Апостол. 28
28
28-НЭ ЕДЗЫГЪУЭ
Мелит хытӀыгум Паул къыщыщыщӀар
1Псэууэ къыщынэм, а хытӀыгум МелиткӀэ#28:1 Мелит – иджы Малтэ жыхуаӀэрщ. зэреджэр Паул и гъусэхэм къащӀащ. 2ХытӀыгум щыпсэухэр гуфӀэгъуэшхуэкӀэ къытпежьащ. Уэлбанэшхуэу икӀи щӀыӀэу зэрыщытым щхьэкӀэ, мафӀэ ящӀри, псори драгъэблэгъащ. 3Паул чы гъур куэд зэхуихьэсу мафӀэм щытрилъхьэм, хуабэм зы блэ чыхэм къыхихущ, Паул и Ӏэм къеуэри, кӀэрылэлу къыкӀэрынащ. 4Блэр Паул и Ӏэм кӀэрылэлу щалъагъум, хытӀыгум щыпсэухэм жаӀащ:
– Мыр лӀыукӀ гуэру къыщӀэкӀынущ; сыту жыпӀэмэ хым псэууэ къыхэкӀыжами, Тхьэм и щыпкъагъэм ар псэуну хуит ищӀыркъым.
5Паул и Ӏэр игъэсысри, блэр мафӀэм хидзащ. Абы и зэран Паул къригъэкӀакъым.
6«А лӀыр бэгынущ е напӀэзыпӀэм къытехуэнурэ лӀэнущ», жаӀащ, ауэ куэдрэ пэплъэу, Паул зыри къыщымыщӀауэ щалъагъум, «Мыр зы тхьэ гуэрщ», – жаӀащ, зызэблахъужри.
7А щӀыпӀэм пэмыжыжьэу, хытӀыгум и тепщэ Публий зи цӀэм щӀышхуэ щиӀэт. Абы дригъэблагъэри, махуищкӀэ хьэщӀагъэшхуэ къыдихащ. 8Публий и адэр плъыржьэрымрэ ныбэузымрэ зэщӀаубыдауэ пӀэм хэлът. Паул сымаджэм деж щӀыхьэщ, Тхьэм хуелъэӀущ, и Ӏэхэр трилъхьэри игъэхъужащ. 9Апхуэдэу щыхъум, хытӀыгум щыпсэу нэгъуэщӀ сымаджэхэри Паул деж къакӀуэурэ, ахэри игъэхъужащ. 10Абыхэм пщӀэшхуэ къытхуащӀащ, дызыхуэныкъуэхэри къытхуахьащ дыкъыщежьэжым.
Паул Рим къалэшхуэм зэрынэсар
11Мазищ щыдэкӀым, Александрие къалэм къикӀауэ «Тхьэ зэтӀолъхуэныкъуэхэр»#28:11 Тхьэ зэтӀолъхуэныкъуэхэр – Зевс жыхуаӀэ тхьэ нэпцӀым и къуэ къызэдалъхуахэу Касторрэ Поллуксрэщ. Кхъухь зыхухэм а тхьэ нэпцӀхэр ягъэлъапӀэрт. жыхуаӀэ кхъухьым, щӀымахуэм псом а хытӀыгум щыӀам, дитӀысхьэри дежьащ. 12Сиракуз къалэм десылӀэри, абы махуищкӀэ дыщыӀащ. 13Абы дыкъыщежьэри, Ригие къалэм дынэсащ. Зы махуэ дэкӀауэ, ипщэрабгъу лъэныкъуэмкӀэ къикӀыу жьы къепщэу щӀидзати, Путеол къалэм дыщынэсар етӀуанэ махуэрщ. 14Абы къуэш зыкъом къыщыдгъуэтщ, абыхэм я деж махуиблкӀэ дыщыӀэну къыдэлъэӀури драгъэблэгъащ. Абы и ужькӀэ Рим къалэшхуэм дыкӀуэну гъуэгум дытехьэжащ. 15Рим дэс къуэшхэм дызэрыкӀуэр зэхахати, къытпежьэри, «Аппий ЗэхуэсыпӀэ»#28:15 «Аппий зэхуэсыпӀэ» зи цӀэ къалэр – Рим къалэшхуэм километр 70-кӀэ пэжыжьэу, и ипщэрабгъу лъэныкъуэм итащ. зи цӀэ къалэмрэ «ХьэщӀэщищ»#28:15 «ХьэщӀэщищ» – Рим къалэшхуэм километр 55-кӀэ пэжыжьэу, и ипщэрабгъу лъэныкъуэм итащ. зи цӀэ къалэмрэ нэс къэкӀуащ. Ахэр щилъагъум, Паул Тхьэм фӀыщӀэ хуищӀри, къэгушхуэжащ. 16Рим дыщынэсым, абы тепщэныгъэ щызиӀэхэм Паулрэ абы и хъумакӀуэ зауэлӀымрэ я закъуэ а къалэм дэсыну хуит ящӀащ.
