LEVÍTICO 2
2
Ch'aki mikhuy rikuchiku
1Maypachachus mayqempis rikuchikuta ch'aki mikhuymanta Señorpaj apamunman chayqa, ñut'u jak'uta apamuchun. Chay jak'umanqa aceiteta jich'aykuchun, inciensotataj churaykuchun. 2Chaymantaqa aaronita sacerdotesman jaywachun. Ujnin kaj sacerdotetaj uj k'ispiña jak'uta, aceiteyoj tukuynin inciensota ima altarpi ruphachenqa yuyarikunapaj rikuchikuta jina. Chay ruphachispa jaywasqampa q'apaynenqa Señorpaj allin kanqa. 3Chay rikuchikumanta puchoj jak'utaj Aarompaj wawasnimpajwan kanqa. Chay jak'oqa Señorpaj sumaj llimphuchasqa kanqa tukuy ruphachisqa rikuchikusmanta astawan.
4Maypachachus hornopi chayasqa rikuchikuta apamunkiman chayqa, sumajnin ñut'u jak'umanta aceitewan ruwasqa mana levadurayoj t'antata apamunki, manachayri mana levadurayoj t'antaqa aceitewan jawisqa kachun.
5Sichus paylapi chayasqa rikuchikuta apamunki chayqa, sumajnin kaj ñut'u jak'umanta mana levadurayojta aceitewan ñatusqata apamunki. 6Chaymanta chhikan chhikanta t'unarachinki, chay patamantaj aceitewan chhalluykunki. Chayqa Señorpaj rikuchiku.
7Sichus ch'aki mikhuykunamanta fierro mankapi chayasqa rikuchikuta apamunki chayqa, sumajnin kaj ñut'u jak'umanta aceitewan ñatusqata apamunki. 8Ajinata chaykunamanta rikuchiku wakichisqaña kajtin Señorpa ñaupaqenman apamunki, sacerdotemantaj jaywanki. Paytaj altarman apanqa. 9Chaypi sacerdoteqa uj pisita chay rikuchikumanta orqhospa ruphachenqa altar patapi, yuyarikunapaj rikuchikuta jina. Chay ruphachispa jaywasqampa q'apaynenqa Señorpaj allin kanqa. 10Chay rikuchikumanta puchojqa sacerdotepaj kanqa. Chay rikuchikumanta puchojqa Señorpaj sumaj llimphuchasqa tukuy ruphachisqa rikuchikusmanta astawan. Chayqa Aarompaj miraynimpajwan kanqa.
11Chay tukuy ch'aki mikhuy rikuchikusmanqa amapuni levadurata churankichejchu, Señorman jaywamunaykichejpaj. Levadurayojta, chayri misk'iyoj kajtapis amapuni Señorpaj altar patapi ruphachimunkichejchu. 12Chay levadurata misk'itawanqa Señorman jaywayta atinkichej ñaupaj poqoykunata jina. Chaykunataqa ama altar patapi ruphachimunkichejchu Señorpaj allin q'apay jinataqa.
13Señorman qonaykipaj chay tukuy rikuchikusman kachita churankipuni. Kacheqa runata yuyarichin Dioswan tratota ruwasqanta. Tukuy rikuchikusniykimanqa kachita churankipuni.
14Ch'aki mikhuykunasta ñaupaj poqoykunasniykichejmanta Señorman rikuchikuta qojtiykichej, chay rikuchikoqa sumaj poqosqa espigasmanta kanan tiyan. Espigasta kankankichej, granostataj kutankichej. 15Chay rikuchikuman aceiteta jich'aykunki, inciensotataj patanman churaykunki. Chayqa Señorpa ch'aki mikhuna rikuchiku. 16Sacerdotetaj aceiteyoj kutasqa granota uj chhikanta Señorpaj ruphachenqa tukuy inciensotawan, yuyarikunapaj rikuchikuta jina.
ទើបបានជ្រើសរើសហើយ៖
LEVÍTICO 2: QCHSB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Qheshwa Biblia DC © Sociedades Bíblicas Unidas, 1986.