MARKO 2
2
Jesu kum'boisa mkelemeri wa kupooza
(Mat. 9.1-8; Lk. 5.17-26)
1Nyuma ya matuku ghamu, Jesu ukawuya sena Kafarnaumu, wandu wikasikira angu oko nyumbenyi. 2Wandu wengi wikakwanyika, hata wulalo ghungi ghokaia ghukasoweka hata mmnyangonyi koni. Nao iji orekoghe ukiwichilia jija Ilagho Jiboie, 3wikacha wandu wikimredia mkelemeri wa kupooza, wadukwa ni wandu bana. 4Kwa wundu ghwa wandu kukaia wengi, wikalemwa ni kuvika kwake, wikavuchua nyumba naighu ya andu Jesu orekoghe, hata iji wameria kuturua wulalo ghukate, wikamsera uja mkelemeri walalia ghuja wuli. 5Nao iji Jesu wawona irumirio jawo, ukamzera uja mkelemeri, “Mwanwapo, kaung'a rako ralekwa!”
6Ela walimu wamu wa Sharia werekoghe kidombo ahoeni wikaririkanya ngolonyi kwawo: 7“Kwaki mundu uhu waghora huwu? Wamsholia Mlungu! Nani udimagha kulekia wandu kaung'a ela umweri, nao ni Mlungu moni?” 8Shwa wori Jesu ukamanya maghesho ghawo sa iji wawuyaririkanya, ukawizera, “Kwaki mwaririkanya huwo ngolonyi konyu? 9Iji jiangue ni jiao, ni kughora, ‘Kaung'a rako ralekwa’, angu ni kughamba, ‘Wuka, kughuduke wuli ghwako, kwende?’ 10Ela nakunde mmanye angu Mwana wa Mdamu oko nandighi andoenyi releka kaung'a.” Ukamzera uja mkelemeri, 11“Nakuzera, wuka kughuduke wuli ghwako, kughale!” 12Nao ahoeni ukawuka, ukaghuduka wuli ghwake, ukafuma imbiri ya wose, hata wikashinika, wikamkasa Mlungu wikighamba, “Na jingi ndediwonie huwu anduangi.”
Kuwangwa kwa Lawi
(Mat. 9.9-13; Lk. 5.27-32)
13Jesu ukafuma sena, ukaghenda mbai-mbai ya ndiwa, na izungu jose jikamchea; nao ukawifundisha. 14Nao ukiida, ukammbona Lawi wa Alfayo uko kidombo ofisi efunyira wushuru, ukamzera, “Ninughe!” Nao ukawuka, ukamnugha.
15Nao ikakaia iji Jesu orekoghe kidombo ukija vindo nyumbenyi kwa Lawi, wawadi wushuru wengi na wakaung'a wereseanyeghe kidombo na Jesu andwamweri na wanughi wake, angu werekoghe wengi weremnughieghe. 16Na walimu wa Sharia wa Kifarisayo iji wammbona Jesu ukijanya na wakaung'a na wawadi wushuru, wikawikotia wanughi wake, “Kwaki ujanyagha chiaimweri na wawadi wushuru na wakaung'a?” 17Iji Jesu wasikira, ukawizera, “Awa wiko banana ndewikunde mghanga ungi, ela awa wiko wakongo. Serechieghe kuwanga wahachi anduangi, ela wakaung'a.”
Ikoto aighu ya kufunga tumu
(Mat. 9.14-17; Lk. 5.33-39)
18Ngelo imu, wanughi wa Johane na Mafarisayo werekoghe wikifunga tumu. Wandu wamu wikacha, wikamkotia Jesu, “Welee, kwaki wanughi wa Johane na wa Mafarisayo wifungagha tumu, ela wanughi wako ndewifungagha anduangi?” 19Jesu ukawizera, “Welee, wandu wiwangilo harusinyi widima wada kufunga iji bwana-arusi ukwanye nawo? Ngelo iyo yose wikwanye na bwana-arusi, ndewidimagha kufunga anduangi. 20Ela matuku ghichacha, na bwana-arusi uchafunywa kwawo, niko aho wichafunga.
21“Ndekuwadie mndungi udunganyagha kiraka cha nguwo mbishi na irasi, angu ukadunganya, chija kiwishi chikoghe chibwaghe ilanga, chichanona jija irasi, na ilanga jichachurikia. 22Hata ndekuwadie mndungi udungiriagha divei mbishi andenyi ya viriba va kala, angu ukadungiria, ija divei ichavibara vija viriba, na divei ichadika, na viriba vichanoneka; ela wadadungiria divei mbishi andenyi ya viriba viwishi.”
Ikoto aighu ya Sabato
(Mat. 12.1-8; Lk. 6.1-5)
23Ituku jimu ja Sabato, Jesu orekoghe ukiidia mbuwa ya ngano, na wanughi wake wikighenda, wikazoya kudema vanga va ngano.#Wuk. 23.25 24Mafarisayo wikamzera, “Zighana! Kwaki wibonyagha maza ririghidwagha kubonywa ituku ja Sabato?” 25Jesu ukawitumbulia, “Welee, jingi ndemshomie seji orebonyereghe Daudi iji oresowieghe kindo chingi cheja? Uo, chiaimweri na awo werekwanyeghe, wiendazughwa,#1 Sam. 21.1-6 26orengirieghe andenyi ya nyumba ya Mlungu, ukaja ija mikate erefunyiroghe kwa Mlungu, matuku gha Mkohani M'baa Abiathari; nayo yadarighidwa kujighwa ni mndungi, ela wakohani weni. Uo ukaija, sena ukawineka waja werekwanyeghe nao.”#Wal. 24.9 27Niko ukawizera, “Sabato erewikiloghe kwa wundu ghwa wadamu, ela si wadamu kwa Sabato anduangi. 28Niko huwu Mwana wa Mdamu ni Bwana hata wa Sabato wori.”
ទើបបានជ្រើសរើសហើយ៖
MARKO 2: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.