LUKA 1
1
1Kwa kukaia wengi wamerie kukufunya wiandike malagho gha maza ribonyekie aghadi kodu, 2nawo wereandikieghe seji dighorelo ni wandu wijiwonie jija ilagho kwa meso ghawo kufuma imbiri, na kujidumikia; 3na ini wori ee Theofilo mucha, nawonie ni nicha nikuandikie kwa wuya, nyuma ya kughizighana nicha ghose kufuma imbiri; 4kupate kumanya loli yaro agho korefundishiroghe.
Matangazo gha kuvalwa kwa Johane M'baputizi
5Matuku gha Herode mzuri wa Judea, korekoghe na mkohani umu uwangwagha Zakaria, wa ifungu ja wukohani ghwa Abia, nao orekoghe na mkake, nao ni mwai wa kichuku cha wukohani ghwa Haruni, uwangwagha Elizabeti. 6Nawo wose werekoghe wandu wa hachi, wikighenda kwa kuiwadia Sharia na malaghiro gha Mlungu kuseko na ikosa jingi. 7Ela ndewerewadieghe mwana ungi, angu Elizabeti orekoghe kolowi; na sena wose werekoghe waghosia na ndighi.
8Ituku ja izughe jake, Zakaria orekoghe ukibonya wudumiki ghwake ghwa wukohani Hekalunyi imbiri ya Mlungu, 9karakara na mzango ghwa wukohani. Oresaghuloghe kwa kura ufukire marumba madhabahunyi andenyi ya Hekalu, karakara na mzango ghwa wukohani. 10Ngelo iyo efukira marumba, izungu jose ja wandu jerekoghe cha shighadi jikilomba Mlungu. 11Nao ahoeni ukafutukilwa ni malaika wa Bwana, ukakaia kimusi chia ya mkonu ghwa kiwomi ghwa madhabahu efukiria marumba. 12Hata iji Zakaria wammbona, ukangilwa ni kiture na kuobua. 13Ela uja malaika ukamzera, “Kusakeobua Zakaria, kwa kukaia malombi ghako ghasikirikie, na mkako Elizabeti uchakuvaia mwana wa womi, na oho kuchammbanga Johane.
14Na oho kuchakaia na iseko na kuboilwa,
na wengi wichaboilwa kwa kuvalwa kwake;
15angu uchakaia m'baa imbiri ya Bwana,
ndechaanywa divei hata kilambo chingi chewongera anduangi.#Mit. 6.3
Uchachulwa ni Roho Mweli
kufuma kifunyi kwa mae,
16nao uchawighalusa wengi wa wana wa Israeli,
wimghalukie Bwana Mlungu wawo.
17Uchaghenda imbiri kwake kwa roho nandighi ra Elija
upate kurighalusa ngolo ra weke ndee,
riwighalukie wana wawo.
Na awo wisesikiragha wiinughe hikima ya wahachi,
na kuwika wandu tayari kwa wundu ghwa Bwana.”#Mlk. 4.5-6
18Nao Zakaria ukamzera malaika, “Welee, nimanya wada ilagho iji? Angu ini ne mghosi, na muka wapo wori wakekua.” 19Malaika ukamtumbulia, “Ini ne Gabrieli, nikaiagha kimusi imbiri ya Mlungu, nani naadumwa nichekughoria oho malagho mecha.#Dan. 8.16; 9.21 20Nao ola, kuchakaia kituri kusededagha, hata ituku ijo maza iri richaakatia; angu kuserumirie malagho ghapo anduangi; nagho ghichakatishwa kwa kimu charo.” 21Wandu werekoghe wikimmbesera Zakaria wikashinika angu oremukieghe luma Hekalunyi. 22Hata iji wafuma nderedimieghe kudedanya nawo anduangi, nawo wikatambua angu wawona mawono Hekalunyi, ukakaia ukiwikunyiria, na kukaia kituri.
