MATHAYO 10
10
Wadumi ikumi na wawi
(Mk. 3.13-19; Lk. 6.12-16)
1Jesu ukawiwanga wanughi wake ikumi na wawi, ukawineka ndighi rewinga roho ra makakala na kuboisa makongo gha mbari rose. 2Marina gha wadumi ikumi na wawi nigho agha: Wa imbiri Simoni uwangwagha Petro, na Andrea mruna, Jakobo na Johane wana wa Zebedayo; 3Filipo na Bartholomayo, Tomasi na Mathayo orekoghe mmbwadi wushuru, Jakobo mwana wa Alfayo na Thadayo; 4Simoni Mkanaani na Juda Iskarioti, nuo oremfunyireghe Jesu.
Jesu kuwiduma wadumi ikumi na wawi
(Mk. 6.7-13; Lk. 9.1-6)
5Awa ikumi na wawi Jesu ukawiduma ukiwilaghira, “Msakeghenda kwa wandu wa mbari zima, hata msakeghenda muzi ghungi ghwa Wasamaria. 6Ela muwighendie wandu wilagharie sa ng'ondi wa Israeli. 7Nenyo mkighenda chilenyi, ‘Wuzuri ghwa Mlungu ghwavika kaavui.’#Lk. 10.4-12 8Wiboisenyi wakongo, wirukishenyi wafu, wieleshenyi awo wiko na sima, riwingenyi pepo. Mwanekelo duu, mfunye duu. 9Msakedwa dhahabu andenyi ya mifuko enyu, hata feza angu magome. 10Msakedwa mfuko ghwa charonyi, angu makoti awi, angu vadu, angu mzata. Angu m'bonyi kazi wafwana kunekwa mafungu ghake.#1 Wakor. 9.14; 1 Tim. 5.18 11Mkangia muzi ghungi m'baa angu mtini, mzighane ngera oko mndungi uko tayari kumkaribisha, mpate kukaia ahoeni hata mwafuma ugho muzi. 12Iji mwangia nyumba ingi ghambenyi, ‘Sere ndeikaie konyu.’ 13Iji wandu wa nyumba iyo wamkaribisha, sere enyu ndeikaie kwawo; ela ikakaia walegha kumkaribisha, sere enyu ichammburia. 14Ngera mndungi walegha kumkaribisha angu kusikira malagho ghenyu, iji mwakafuma iyo nyumba angu ugho muzi, mghughuduo teri ya maghunyi konyu.#Mab. 13.51 15Namghoria loli, Ituku ja Kutanywa, muzi ugho ghuchakabwa kuchumba mizi ya Sodoma na Gomora.#Mat. 11.24; Kuz. 19.24-28
Kucha kwa matiriro
(Mk. 13.9-13; Lk. 21.12-17)
16“Idana ini niamduma sa ng'ondi aghadi ya vikwau, mkaie na akili sa choka, na wa mboa sa mbughi.#Lk. 10.3 17Mkulindie na wadamu, angu wichamghenja mandunyi nawo wichamkaba na viboko andenyi ya sunagogi rawo.#Mk. 13.9-11; Lk. 12.11-12; 21.12-15 18Mchaghenjwa imbiri ya awo wibonyagha nguma na wazuri kwa wundu ghwapo; mpate kujichila ijo Ilagho Jiboie kwawo na kwa mbari zima wori. 19Ela iji wamghenja mandunyi, msekambo ni chongo wei mghora wada; angu ngelo yaro ikavika, mchanekwa gha kughora. 20Angu malagho mchaaghora si ghenyu ghangi, ela ni gha Roho wa Ndeyo onyu uko andenyi konyu.
21“Mundu uchamfunya mruna ubwagho, na ndee mwana uchamfunya mwana wake, wana wichawighalukia wavi wawo na kuwifunya wibwagho.#Mk. 13.12; Lk. 21.16 22Mchazamia wandu wose kwa wundu ghwa irina japo. Ela uo uchaarumaghia hata kutua, uchakia.#Mat. 24.9,13; Mk. 13.13; Lk. 21.17
23“Iji wandu wamtirira andenyi ya muzi ghumu, mughughendie muzi mzima. Namghoria loli, ndemchaameria mizi yose ya Israeli, imbiri Mwana wa Mdamu usechee.
