LUKA 2

2
Kuvalwa kwa Jesu
(Mat. 1.18-25)
1Matuku ghaja, itangazo jerefumieghe kwa Kaisari Augusto, angu wandu wose wa wuzuri ghwake wiandikisho. 2Nako korekoghe kuandikishwa kwa imbiri, iji Kuirinio orekoghe m'baa wa Siria. 3Wandu wose wikaghenda kuandikishwa, kula umu kwa muzi ghwake. 4Na Josefu wori wa muzi ghwa Nazareti, ukajoka kufuma Galilaya kwenda Judea muzi ghwa Daudi, ghuwangwagha Bethlehemu, angu orekoghe wa kivalwa cha Daudi; 5uandikisho andwamweri na mchumba wake Maria, nao orekoghe na kifu. 6Hata iji werekoghe aho, matuku ghake gheva ghikakatia. 7Ukava mwana wake wa imbiri wa womi, ukamrighiria nguwo ra kiwanake, ukamrarisha andu mfugho rijiagha kiwandenyi, angu ndekorekoghe na wulalo ghungi nyumbenyi kwa waghenyi anduangi.
Walisha na weke malaika
8Andenyi ya isanga jija jeni, korekoghe na walisha mlambenyi, wikilindia mfugho rawo nakio. 9Nao malaika wa Bwana ukawifutukia, na wubaa ghwa Bwana ghukang'ala-ng'ala chia rose kwawo, nawo wikaobua nandighi. 10Malaika ukawizera, “Msakeobua, angu namredia inyo malagho mecha gha kuboilwa kubaa kuchaakaia kwa wandu wose; 11angu idime koni, Mkiri wavalwa kwa wundu ghonyu mzinyi kwa Daudi, na ni Kristo Bwana. 12Na ihi niyo alama emmbonyera, mchakiwona kana kakoo karighirilwa nguwo ra kiwanake, kararishwa andu mfugho rijiagha kiwandenyi.” 13Nao shwa jikawoneka izungu ja mlungunyi andwamweri na uja malaika, jikimkasa Mlungu na kughamba,
14“Wubaa ghukaie kwa Mlungu aighu na ndighi,
na sere andoenyi kwa wandu;
awo uboilwagha nawo!”
15Nao iji weke malaika wereghendighe noko cha mlungunyi kufuma kwawo, awo walisha wikazerana, “Nndokonyi dighende Bethlehemu, diriwone iro maza rakaia, iro damanyishwa ni Bwana.” 16Wikaghenda shwa-shwa, wikammbona Maria, Josefu, na kana kakoo kararishwa andu mfugho rijiagha kiwandenyi. 17Nao iji walisha wammbona, wikawighoria malagho ghose wereghoreloghe ni malaika gha uja mwana. 18Na wose weresikireghe wikashinika kwa agho wereghoreloghe ni walisha. 19Ela Maria ukaghiwika agho malagho ukighiririkanya ngolonyi kwake. 20Na walisha wikawuya wikimkasa Mlungu kwa agho ghose wereghisikireghe na kughiwona sa iji koni wereghoreloghe.
Jesu kunekwa Irina
21Hata iji ituku ja wunyanya jerevikieghe, wikamshamisha na kummbanga irina jake Jesu, sa iji koni jereghoreloghe ni malaika imbiri ya uo kuamwa kifunyi.#Wal. 12.3; Lk. 1.31
Jesu kughenjwa Hekalunyi
22Nao iji yavika ngelo ya kueleshwa kwawo, karakara na Sharia ya Musa, wikamreda Jerusalemu, kummbika kwa Bwana.#Wal. 12.6-8 23Sa iji koni iandikilo sharienyi kwa Bwana, “Kula mwana wa womi uzoyagha kuvalwa, uchafunywa kwa wudumiki ghwa Bwana,”#Kuf. 13.2,12 24na kufunya kizongona cha mbughi iwi, angu vana viwi va maringo, sa iji koni ighorelo sharienyi kwa Bwana.
Lumbo lwa Simeoni
25Nao ahoeni Jerusalemu, korekoghe na mundu uwangwagha Simeoni. Mundu uhu orekoghe mundu wa hachi umuobuagha Mlungu, nao orekoghe ukighuwesera ghuja wuhoreshi ghwa Israeli, na Roho Mweli orekoghe aighu kwake. 26Orekoghe wawonyerwa ni Roho Mweli angu ndechaawona kifwa anduangi, hata ummbone Kristo wa Bwana. 27Nao ukighenjwa ni Roho, Simeoni ukangia Hekalunyi; hata iji wavi wamreda uo mwana Jesu kum'bonyera karakara na Sharia, 28Simeoni ukamwambaria mikonunyi kwake ukamkasa Mlungu ukighamba,
