MATHAYO 17
17
Jesu kughaluka fwana
(Mk. 9.2-13; Lk. 9.28-36)
1Nao nyuma ya matuku arandadu, Jesu ukawidwa Petro, Jakobo, na Johane mruna; ukawidwa weni wiekeri aighu ya Mghondi m'baa.#2 Pet. 1.17-18 2Nawo wikimzighana, ukaghaluka fwana yake; wushu ghwake ghukang'ala-ng'ala sa iruwa, na marwao ghake ghikawuya gha chokwa sa mwengere. 3Waja wanughi wikawiwona Musa na Elija wikidedanya na Jesu. 4Niko Petro ukamzera Jesu, “Bwana, yaboie saki angu isi diko aha? Kukakunda, nichaagha viwanda vidadu; chimu chikaie chako, chimu cha Musa, na chimu cha Elija.” 5Nao iji orekoghe ukighora agho, iwingu ja chokwa jikawifinikira, na lwaka lukasikirika andenyi ya ijo iwingu, “Uhu ni Mwana wapo mkundwa, uniboiagha loli-loli, msikirenyi.”#Kuz. 22.2; Wuk. 18.15; Zab. 2.7; Isa. 42.1; Mat. 3.17; 12.18; Mk. 1.11; Lk. 3.22 6Nao iji wanughi wasikira agho, wikaghwa kiwushu-wushu wikiobua na ndighi. 7Jesu ukawighendia ukawiadada ukighamba, “Wukenyi, msakeobua.” 8Hata iji wawuka na kuzighana, ndewerewonieghe mndungi ela Jesu uekeri.
9Nao iji werekoghe wikisea kufuma mghondinyi, Jesu ukawilaghira, “Msakemghoria mndungi maza ra mawono agha hata Mwana wa Mdamu wameria kuruka kufuma kwa wafu.” 10Wanughi wake wikamkotia, “Keni kwaki walimu wa Sharia wighambagha wei suti Elija uche kande?”#Mlk. 4.5 11Jesu ukawitumbulia, “Loli Elija uacha, nao uchawika maza rose nicha. 12Ela namghoria angu Elija wamerie kucha, na wandu ndeweremmanyireghe anduangi, wikam'bonya sa iji koni werekundieghe. Ni huwo koni wichamtirira Mwana wa Mdamu.”#Mat. 11.14 13Niko aho wanughi wikatambua angu orekoghe ukiwighoria malagho gha Johane M'baputizi.
Jesu kum'boisa mwana uko na pepo
(Mk. 9.14-29; Lk. 9.37-43a)
14Hata iji wajiwuria sena jija izungu ja wandu, mndumu ukamghendia Jesu ukamdungia ngokoro, 15ukaghamba, “Bwana, mmbonie wughoma mwana wapo, angu wadadumbuka na kuja wasi na ndighi; ngelo nyingi wadaghuya modonyi angu machinyi. 16Ngamreda kwa wanughi wako, ela ndeweredimieghe kum'boisa.” 17Jesu ukatumbulia, “Inyo kivalwa chisewadie irumirio, chilagharie; nichakaianya nenyo hata lii? Nicharumaghianya nenyo hata lii? Mredenyi uo mwana kwapo.” 18Nao Jesu ukaikemia ija pepo, nayo ikamfuma na uja mwana ukaboa saa ija cheni.
19Niko wanughi wikamghendia Jesu kivisonyi wikamkotia, “Kwaki isi diseredimieghe kuiwinga ija pepo?” 20Jesu ukawitumbulia, “Ni kwa wundu ghwa wutini ghwa irumirio jenyu. Kwa loli ngera modeeka na irumirio jing'ane sa ndembe ya haradali, kumangu mwaghuzera mghondi ughu, ‘Injika aha kughende aja,’ nagho ghuchamsikira. Hata kumangu ndekuwadie kilambo chingi chisedimikagha konyu anduangi.#Mat. 21.21; Mk. 11.23; 1 Wakor. 13.2 [ 21Ela mbari ihi yadafunywa ni malombi na kufunga tumu.”]
Jesu kughora sena aighu ya kifwa chake
(Mk. 9.30-32; Lk. 9.43b-45)
22Hata iji werekwaneghe chiaimweri aja Galilaya, Jesu ukawizera, “Mwana wa Mdamu uchafunywa kwa wandu. 23Wicham'bwagha, ela ituku ja kadadu ucharuka.” Wanughi wake wikangilwa ni wasi loli-loli.
Kulipa mchango ghwa Hekalu
24Hata iji wavika Kafarnaumu, waja wandu wilombagha mchango ghwa Hekalu wikamkotia Petro, “Welee, Mwalimu onyu walipagha mchango ghwa Hekalu?”#Kuf. 30.13; 38.26 25Petro ukawitumbulia, “Ee walipagha.” Nao iji wangia nyumbenyi, Jesu ukazoya kumkotia, “Wele Simoni, keni wazuri wa ndoenyi wadalomba wushuru angu kodi kwa wana wawo angu kwa wandu wazima?” 26Nao iji waghora, “Kwa wandu wazima,” Jesu ukamzera, “Ikakaia ni huwo, basi wana weko huru. 27Ela disakewikuwisha; ghenda ndiwenyi, kukumbe kiloo; iji kwawada samaki ya imbiri, na kuitambarua momu ghwake, kuchapata pesa shekeli imweri; nao kuwineke kwa wundu ghwapo na ghwako.”
ទើបបានជ្រើសរើសហើយ៖
MATHAYO 17: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.
