2 Koriinto 4
4
Baawulo hili ergaano dowdowa
1Maantaka jeenteti Waakh uurnugleeliis on u hila usu liihilo nah ikorchuu, rubeye ma nah jebto. 2Wihi dagsane lakhaanyo keeno a ꞌdiiꞌdne. Nah la enenyet ma ekkeysanni, Yeedi Waakh ma baabullo. Nah runti Yeedi Waakh on babbakkaahinna. Waakh ortiis ka, eti tuummane rubeytiis haag ichoow suujoon seley saahto, haaggi fiddiheenyo a tusna. 3Chirri Wori Haaggane nah cheekno dagsanyahe laka, ꞌdooꞌdi bar latiro on kadagsanyahe. 4Seytaanki waakkhi harratee malassi ꞌdooꞌdi Kiriisto irummeysan a hide, ꞌdee banayhi Wori Haaggan ma argaan. Banayha la a Wori Haaggane Kiriistohi weynaan leh. 5Iꞌdi tahe nah kooloheenyo enenyet ma icheekno, Yeesso Kiriistohi Kamurenye cheekna. Toro la jeente Yeessuu, saggi nah ilbooyyetiin inahe cheekna. 6Iꞌdi tahe Waakkhi, “Mugꞌdi goyaka banay a soobaheen,”#4:6 Uumaccho 1:3. yidah rubeytiissa banayhiis uurasseen goya kiifche, ꞌdee garanti inno ababnaanki Waakh garanni inno siicha. Ababnaankaas fool Kiriisto kasooababa.
7Iꞌdaasenyi inno a iꞌdoo inno kamurroonka ꞌdiryo goya kijiro sarteen ka khabno, ꞌdee miigti miig tuumman kussan inno ma inno katamiite, Waakh katamiit. 8Amam tuumman ka a nah lamarche, iꞌdaasenyi ma nah laajjebcho. Uurlammaale khabna iꞌdaasenyi ajjibaat ma khaanno. 9Sina nah loomhicha, iꞌdaasenyi Waakh ma nah ꞌdiicho. Kolossoo il nah lakaguꞌdda, iꞌdaasenyi rubey ma nah lakabahcho. 10Kol dakkhan sarteenyo ka omoot Yeesso sinna, ꞌdee jiro Yeesso laka sarteenyo ka lasoobabbakkaahicha. 11Iꞌdi tahe nahi jiro khabno kol tuumman jeente Yeessuu, ogoose nah lamarma, ꞌdee jiro Yeesso sarteenyota tamuut lakaarga. 12ꞌDeerka omoote a nah maranta iꞌdaasenyi atin jiro a khabtaan.
13Wihi chiiran, “An Waakh a rummeesde, ꞌdeerka yeede.”#4:13 Sabuur 116:10. Nah laka iꞌdaasu Rubeyti Waakh ka Waakh a kakhuufne ꞌdeerka Wori Haaggan a cheekna. 14A mehe wihi nah garanni, Waakkhi Yeessohi Kamureene omoot kasookahche, inno laka Kiriisto a inno leesookahcha ꞌdee inno tuumman Waakh ortiis inno keena. 15Sinayyoheeyka tuumman a iroonotiinna, ꞌdee haaggi Waakhe buurenye inno imunneynan ballaasta ꞌdooꞌdi buure eleela. Iꞌda ka Waakh a lakoolicha jeenteti ꞌdooꞌdi Waakh kalaꞌd ilaabo ibuuraatuu.
16Maantaka chirri sarteenyo tamuut laka, nah yombuu yombo ma inokhanni rubeyoheenyo kol dakkhan a lamiigoocha. 17Iꞌdi tahe sinayyohaar ꞌdabakhe a wihi geeddoor one, wihi icho keenaan la a ababnaanki weyti khummane jirtuu tuumman imassanne sinayyohaas kussan. 18ꞌDeerka nah wihi laargo menye, wihi liiargine mujjum fiirinna. Iꞌdi tahe wihi laargo a wihi geeddoor on jiro, iꞌdaasenyi wihi liiargin a wihi jirtuu tuumman imassan.
ទើបបានជ្រើសរើសហើយ៖
2 Koriinto 4: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.