29“Idana Bwana msighe mzumba wako ughende kwa sere,
kunughana na ijo Ilagho jako;
30angu meso ghapo ghakuwona kukia kwako,
31uko korekuboisireghe worinyi imbiri ya wandu wose.
32Mwengere ghowilangalishira wandu wa mbari zima,
na kwa wundu ghwa wubaa ghwa wandu wako Israeli.”#Isa. 42.6; 49.6; 52.10
33Ndee na mae wikashinika kwa wundu ghwa agho ghereghoreloghe aighu yake. 34Nao Simeoni ukawirasimia ukamzera Maria, mae mwana, “Ola mwana uhu wawikwa kwa wundu ghwa kughwa na kuwuka kwa wengi andenyi ya Israeli, na kwa alama etangalwa ni wandu; 35na luwawo lubirie sa lufu luchaidunga ngolo yako, eri maririkanyo gha ngolo ra wandu wengi, ghipate kufunukulwa.”
36Na aho korekoghe na mlodi wa waka, uwangwagha Ana mfwa Fanueli, wa mbari ya Asheri, ughosere na ndighi. Orekanyeghe na mumi kwa miaka mfungade nyuma ya kulowuana kwawo. 37Orekoghe na miaka mirongo wunyanya na inya, ukikaia muka ufulo ni mumi wake; nao orekoghe usefumagha Hekalunyi, ukitasa na kufunga tumu, na kulomba Mlungu kio na dime. 38Nao ukicha kwa saa ija cheni, ukamfunyira Mlungu chawucha, nao ukaghora malagho gha uo mwana worinyi kwa wose werekoghe wikikuweseria kuja kukombolwa kwa Jerusalemu.
Kuwuya kwawo Nazareti
39Hata iji wameria kubonya maza rose karakara na Sharia ya Bwana, wikawuya Galilaya, mzinyi kwawo koni Nazareti.#Mat. 2.23 40Nao uja mwana ukazoghua na kukaia na ndighi, uchuagha hikima; na mvono ghwa Mlungu ghorekoghe aighu kwake.
Uja mwana Jesu kusigharika Hekalunyi
41Wavi wake werekoghe wikighenda Jerusalemu kula mwaka kwa Ndima ya Pasaka.#Kuf. 12.1-27; Wuk. 16.1-8 42Nao iji orevikieghe irika ja miaka ikumi na iwi, wikajokanya karakara na mzango ghwawo; 43hata iji Ndima yameria kusia, wikazoya kughala; ela uja mwana Jesu ukasigharika na nyuma aja Jerusalemu. Na wavi wake ndewerejimanyireghe ilagho ijo anduangi, 44ela wedeeka wikighesha wei oko aeni charonyi. Nawo iji waghenda charo cha ituku jimweri, wikazoya kumlola kwa wakwawo na waghenyi wawo; 45hata iji wamsowa, wikawuya Jerusalemu wikimlola. 46Nao nyuma ya matuku adadu wikammbona Hekalunyi uko kidombo aghadi ya walimu, ukiwisikiria na kukotiana nawo makoto. 47Na wose weremsikireghe, wikashinika kwa uko kumanya kwake na uko kutumbulia kwake wori. 48Nawo iji wammbona wikashinika; mae ukamzera, “Wele mwanwapo, kwadibonyere kwaki huwu? Zighana seji ini na ndeyo dijie wasi dikikulola.”
49Ukawizera, “Kwaki morenilolagha? Welee, ndemmanyire angu yanifwana kukaia nyumbenyi kwa Aba?” 50Nawo ndeweretambukiloghe ni agho madedo orewizeragha anduangi. 51Nao ukaghendanya nawo hata Nazareti, ukakaia ukiwisikira, na mae ukaghiwika malagho agho ghose ngolonyi kwake. 52Jesu ukachurikia hikima na kuzoghua, ukikundwa ni Mlungu na wandu.#1 Sam. 2.26; Mak. 3.4

ទើបបានជ្រើសរើសហើយ៖

LUKA 2: TAITA

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល