MARKO 3
3
Mundu uko na mkonu ghukelemere
(Mat. 12.9-14; Lk. 6.6-11)
1Nao Jesu ukangia sena andenyi ya sunagogi, na ajaeni korekoghe na mundu uko na mkonu ghwake ghukelemere. 2Na wandu wamu wikamzighanira ngera um'boisa ituku ja Sabato, eri wipate kumshitakia. 3Jesu ukamzera uja mundu uko na mkonu ghwake ghukelemere, “Choo aha imbiri.” 4Niko ukawizera, “Keni ni hachi kubonya nicha ituku ja Sabato angu kubonya laghe-laghe? Kukira irangi angu kubwagha?” Nao wikanyama kima. 5Ukawizighana wose kwa machu, ukawawa ni ngolo kwa wundu ghwa awo kukaia na ngolo rikurie; ukamzera uo mundu, “Ghorua mkonu ghwako.” Nao ukaghughorua, na mkonu ghwake ghukaboa. 6Nao ahoeni Mafarisayo wikafuma wikabonya njama na Wanjama wa Herode, seji widimagha kum'bwagha Jesu.
Izungu ja wandu mbai na mbai ya ndiwa
7Jesu ukafuma na wanughi wake, ukaghenda cha ndiwenyi ya Galilaya, na izungu ibaa kufuma Galilaya jikawinugha. Wandu awo werekoghe wafuma Judea, Jerusalemu, 8Idumea na kimonu cha Jordani, na chia ra Tiro na Sidoni; izungu ibaa na ndighi. Wandu awo werechieghe kwa Jesu kwa kukaia weresikireghe maza rose orekoghe ukiribonya. 9Jesu ukawizera wanughi wake wimredie ishua, ukaie kakula kwa wundu ghwa wandu kukaia wengi, wisechemtindiria;#Mk. 4.1; Lk. 5.1-3 10angu orewiboisireghe wengi, hata wose werekoghe na makongo wikamtindiria wipate kumuadada. 11Na wandu werekoghe na pepo ra makakala iji wammbona, wikaghwa imbiri kwake wikikema na kughamba, “Oho ko Mwana wa Mlungu!” 12Nao ukarilaghira nandighi risakemmanyisha.
Jesu kusaghua wadumi ikumi na wawi
(Mat. 10.1-4; Lk. 6.12-16)
13Jesu ukajoka mghondinyi, ukawiwanga kwake awa orewikundieghe, nawo wikamghendia. 14Ukawisaghua ikumi na wawi wikaieghe andwamweri nao, nawo wori ukawiwanga “Wadumi”, uwidume noko kuchila, 15sena wikaie na nguma rewinga wandu pepo. 16Awo ikumi na wawi niwo awa: Simoni uo oremmbangieghe Petro, 17Jakobo na Johane mruna, Wana wa Zebedayo (ukawiwanga Boanerge, kutambua kwaro ni “Wana wa Lukuwa”). 18Andrea na Filipo, Bartholomayo, Mathayo, Tomasi, Jakobo mwana wa Alfayo, Thadayo, Simoni Mkanaani 19na Juda Iskarioti, uo oremfunyireghe Jesu.
Jesu na Beelizebuli
(Mat. 12.22-32; Lk. 11.14-23; 12.10)
20Nao Jesu ukaghenda cha mzinyi; na izungu jikamkwanyikia, hata uo moni na wanughi wake ndeweredimieghe hata kuja koni. 21Iji wakwawo Jesu wasikira malagho agho, wikafuma kwenda kummbwadia wikighamba, “Wawukwa ni isu.”
22Na walimu wa Sharia wereserieghe kufuma Jerusalemu, wikaghamba, “Oko na Beelizebuli, na kwa m'baa wa pepo niko wariwinga pepo.”#Mat. 9.34; 10.25 23Niko Jesu ukawiwanga, ukawizera kwa mifwano, “Welee, udima wada Shetani kukuwinga uo moni? 24Na wuzuri ghukareda mawaghanyiko, ndeghudimagha kumanga anduangi. 25Na muzi ghwa mundu ghukawaghanyika, ndeghudimagha kumanga. 26Na ngera Shetani wawaghanyika uo moni, wuzuri ghwake ndeghudimagha kumanga anduangi, ela ghuchakaia na kutua.
27“Mndungi ndedimagha kungia nyumba ya mundu uwadie ndighi, na kuwusa mali rake, ngera usemfungie kande uo mundu, niko aho uchaamsoka mali rake.
28“Namghoria loli, wadamu wichalekwa kaung'a rawo rose, na masholio ghawo ghose; 29ela uo uchaamsholia Roho Mweli, na jingi ndechaalekelwa anduangi; angu wabonya kaung'a iduagha kwa kala na kala.”#Lk. 12.10 30(Jesu oreghorieghe huwo angu weremzerieghe wei, “Wawadie pepo ya makakala.”)
Mae Jesu na waruna
(Mat. 12.46-50; Lk. 8.19-21)
31Nao mae Jesu na waruna, wikamchea; nawo wikakaia kimusi shighadi, wikamdumia mundu ummbange. 32Na izungu jiko kidombo jammaria chia rose, wikamzera, “Mayo na wanyinyu weko shighadi, wawuyakulola.” 33Jesu ukawitumbulia, “Mao na wanidu ni weke ani?” 34Aho ukawizighana awo weremmarieghe chia rose, ukaghamba, “Zighanenyi! Awa niwo mao na wanidu. 35Angu uo ose ulubonyagha lukundo lwa Mlungu, nuo moni mwanidu wa womi, na mwanidu wa waka na mao.”
ទើបបានជ្រើសរើសហើយ៖
MARKO 3: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.