MATHAYO 18
18
Nani uko M'baa?
(Mk. 9.33-37; Lk. 9.46-48)
1Ngelo iyo wanughi wikamchea Jesu wikamkotia, “Nani uko m'baa kwa wuzuri gha Mlungu?”#Lk. 22.24 2Jesu ukawanga mwana mtini ukammbika kimusi aghadi kwawo, 3ukawizera, “Namghoria loli, ngera mseghalukagha na kuwuya sa wanake watini, jingi ndemchaangia kwa wuzuri ghwa mlungunyi anduangi.#Mk. 10.15; Lk. 18.17 4Uo ose uchaakusera karakara na uhu mwana mtini, nuo moni m'baa kwa wuzuri ghwa mlungunyi. 5Na uo ose umkaribishagha mwana mtini sa uhu kwa irina japo, wanikaribisha ini.
Makuwisho
(Mk. 9.42-48; Lk. 17.1-2)
6“Ngera mndungi wamshekeria umu wa awa watini winirumiriagha ubonye kaung'a, ichakaia nicha uo ufungo igho ibaa jesha singonyi kwake, uvululisho andu kumilie baharinyi. 7Ni bugha kwa wurumwengu kwa wundu ghwa matimo ghishekeriagha kubonya kaung'a. Ni suti makuwisho ghiche, ela ni bugha kwake uo mundu ushekeriagha matimo ghiche!
8“Ngera mkonu ghwako angu kughu kwako kuakushekeria kubonye kaung'a, kukudumbuo kukude noko. Ikaia baa kungie iranginyi kusewadie mkonu angu kughu kumu, kuchumba kukaia na mikonu angu na maghu awi nao kukumbo modonyi ghwa kala na kala.#Mat. 5.30 9Ngera iriso jako jakushekeria kubonye kaung'a, kujide noko; ikaia baa oho kungie iranginyi kifondo, kuchumba kukaia na meso awi, nao kukumbo jehanamunyi ya modo.#Mat. 5.29
Mfwano ghwa ng'ondi ilagharie
(Lk. 15.3-7)
10“Mkulindie msemmenye ungi wa awa watini; angu namghoria, weke malaika wawo aho mlungunyi ngelo rose wadaghuzighana wushu ghwa Aba uko mlungunyi. [ 11Angu Mwana wa Mdamu odeecha kukira icho cherelagharieghe.]#Lk. 19.10 12Mmbona wada mundu ukakaia na ng'ondi ighana, nao ulaghashe imweri, ndechaasigha rija mirongo ikenda na ikenda mghondinyi, ughende kuilola ija imweri ilagharie anguwada? 13Hata iji waiwona, kwa loli namghoria, waboilwanya na ihi ng'ondi imweri kuchumba rija mirongo ikenda na ikenda riselagharie. 14Huwo koni Ndeyo onyu uko mlungunyi ndeboilwagha wei umu wa awa watini ulaghaye anduangi.
Mwanidu ubonyagha kaung'a
15“Iji mwanyinyu wakubonyera kaung'a, ghenda kummbonyere ikosa jake muko wawi. Ukakusikira, kwampata mwanyinyu.#Lk. 17.3 16Iji walegha kukusikira kudo mundu umweri angu wawi, eri ilagho jimangisho kwa wushuhuda ghwa washahidi wawi angu wadadu.#Wuk. 19.15 17Ikakaia na awo ndeuwisikiragha, kujighorie ikanisa, nao ngera walegha kujisikira hata ikanisa, kumtale sa mundu wa mbari zima, na sa mmbwadi wushuru.
Kufunga na kufungua
18“Namghoria loli, ijo jose muchaajifunga ndoenyi jichafungika mlungunyi, na ijo jose mchaajifungua ndoenyi, jichafungulwa mlungunyi.#Mat. 16.19; Joh. 20.23 19Sena namghoria inyo, ngera wawi wenyu wapatana ndoenyi kulomba ilagho jingi, Aba wa mlungunyi uchawibonyera ilagho ijo. 20Angu wawi angu wadadu wikakwanyika kwa irina japo, na ini nichakaia ahoeni andwamweri nawo.”
Mfwano ghwa mdumiki usefuyagha wazima wughoma
21Niko aho Petro ukamchea Jesu ukamkotia, “Bwana, mwanidu unibonyere kaung'a kalinga ngimfuya wughoma? Ni mando mfungade anguwada?”#Lk. 17.3-4 22Jesu ukamtumbulia, “Sikuzeraa wei ni mandu mfungade, ela ni mirongo mfungade mandu mfungade. 23Niko huwu wuzuri ghwa mlungunyi ghwafanana na mzuri umu orekundieghe kulawua mitalo ya wadumiki wake. 24Hata iji wazoya kulawua, ukaredelwa umu orekoghe na sile yake talanto elfu ikumi. 25Ela uja mdumiki nderekoghe na kilambo chingi chemlipa anduangi; kwa huwo bwana wake ukafunya momu uo mdumiki uuzo, na mkake, na wana wake, chiaimweri na vilambo vake vose orekoghe navo upate kuilipa ija sile. 26Nao uja mdumiki ukamdungia ngokoro ukilomba, ‘Kurumaghianye nani ee Bwana, nani nichakulipa rose.’ 27Niko uja bwana ukawadwa ni wughoma, ukamleka ija sile yose, ukamsigha ughende chia yake.
28“Ela uja mdumiki ukafuma ukamkua umu wa wadumiki wambao uko na sile yake ya dinari ighana jimweri; ukammbwada ukawoka kumnyora ukighamba, ‘Nilipe sile yapo.’ 29Nao uja mdumiki mmbao ukamdungia ngokoro ukamlomba ukighamba, ‘Kurumaghianye nani na ini nichakulipa.’ 30Ela ukamleghia, ukaghenda na kumngira kifungonyi hata wameria kuilipa ija sile. 31Niko waja wadumiki wambao iji wawona agho ghibonyekie, wikawawa na ndighi; wikaghenda na kumghoria bwana wawo agho ghose gherebonyekieghe. 32Nik uja bwana ukammbanga uja mdumiki ukamzera, ‘Oho ko mdumiki uzamie na ndighi! Korenivoyeghe nani ngakulekia ija sile yose. 33Welee, ndeerekufwaneghe na oho kumfuye wughoma mdumiki mmbenyu sa iji nerekufuyeghe wughoma anguwada?’ 34Niko kwa kuwawa nandighi uja bwana ukafunya momu uja mdumiki ungiro kifungonyi, hata wameria kuilipa ija sile yose. 35Ni huwo koni Aba uko mlungunyi ndechaamleka inyo, ngera mselekanagha mmbeni na mmbeni kwa ngolo renyu rose.”
ទើបបានជ្រើសរើសហើយ៖
MATHAYO 18: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.
