ÉXODO 38
38
Bronce altarta ruwanku
1Bezaleelqa ruwallarqataj rikuchikusta ruphachina altarta acacia maderamanta. Sayt'unman karqa iskay chunka phishqayoj centimetrosniyoj, kikillantaj kinrayninman karqa, patamantaj karqa uj metro iskay chunka phishqayoj centimetrosniyoj. 2Tawantin esquinasninmantaj ruwarqa wajrasta jina, chaytaj ujlla altarwan karqa. Jinaytawantaj broncetawan patanman churarqa. 3Broncellamantataj imaschus chay mesapi kanan karqa chaykunata: Ushphirusta, palasta, tazasta, tenedoresta, brasasta apaykachanasta ima. 4Chay altar pataman trancanampaj ruwarqa uj rejillata broncemanta, chaytataj churarqa altar uraman, chaytaj altarpa khuskasninkama chayarqa. 5Rejillata broncej tawantin cantosninman churanampaj ruwarqa tawa ningrista sortejasta jina, chayninta k'aspista pasachinampaj chaymantataj oqharispa maymampis apanapaj. 6Chay k'aspismanqa acacia maderamanta ruwaytawan bronceta k'askaykucherqa. 7Jinaytawantaj chay k'aspista altarpa ningrisninta pasacherqa, chaymanta oqharispa maymampis rispa apaykachanapaj. Altarpa ukhonqa cajón jina jusk'ulla karqa.
Bronce ch'illamita ruwanku
8Chaymantaqa Bezaleel ruwallarqataj uj broncemanta uj ch'illamita, Diospa tinkukuna toldo punkupi sirvej warmispa espejosninkumanta. Ajinallataj sayaynintapis.
Patiota ruwanku
9Bezeleelqa patiota ruwallarqataj. Uray ladoman, patioqa karqa chunka phishqayoj metros, t'ullkusqa linomanta awasqa cortina. 10Postesninta sayaracherqa iskay chunkata sapa ujninta bronce chukus patapi. Sapa postespi ganchosnin ningrisnin imaqa qolqemanta ruwasqas karqanku. 11Pata uyaman karqa cortinas tawa chunka phishqayoj metrosniyoj, awasqaswan muyuykuchisqas iskay chunka postesniyoj, iskay chunka chukus patapi sayasqas qolqe ganchosniyoj, qolqe ningrisniyoj ima. 12Inti yaykuy ladomanta awasqaswan muyuykucherqa cortinasta iskay chunka iskayniyoj metros khuskanniyojwan, chunka postesniyojta chunka bronce chukus patapi sayasqasta. Postesta qolqe ganchosniyojta qolqe ningrisniyojta ima. 13Inti llojsimuy ladomanta kikillantataj muyuykucherqa iskay chunka iskayniyoj metros khuskanniyoj awasqaswan. 14Yaykuna chaynejmantataj muyuykucherqa kinsa postesta bronce chukus patapi sayachispa qanchis metros awasqawan. 15Uj ladonmantataj, ujnin punkun yaykuynejman muyuykucherqa kikillantataj kinsa postesta sayachispa chukus patapi qanchis metros awasqawan. 16Patioj muyuyninta muyuykucherqa perqata jina, chay awasqaqa karqa t'ullkusqa linomanta. 17Postespa sayanasnenqa broncemanta karqa. Chay postespa ganchosnin, ningrisnin imataj karqanku qolqemanta. Jinallataj chay postespa puntasnin qolqeyoj jawisqas karqanku. Patioj postesnenqa tukuynin qolqe ningrisniyoj karqanku.
18Patioj punkunta jark'achinaqa sumaj k'acha pallayniyoj ruwasqa karqa, lilamanta, puka pantimanta, pukamanta, t'ullkusqa linomanta ima. Sayt'unman karqa isq'on metros, kinrayninmantaj iskay metros iskay chunka phishqayoj centimetrosniyoj; pataman kikillantaj karqa, patioj jark'achinasnin jina. 19Chaykunataj karqanku tawa postes bronce chukus patapi sayasqas, qolqe ganchosniyoj, qolqe ningrisniyoj; chantapis chay postesqa puntasnin qolqeyoj karqanku. 20Diospa wasin nisqa wasej estacasnin patiojta imaqa, tukuyninku broncemanta karqanku.
Metal rumista yupanku
21Moisespa kamachisqanman jina, levitas yuparqanku, metal rumista Dioswan tinkukuna toldota ruwanapaj. Levitastaqa Aarompa wawan Itamar kamachisharqa. 22Urpa allchhin Bezaleel Urej wawan Judá ayllumanta kajqa, tukuy imata ruwarqa Moisesman Señor kamachisqanman jina. 23Paywan karqa Dan ayllumanta Ahisamacpa wawan Aholiab, mayqenchus artesano karqa, imastapis yuyayninman jina ruwaj, k'acha pallayniyojta lilamanta, puka pantimanta, pukamanta, sumajnin kaj linomantawan.
24Ima qoriwanchus Diospa tiyananta ruwarqanku chayqa, Señorman qosqas ofrenda qoris karqa. Chay qoreqa karqa tukuynimpi isq'on pachaj sojta chunka phishqayoj waranqa kilos, kinsa chunka granosniyoj, imaynachus Diospa tiyanampi kasqanman jina.
25Yupachikusqankuman jina apamusqanku qolqeqa karqa kinsa waranqa kinsa pachaj chunka isq'onniyoj kilos, phishqa pachaj iskay chunka phishqayoj gramosniyoj, imaynachus Diospa tiyanampi kasqanman jina. 26Tukuy iskay chunka watayojmanta pataman yupachikojkuna karqanku sojta pachaj kinsayoj waranqa phishqa pachaj phishqa chunkayoj israelitas. Chaykuna apamorqanku ofrenda qolqeta sapa ujninku phishqa gramos khuskanniyojta, maskhachus Diospa tiyanampi kasqanman jina. 27Diospa tiyanan sayanasninta ruwanapaj qolqeqa karqa kinsa waranqa kinsa pachaj kilos, veloj sayanasnimpajwan. Chay qolqemanta pachaj chukusta ruwarqanku, sapa uj chuku karqa kinsa chunka kinsayoj kilosmantakama. 28Waranqa qanchis pachaj phishqa chunka phishqayoj kilos qolqewan, runasmanta jap'isqaswan Bezaleelqa, ruwarqs postespata, ganchosninta. Chaytataj postesman puntasmampis k'askaykucherqa.
29Ofrenda broncestaj chayarqa iskay waranqa kinsa pachaj kinsa chunka sojtayoj kilosman, tawa pachaj gramosniyojmanwan. 30Chay broncemanta ruwakorqa Dioswan tinkukuna toldoj, altar bronce, chay altarpa rejillan. Chantaqa imaschus altar patapi churasqas karqanku chaykunasnintin. 31Chaymantaqa patioj postesnimpa sayanasnin, estacasnin, mayqenchus Diospa tiyanaj muyuynimpi churasqa karqa chaykuna, patioj punkusnin estacasnin.
ទើបបានជ្រើសរើសហើយ៖
ÉXODO 38: QCHSB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Qheshwa Biblia DC © Sociedades Bíblicas Unidas, 1986.