Паул Рим къалэшхуэм дэс цӀыхухэм хъыбарыфӀыр зэрахуиӀуэтар
17Махуищ дэкӀа нэужь, Паул журтхэм я пашэхэр къригъэшащ. Ахэр къыщызэхуэсым, яжриӀащ:
– Си къуэшхэ, сэ ди лъэпкъым мыхъун зыри езмыщӀауэ, ди адэжьхэм я хабзэхэм сытемыкӀауэ щыт пэтми, Ерусалим сыщаубыдри, рим цӀыхухэм сыӀэщӀалъхьащ. 18Ахэр си Ӏуэхум хэплъа нэужь, укӀ къыщӀыстралъхьэн ямыгъуэту щхьэхуит сащӀыжыну хуеящ. 19Ауэ рим цӀыхухэм сызэраутӀыпщыжынур журтхэм щамыдэм, кесарым си Ӏуэхум хьэкум трищӀыхьыну сылъэӀуэн хуей хъуащ. Си лъэпкъым седэуэн мурадкӀэкъым апхуэдэу щӀэсщӀар. 20Ӏуэхухэр апхуэдэу зэрыщытым щхьэкӀэщ фыслъагъуну икӀи сынывэпсэлъэну фыкъыщӀезгъэшар. Израил лъэпкъым гугъапӀэфӀу#28:20 израил лъэпкъым и гугъапӀэфӀыр – Мэссихь хъужыр аращ. иӀэм щхьэкӀэщ си Ӏэм Ӏэхъулъэхъу щӀралъхьар.
21– Уи хъыбарыр зэрыт тхылъ гуэри Иудей хэкум къикӀыу къытхуэкӀуакъым, – къыжраӀащ абыхэм. – Абы къикӀыу мыбы къэкӀуа къуэшхэми уэ птеухуауэ Ӏей лъэпкъ къыдагъэщӀакъым икӀи къыджаӀакъым. 22Уэ уи гурылъхэр къыджыпӀэурэ, дебгъэдэӀуэну дыхуейщ; сыт щхьэкӀэ жыпӀэмэ диным и гъуэгум тет а гупым#28:22 диным и гъуэгум тет а гупыр – еплъ 24:5. цӀыхухэр дэнэкӀи къызэрыщыпэувым дыщыгъуазэщ.
23Махуэ гуэр хахри, Паул зыщӀэс унэм цӀыху гупышхуэ къэкӀуащ. Пщэдджыжьым щыщӀэдзауэ пщыхьэщхьэ хъуху, Тхьэм и Тепщэныгъэшхуэм* теухуа хъыбарыр ягуригъаӀуэурэ, Паул а тепщэныгъэшхуэм щыхьэт хуэхъуащ. Мусэ бегъымбарым и Торэт хабзэм итхэмрэ бегъымбархэм я тхылъхэм итхэмрэ ящыщ къеджэурэ, Паул Хьисэ теухуауэ жиӀэхэр я фӀэщ ищӀыным хэтт. 24Паул жиӀар зыкъомым я фӀэщ хъуащ, зыкъомми ядакъым.
25А журтхэр зэгурымыӀуэу, зэбгрыкӀыжыну щыхуежьэм, Паул мы псалъэхэр жиӀащ:
– Тхьэм и Псэ ЛъапӀэм фи адэжьхэм ятеухуауэ щыпкъагъэр Ешайа бегъымбарым жригъэӀащ:#28:25-28 жригъэӀащ – еплъ Ешайа бегъымбарым и тхылъым 6:9-10.
26«Мы лъэпкъым деж кӀуэи,
мыпхуэдэу яжеӀэ:
Фэ зэхэфх зэпыту фыщытынущ,
ауэ къывгурыӀуэнукъым;
фэ флъагъу зэпыту фыщытынущ,
ауэ гу лъыфтэнукъым.
27Сыту жыпӀэмэ мы цӀыху лъэпкъыр
гулъытэншэ хъуащ.
Я тхьэкӀумэхэмкӀи ерагъыу зэхах къудейщ,
я нэхэри яуфӀыцӀащ.
Апхуэдэу щымытатэмэ,
я нэхэмкӀэ ялъагъунт,
я тхьэкӀумэхэмкӀи зэхахынт,
ягухэмкӀи зыхащӀыкӀынт,
си деж къагъэзэжынти,
сэ ахэр згъэхъужынт итӀанэ».*
28Аращи, Тхьэм цӀыхухэр мыкӀуэду къызэрыригъэлым и хъыбарыр хамэ лъэпкъхэм Тхьэм къазэрылъигъэӀэсар фэ зэвгъащӀэ. Ахэри а хъыбарым едэӀуэнущ.
29Паул а псалъэхэр щыжиӀэм, хуабжьу зэныкъуэкъуурэ, журтхэр унэм щӀэкӀыжащ.
30И деж къакӀуэ цӀыху псори щригъэблагъэу, пщӀэкӀэ къищта унэм илъэситӀкӀэ щыпсэуащ Паул. 31Къыпэрыуэ лъэпкъ щымыӀэу, Тхьэм и Тепщэныгъэшхуэм теухуа хъыбарыр Паул цӀыхухэм яхуиӀуатэрт, Зиусхьэн Хьисэ Мэссихь теухуа хъыбархэри тегушхуауэ цӀыхухэм яригъащӀэрт.
ទើបបានជ្រើសរើសហើយ៖
Апостол. 28: KbdNTGP2017
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Библиер зэдзэкӀыным елжь Институт, 1993, 2007, 2011, 2017
