ZEKARIA 4
4
Mawono gha kinara cha taa
1Nao uo malaika oreghoragha nani ukacha sena; ukaniwusira seji mundu uwusirwagha kufuma dilonyi. 2Ukanikotia, “Kwawuyawona kii?” Ngatumbulia, “Naawuyawona kinara cha taa cha dhahabu, na bakuli ya mavuda yawikirilwa aighu. Aighu yaro korekoghe na taa mfungade, riko na andu kongiria wutambi kula imu. 3Koko mizeituni iwi kaavui nacho; ghumu chia ya mkonu ghwa kiwomi ghwa bakuli, na ghumu chia ya mkonu ghwa kiwaka.”#Wuf. 11.4 4Niko ngamkotia uo malaika, “BWANA wapo, maza iri kutambua kwaro niki?” 5Malaika ukanitumbulia, “Ndekutambukilwagha ni iri maza?” Ngaghamba “Hata bwana.”
Ilaghiro ja Mlungu kwa Zerubabeli
6Malaika ukanizera nimghorie Zerubabeli agha malagho gha BWANA huwu, “Kuchasima, ela si kwa ndighi ra kiwuda angu kwa ndighi rako, ela kwa Roho wapo.#Ezr. 5.2 7Vighirio viwonekagha sa mghondi vichainjika imbiri kwako, na oho kuchaiagha Hekalu sena. Kukaimeria, kukiwika igho ja kutua, wandu wichazuma wikighamba, ‘Yaghoka nao! Yaghoka!’”
8BWANA ukaghora nani sena ukighamba, 9“Zerubabeli oreaghieghe msingi ghwa ihi Hekalu, nao nuo moni uchaaimeria. Niko wandu wichaamanya kukaia ni ini nikudumie. 10Wandu wichafwa ngolo kwa kuwona kazi ya iaghi ikighenda mboa-mboa. Ela wichammbona Zerubabeli ukiiagha Hekalu, nawo wichaboilwa.”
Malaika ukanizera, “Iro taa mfungade, ni meso mfungade gha BWANA ghizighanagha ndoenyi kose.”#Wuf. 5.6 11Niko ngamkotia, “Ihi mizeituni iwi iko chia ya mkonu ghwa kiwomi na ghwa kiwaka ghwa kinara cha taa kutambua kwaro niki?#Wuf. 11.4 12Na iri mbashu iwi ra mzeituni riko luwarunyi lwa mifereji iwi ya dhahabu edia mavuda kutambua kwaro niki?” 13Ukanizera, “Ndekutambukilwagha ni iri maza?” Ngaghamba, “Hata bwana.” 14Niko ukaghamba, “Awa ni waja wandu wawi wishingilo mavuda wipate kumdumikia BWANA wa ndoenyi kose.”
ទើបបានជ្រើសរើសហើយ៖
ZEKARIA 4: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.