24“Mnughi ndekaiagha m'baa kumchumba mwalimu wake, hata mdumiki ndekaiagha m'baa kumchumba bwana wake anduangi.#Lk. 6.40; Joh. 13.16; 15.20 25Yamkata mnughi kukaia sa mwalimu wake na mdumiki sa bwana wake. Ikakaia wammbanga m'baa wa nyumba Beelizebuli, wichachumba saki kuwiwanga marina ghizamie awo wa kinyumba chake.#Mat. 9.34; 12.24; Mk. 3.22; Lk. 11.15
Uo ufwane kuobolwa
(Lk. 12.2-7)
26“Kwa huwo msakewiobua awo wandu. Ndekuwadie kindo chingi chifinikiro chisechaafunukulwa, hata kilambo chingi chivisiro chisechaawonyerwa worinyi anduangi.#Mk. 4.22; Lk. 8.17 27Ijo nimghoriagha kirenyi, mujighore mwengerenyi; na ijo mhohorelwagha, mujichile aighu nyumbenyi. 28Msakewiobua awa wibwaghagha mumbi wisedimagha kubwagha roho; ela muobuonyi uo udimagha kubwagha roho na mumbi kwa jehanamu. 29Mbeumbeu iwi ndaradauzwa kwa igome jimweri? Ela hata huwo saki, ndekuwadie ingi yaro ipotokagha andoenyi Ndeyo onyu userumirie anduangi. 30Nenyo hata maridia gha vongonyi konyu ghatalilo putu. 31Kwa huwo msakewiobua, inyo moko wa zoghori kuchumba mbeumbeu nyingi.
Kurumiria na kumkana Kristo
(Lk. 12.8-9)
32“Kwa huwo, uo ose uchaanirumiria imbiri ya wandu kukaia ni wapo, ini wori nichamrumiria imbiri ya Aba uko mlungunyi. 33Ela uo uchaanikana imbiri ya wandu, ini wori nichamkana imbiri ya Aba uko mlungunyi.#2 Tim. 2.12
Matengano
(Lk. 12.51-53; 14.26-27)
34“Msakeghesha wei nedecha kureda sere ndoenyi. Serechieghe kureda sere ela ni lufu. 35Angu necha kureda mawaghanyiko aghadi ya mwana na ndee, mwai na mae, mkamwana na mkekwake.#Mik. 7.6 36Na wamaiza wa mundu wichakaia awo wandu wa nyumbenyi kwake.
37“Uo umkundagha ndee angu mae kuchumba ini, ndenifwanaghaanduangi; na uo umkundagha mwana wa womi angu wa waka kuchumba ini, ndenifwanagha anduangi. 38Uo usedukagha msalaba ghwake na kuninugha ndenifwanagha anduangi.#Mat. 16.24; Mk. 8.34; Lk. 9.23 39Uo ulolagha kujikira irangi jake uchajilaghasha, ela uo ujilaghashagha irangi jake kwa wundu ghwapo uchajipata.#Mat. 16.25; Mk. 8.35; Lk. 9.24; 17.33; Joh. 12.25
Mafungu
(Mk. 9.41)
40“Uo umkaribishagha inyo, waanikaribisha ini, na uo unikaribishagha ini, waamkaribisha uo orenidumieghe.#Mk. 9.37; Lk. 9.48; 10.16; Joh. 13.20 41Uo umkaribishagha mlodi angu uko mlodi, uchapata mafungu gha mlodi; na uo umkaribishagha mundu ubonyagha hachi angu uko mhachi, uchapata mafungu gha mundu wa hachi. 42Na uo ose uchaamneka umu wa awa watini hata kikombe cha machi gha mbeo, angu wakaia mnughi wapo, ndechaasowa mafungu ghake anduangi.”
ទើបបានជ្រើសរើសហើយ៖
MATHAYO 10: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.