23Nao ngelo ya wudumiki ghwake iendasia, ukaghala cha nyumbenyi kwake. 24Nyuma ya matuku ghaja, mkake Elizabeti ukapata kifu, nao ukakaia nyumbenyi kwake koni kwa meri misanu, ukighamba, 25“Bwana wachanibonyera nicha kunizighana kwa ngelo yaro, na kuniinjira aibu nerekoghe nayo wandunyi.”
Matangazo gha kuvalwa kwa Jesu
26Nao mori ghwa karandadu ghwa kifu cha Elizabeti, malaika Gabrieli ukadumwa kufuma kwa Mlungu, kughenda muzi ghumu ghwa Galilaya ghuwangwagha Nazareti, 27kwa mwai uwangwagha Maria, orelowolwagha ni mndumu uwangwagha Josefu, wa kivalwa cha Daudi.#Mat. 1.18 28Malaika ukamchea ukimzera, “Sere ndeikaie kwako oho kunekelo mvono, Bwana oko andwamweri na oho!” 29Ela madedo agho ghikamsumbua ukighiririkanya kutambua kwaro. 30Nao malaika ukamzera, “Kusakeobua Maria, angu kwameria kupata mvono kwa Mlungu. 31Ola kuchakaia na kifu, kuve mwana wa womi, nao kuchammbanga irina jake Jesu.#Mat. 1.21
32Uchakaia m'baa,
nao uchawangwa Mwana wa Uo-Uko-Aighu-Nandighi;
na Bwana Mlungu uchamneka kifumbi cha nguma
cha ndee Daudi.#2 Sam. 7.12,13,16; Isa. 9.7
33Nao uchaibonyera nguma nyumba ya Jakobo
kwa kala na kala;
na wuzuri ghwake ndeghuchaakaia na
kutua kungi anduangi.”
34Maria ukamzera malaika,
“Ijo ilagho jikaia wada nani
niseichi mndwawomi ungi?”
35Malaika ukamzera,
“Roho Mweli uchakuchea aighu kwako,
nandighi ra Uo-Uko-Aighu-Nandighi
richakaia aighu kwako;
kwa huwu mwana uchaavalwa uchawangwa Mweli Mwana wa Mlungu.
36Kumanye na mwamayo Elizabeti wori, uo orewangiloghe kolowi, idana oko na kifu cha mwana wa womi, na ughu ni mori ghwake ghwa karandadu. 37Angu ndekuwadie ilagho jingi jisedimikagha kwa Mlungu anduangi.”#Kuz. 18.14 38Nao Maria ukaghamba, “Ola ini ne mdumiki wa Bwana, ndeikaie kwapo sa madedo ghako.” Nao malaika ukamsigha.
Maria kughenda kumroghua Elizabeti
39Nyuma ya matuku ghaja, Maria ukawuka na kughenda shwa-shwa cha muzi ghumu ghwa mighondinyi ya isanga ja Judea. 40Nao ukangia nyumbenyi kwa Zakaria, ukamroghua Elizabeti. 41Elizabeti uendasikira kuroghua kwa Maria, kana kakoo kikachumba kifunyi kwake, nao ukachulwa ni Roho Mweli; 42ukaghamba kwa lwaka lubaa, “Kwarasimilo oho kuchumba waka wose, na uo mwana kuchaamva warasimilwa. 43Kwaki nanekwa ilagho iji, ja kuchelwa ni mae Bwana wapo? 44Angu iji nasikira kuroghua kwako, kana kakoo kachumba kwa kuboilwa kifunyi kwapo. 45Warasimilwa uo muka urumirie, angu agho ughorelo ni Bwana ghichakatishwa.”
Lumbo lwa Maria
46Nao Maria ukaghamba,
“Irangi japo jamkasa Bwana,#1 Sam. 2.1-10
47na roho yapo yaboilwa ni Mlungu Mkiri wapo;
48angu wanitala ini mzumba wake usefwane.
Angu zighana kufuma idana
vivalwa vose vichaniwanga mrasimilwa.#1 Sam. 1.11
49Angu Uo-Uwadie-Ndighi wanibonyera maza mbaa,
na irina jake jaelie.
50Wughoma ghwake ghwadakaia
hata vivalwa na vivalwa, kwa awo wimuobuagha.
