ទើបបានជ្រើសរើសហើយ៖
Hilassi Ergaano 27: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.
