2 Koriinto 5
5
Sarti husube ꞌdooꞌdi goobi Waakh lasiicho
1Iꞌdi tahe wihi inno garanni, chiꞌ sarteenta harratane inno khabno iꞌdi eemee labaabiicho, goobi Waakh ka, minki jirtuu imassanne inno Waakh kaꞌhello a khabna. Minkaas la ki dahanohi enenyet haaggicheen mee. 2Geeddi inno sarta on khabno a ooyna, toro la sarti husube goobi Waakhe iꞌdi dafarti inno gessannuu imoonna. 3A mehe maanti iꞌdaasu sarti goobi Waakh inno lakagaade, rubeyoheen sar laan ma fiddiyaan. 4Iꞌdi tahe geeddi inno sarteenta harratane iꞌdi eemee on khabno a ooyna iꞌdoo hulees inno lakorchuu. Waha jeenteti innohi sarteenti harrata lakaduumicho iꞌdoonno menye, innohi sarteenti husube goobi Waakhe inno lagesso ꞌdee jiroti jirtuu imassan sarteenta tamuut chakhsatti iche ꞌdoonna. 5Toolla Waakh rubeytiis waha a inno itannabiche. Ulla toro Rubeyti Munyeenye inno siiche, ꞌdee iche ka, saggi inno wihi us inno iabbire tuumman tuum rumanka iꞌhello inno tuse.
6Maantaka nah kol tuumman roorro ma khabno. Wihi inno garanni a mehe ya, geeddi inno sarta harrata on khabno Kamur foga ileejirra. 7A mehe jirota nah jirro jeenteti nah usu indo ikaagarro menye jeenteti kakhuufnaanki nah usu ikakhuufno iche ijirra. 8Nah roorro ma khabno, nahi sarta nah lakabahcho iranni Kamur leefiddiino ꞌdoonna. 9Maantaka sarta ka jiro khabneey ommos ma khabineey ka ba wihi nah ꞌdoonno tuumman, a nahi usu on kahamaadinno. 10Iꞌdi tahe inno tuumman komborti Kiriisto enenyet kahukkumo orcheeda kasoobahna, ꞌdee ebba haag ommos suujoonki us geeddi us sartiis khabo yeele ka laguta.
11Maantaka nah Kamuri lakarooro wihiis a garanna gone, hole downa weeli enenyet hawwaassanna. Waakh wihi nah nahe khuuf on garta, toro an a khajjeela atin laka rubeyohiinki haag ichoow suujoon seley saaho ka wihi nah nahe khuuf a garattaan. 12Nah toro haaggeenyo ma atin isoodowdowno, jiti haaggane atin keeylajjaan on atin siinna. Iꞌda ka la jeenteti wihi uur goya kijiro menye, jeenteti wihi indo lakaarguu, atin ꞌdooꞌdaas walah ilaabin a tabuuꞌdiin. 13Chiꞌ nah sirgo nahe a iroonoti Waakhe, chiꞌ nah sirgo ieheynan la a iroonotiinna. 14Saggi Yeesso Kiriisto meessi enenyet tuumman ikayumuy a tissibna. Jeentetuu ꞌdoonin Kiriisto inno dakhatta. Inno tuumman a iꞌdoo inno tuunne, jiroti oraat ma inno dakhatti. 15Ulla enenyet tuumman a iyumuyye ꞌdee eti tuummane jiro uus saggi us awtiis u iꞌdoono ijirine, iꞌdaasenyi saggi Kiriisto iꞌdoono a ijiro. Iꞌdi tahe Kiriisto a yumuyye Waakh la iroonotichuu usu omoot kasookahche ꞌdee icho la jiraan.
16ꞌDeerka uus toolla kakhabatti iꞌdi ꞌdooꞌdi harratuu, enenyet saggi inno iagarro ma ikhaanno. Chiꞌinno goorat Kiriisto iꞌdoo us weeli enenyet yahuu iꞌdaas yeelle laka, kola iꞌdaas ma yeello. 17Maantaka eti tuummane usu ichoow Kiriisto wohoo kalday yahiin a uumacchotoo husub. Jiroti raagan a kasootabe, too husube jira.
18Waha tuumman la Waakhe yeela. Ulla Kiriisto ka weeli enenyet ankiissa keene, toro la hila Waakhe enenyet anki Waakh lakeeno inno korche. 19Wihi an eldi a waha, Waakh Kiriisto ka ꞌdooꞌdi harrata ankiissa keene. Ulla uskeelicho ma ekkaacho. Toro la hili us nah korche a ki nah saggi usu weeli enenyet ankiis ikeeno nah cheekno. 20Maantaka nah a ꞌdooꞌdi meel Kiriisto kijiro. Waha a iꞌdoo Waakh nah ka enenyet hawwaasti. Nah la a atin hawwaassanna iroono Kiriistuu taba keennaanki Waakh ankiis atin keeno raaha. 21Waakh Kiriistohi uskeeloo rucchul laka iyeeline meesseen ka eti uskeel leh kayeele, ꞌdee Kiriisto ka fissanoonki Waakh inno liiekkaacha.
ទើបបានជ្រើសរើសហើយ៖
2 Koriinto 5: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.