51Waghughorua mkonu ghwake ghwa ndighi,
wawisaghisa wang'eti
kwa maririkanyo gha ngolo rawo.
52Awo wibonyagha nguma wawiinja vifumbinyi kwawo,
na kuwijosa awo wikuserie.#Ayu. 5.11; 12.19
53Awa wiko na njala wawighudisha na vindo vicha,
na wazuri wawisigha mikonu miduu.
54Wamtesia Israeli mdumiki wake,
kwa kukumbuka wughoma ghwake.
55Sa iji koni orewighorieghe weke wawa wedu,
Abrahamu na kivalwa chake kwa kala na kala.”#Kuz. 17.7
56Nao Maria ukakaia kwa Elizabeti sa meri idadu, nao ukaghenda cha mzinyi kwake.
Kuvalwa kwa Johane M'baputizi
57Ngelo ya Elizabeti eva iendavika, ukava mwana wa womi. 58Wambao na wakwawo wikasikira seji Bwana um'bonyere wughoma na kum'bonyera nicha na ndighi, nawo wikaboilwa chiaimweri nao. 59Hata ituku ja wunyanya, wikacha kumshamisha, wikakunda kummbanga Zakaria kunughana na irina ja ndee;#Wal. 12.3 60ela mae ukaghamba, “Hata, si ijo jingi, ela uchawangwa Johane.” 61Nao wikaghamba, “Kwa kichuku chako ndekuwadie mndungi uwangwagha ijo irina.” 62Wikamkunyiria ndee wikikunda kumanya uwangwa wada.
63Nao ukalomba kibau cheandikia, ukaandika, “Irina jake ni Johane.” Na wose wikashinika. 64Ahoeni momu ghwake ghukatambuka na lumi lwake lukafunguka, ukadeda ukimkasa Mlungu. 65Wambao wose wikangilwa ni wowa. Na malagho ghikaereshwa andu kose chughongonyi ra Judea; 66na awo wose wereghisikireghe wikaghiwika ngolonyi kwawo wikighamba, “Mwana uhu uchakaia mundu ufwane wada?” Angu mkonu ghwa ndighi ra Bwana ghorekoghe andwamweri nao.
Wulodi ghwa Zakaria
67Niko Zakaria ndee uja mwana,
ukachulwa ni Roho Mweli ukaloda ukighamba;
68“Ndekaso Bwana Mlungu wa Israeli,
angu wawivikia wandu wake na kuwikombua.
69Sena wadiwusiria ing'oni jekira,
nyumbenyi kwa mdumiki wake Daudi.
70Sa iji koni oreghorieghe kokala,
kwa memu ya walodi wake wielie;
71angu uchadikira kufuma kwa wamaiza wedu;
na kwa mikonu ya wose widimenyagha;
72uwibonyere wughoma orewilaghirieghe weke aba,
kwa kujikumbuka ilaghano jake ja wueli.
73Ighemi oremghemieghe Aba odu Abrahamu
ja kudineka isi kukaia,
74iji dakirwa kufuma mikonunyi kwa wamaiza wedu,
dichamdumikia kuseko na wowa,
75kwa wueli na hachi imbiri kwake
matuku ghose gha irangi jedu.
76Na oho, mwanwapo,
kuchawangwa mlodi wa Uo-Uko-Aighu-Nandighi,
angu kuchamkiria Bwana
kum'boisira chia yake;#Mlk. 3.1
77na kuwineka wandu wake kumanya kukia,
kwa kulekwa kaung'a rawo;
78kwa chia ya wughoma mungi ghwa Mlungu odu,
ngelo mwengere ghuchaadichea kufuma aighu,
79kuwilangalishira awo wiko kidombo kirenyi,
na andenyi ya kiju cha kifwa;
na kulongoza mighendo edu kwa chia ya sere.”#Isa. 9.2
80Nao uja mwana ukazoghua, na kukaia nandighi rohonyi kwake; ukakaia kireti, hata ituku ucheewoneka worinyi kwa wandu wa Israeli.
ទើបបានជ្រើសរើសហើយ៖
LUKA 1: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.
