MATHAYO 9
9
Jesu kum'boisa mkelemeri wa kupooza
(Mk. 2.1-12; Lk. 5.17-26)
1Niko Jesu ukangia ishuonyi, ukaruwuka ija ndiwa ukacha kwa muzi ghwake ghoni. 2Nao wandu wamu wikamredia mkelemeri wa kupooza walala wulinyi. Jesu uendawona irumirio jawo ukamzera uja mkelemeri, “Kaia na ngolo mwanwapo, kaung'a rako ralekwa.” 3Walimu wamu wa Sharia wikazoya kuririkanya, “Mundu uhu uamsholia Mlungu!” 4Nao Jesu ukimanya maririkanyo ghawo ukaghamba, “Kwaki mgheshagha mawiwi ngolonyi konyu? 5Iji jiangue kughora ni jiao? Ni kughamba ‘Kwalekwa kaung'a rako’ angu ni kughamba, ‘Wuka kwende?’ 6Ela nakunda mmanye angu Mwana wa Mdamu wawadie nguma relekia wandu kaung'a wurumwengunyi.” Niko ukamzera uja mkelemeri, “Wuka kughuduke wuli ghwako kwende nyumbenyi kwako.” 7Nao uja mkelemeri wa kupooza ukawuka ukaghenda nyumbenyi kwake. 8Wandu wose izungunyi iji waghiwona agho, wikaobua na kumkasa Mlungu uo orewinekieghe wadamu iro nguma.
Kuwangwa kwa Mathayo
(Mk. 2.13-17; Lk. 5.27-32)
9Nao Jesu ukafuma aja, hata iji orekoghe ukiida, ukammbona mmbwadi wushuru umu uwangwagha Mathayo, wasea kidombo ofisinyi kwake; ukamzera, “Ninughe.” Nao ukawuka ukamnugha.
10Hata iji Jesu orekoghe ukija vindo nyumbenyi, wawadi wushuru wengi na wakaung'a wikacha, wikaseanya kidombo nao andwamweri na wanughi wake.#Lk. 15.1-2 11Mafarisayo wiendawona agho wikawizera wanughi wake, “Kwaki Mwalimu onyu ujanyagha na wawadi wushuru na wakaung'a?” 12Jesu uendasikira agho ukaghamba, “Awa wiko banana ndewikunde mghanga ungi, ela ni awa wiko wakongo. 13Ghendenyi mkufundishe kutambua kwaro malagho agha: ‘Neekunda wughoma si kizongona kungi.’ Serechieghe kuwiwanga wandu wecha anduangi, ela wandu wa kaung'a.”#Mat. 12.7; Hos. 6.6
Ikoto aighu ya kufunga tumu
(Mk. 2.18-22; Lk. 5.33-39)
14Nao wanughi wa Johane wikamghendia Jesu wikamkotia, “Kwaki isi na Mafarisayo difungagha tumu kalazi koni, ela wanughi wako ndewifungagha anduangi?” 15Jesu ukawitumbulia, “Welee, awa wiwangwagha arusinyi wadima kukaia na wasi iji bwana arusi ukwanye nawo? Hata! Ela ngelo bwana arusi wainjwa kwawo, ngelo iyo niko wichaafunga.
16“Wandu ndewikumbagha kiraka cha nguwo mbishi kwa irasi, angu chija kiraka chicharashua jija irasi, na jija ilanga jichachurikia. 17Hata wandu ndewidungiriagha divei mbishi kwa viriba va kala. Wikabonya huwo, viriba vichabarika na divei ichadika na viriba vichanoneka. Ela wandu wadadungiria divei kwa viriba viwishi, na vose vichakaia banana.”
Mwai wa M'baa umu na muka umu kuboiswa
(Mk. 5.21-43; Lk. 8.50-56)
18Nao iji Jesu orekoghe ukighora agho, m'baa umu Myahudi ukacha ukimghoghomia ukamzera, “Mwai wapo wameria kufwa idakoni; ela nakulomba kuche kummbikirie mkonu ghwako, nao uchakaia moyo.” 19Niko Jesu ukawuka andwamweri na wanughi wake ukamnugha.
20Nao muka umu, orekoghe ukifumwa ni bagha miaka ikumi na iwi, ukacha nyuma ya Jesu ukaadada kidambi cha nguwo yake; 21ukibonya huwo oreririkanyireghe, “Ngamuadada nguwo yake eni nichaboa.” 22Nao Jesu ukaghaluka ukammbona ukamzera, “Mwai, kaia na ngolo, irumirio jako jakuboisa.” Nao uja muka ukaboa saa ija cheni.
23Jesu uendacha nyumbenyi kwa uja m'baa orewiwonieghe wakabi misherembe na izungu ja wandu wikibonya nganyi, 24ukawizera, “Injikenyi aha mmbose, mwai uhu ndefue kungi, ela waalala.” Nawo wikamseka. 25Nyuma ya wandu kufunywa shighadi, Jesu ukangia andenyi ukammbwada mkonu ukammbusira. 26Malagho agho ghikaereshwa isangenyi kose.
Jesu kuboisa vitungure viwi
27Hata iji Jesu orekoghe ukifuma aja, ukanughwa ni vitungure viwi wikikema na kughamba, “Kudifue wughoma ee Mwana wa Daudi.” 28Nao iji Jesu wangia nyumbenyi, vija vitungure viwi wikamghendia, nao moni ukawikotia, “Welee, mwarumiria angu nadima kubonya ilagho ijo?” Wikamtumbulia, “Ee Bwana.” 29Niko Jesu ukawiadada meso ghawo ukaghamba, “Ndeikaie sa iji koni mwarumiria.” 30Meso ghawo ghikatambuka. Nao ukawilaghira na ndighi, “Msemghorie mndungi ilagho iji.” 31Ela awo wikafuma na kughieresha malagho ghaja isangenyi kose.
Jesu kum'boisa kituri
32Nao iji wandu werekoghe wikighenda chia rawo, wamu wikamredia mundu umu orekoghe kituri, angu orekoghe na pepo izamie. 33Hata nyuma ya ija pepo kumfuma, uja mundu ukazoya kudeda nicha. Wandu wikashinika wikaghamba, “Jingi ndediwonie ilagho sa iji kwa Israeli anduangi!” 34Ela Mafarisayo wikaghora, “Wadariwinga pepo kwa ndighi ra m'baa wa pepo.”#Mat. 10.25; 12.24; Mk. 3.22; Lk. 11.15
Jesu kuwadwa ni wughoma ghwa wandu
35Nao Jesu ukaghenda mizi yose mibaa na mitini, ukifundisha andenyi ya sunagogi rawo na kujichila Ilagho Jiboie ja wuzuri ghwa Mlungu; ukaboisa makongo na manyonge gha mbari rose.#Mat. 4.23; Mk. 1.39; Lk. 4.44 36Nao iji wawizighana wandu, ukawiwona wasirimwa na kusaghisika, ukawadwa ni wughoma angu werekoghe sa ng'ondi risewadie mlisha ungi.#Mit. 27.17; 1 Waz. 22.17; 2 Mal. 18.16; Eze. 34.5; Mk. 6.34 37Ukawizera wanughi wake, “Mvono ni mungi, ela wabonyi kazi ni watini.#Lk. 10.2 38Mlombenyi Bwana wa mvono uwidume wabonyi kazi kwa mvono ghwake.”
ទើបបានជ្រើសរើសហើយ៖
MATHAYO 9: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.
