Romanos 11
11
Te' cotzoquiajupʌ Israel-pʌn
1Ngʌ'aŋwa'cpa jeque'ʌs: ¿Chajcuwa'sʌ'ŋde' Diojsis ñe' pyʌnda'm? Ja'ne nijutz. Porque ʌj Israel-pʌndi'ʌjyʌ'que', Abraha'ŋis wyinboya, y Benjami'ŋis raza'ojmocpʌ. 2Jachacʌtij Diojsis ñe' pyʌnda'm, te' antestij ispʌquiajupʌ. ¿O ja'nja mustame jutz chamgue'tpa te' Elías te' Totojaye's nʌ'c 'yoto'ŋʌyu Dios ñicotza'mʌyu Israel? y nʌmu: 3Señor, yajca'jayaju mis ndza'maŋwa'oyeta'm, y jyu'mbʌ'jayaju mis altarta'm, ʌjtya' naytyumʌ'ʌj tzʌ'yu, y me'chajpa'ʌj wa'yʌj yajca'yaju. 4¿Pero jutza' 'yaŋdzoŋu Diojsis? Ñʌjayu: Ngoquenu'ʌs ne'cʌcotoya cu'ya'y mil pʌn ja'n quiujnayapyʌ Baa'lis wyi'naŋdʌjqui. 5Te'šejtijque' yʌtijpʌ aŋsʌ'ŋoyj ijtyajumaj cʌchʌ'yʌ Diojsis yajya'moquiupyit copiŋyajupʌ. 6Y juca yajya'moquiupyit, ja'nande' tʌ ndzʌquipit. Juca inʌc te'šej te' yajya'moquiuy ja'nande' inʌc yajya'moquiuy. Y juca tʌ ndzʌquipit, ja'nande' te' yajya'moquiupyit. Juca inʌc te'šej te' tzʌqui ja'nande' inʌc tzʌqui.
7¿Tiya' jeque? Jaquiʌpa'tya te' Israel-pʌ'nista'm te' nʌ mye'chajupʌ tiyʌ. Te' copiwi'sta'm quiʌpa'tyaju, y te' eyata'mbʌ nuyu'ajyaju. 8Yʌ'šej ja'yʌyu: Diojsis quiotjayaju ja'n ñʌctʌ'yoyepʌ quipsoquiuy, y witʌm ja'n quienepaquiapyʌpit, y cowi ja'n myatoŋyapyʌpit hasta yʌtijta'mbʌ jamo'oyj. 9Y David nʌmu:
Tzʌcjaya te' quiu'tcuy-šʌŋda'm copatzešej, suquiuy-ñutišej, y nepcʌschʌmguyšej ñe'cʌcotoyata'm, te'šej wa'y quioyojyaju.
10Y yajpi'tzʌ'ajya wyitʌm uy quieñaju,
Y yajucši'ajaya mumu jama tyutzcupyac.
Maŋba quiotzoquiaju gentilta'm
11Nʌmba jeque'ʌj: ¿Nepcʌschʌmyajusʌ'ŋ Israel-pʌnda'm wa'y tyocoyaju? Ja'ne nijutz. Pero ñe'ta'm ñepcʌschʌmgupyit maŋba quiotzoquiaju te' gentilta'm, y te'šej maŋba yajcʌjoŋyaju te' Israel-pʌnda'm. 12Y juca te' ñe'ta'm ñepcʌschʌmgupyit ñʌwʌ'ajyajpa najsacopajcʌsita'mbʌ's, y juca ñe'ta'm tyocoquiupyit ñʌwʌ'ajyajpa te' genti'lista'm, ¿cuantimastya' maŋba ñʌwʌ'ajyaju tʌjcʌwyʌtzʌquiajque'tu'ca Israel-pʌnda'm?
13Pero nʌ'ʌsmij oto'ŋʌytyamu mijta'm gentil, porque ʌj, jeque, cʌ'we'ʌjyʌ' genti'lojmota'm, y nwʌcotzamba'ʌs ne' nyoscuy. 14Jowi'cše'ʌs jutz nyajcʌjoŋyajpa ʌs nʌ'pin-dʌwʌ, y wa'y quiotzoquiaju iwʌjutiwʌ ñe'co'mota'm. 15Chacjaŋbʌ'yaju Diojsis te' Israel-pʌnda'm, y Cristopit chʌjcu ñe'cʌji'ŋbʌ našunwʌtzʌcʌtʌjcuy najsacopac-pʌnji'ŋ. Y juca te'šej chʌjcu chacjaŋbʌ'yaju'c, ¿tiya'sʌ'ŋ maŋba chʌjcu pyʌjcʌchoŋyajpa'ca? Ñempe ca'uwʌšej ijtyaju cowa'ojmo maŋba chi'yaju jomepʌ quenguy. 16Como Diojsiste'ñe' te' winapʌ tʌm mbiŋjʌcʌ'papʌtʌ ñe'cʌcotoya, te'šejtijque' mumu te' tzʌ'yupʌ tʌm ñe'te'. Juca ñe'te' te' cu'yis wyatzi tzo'tzumʌy, te'šejtijque' te' 'yaŋmaŋda'm, mumu te' ñe'. 17Pero tzatzpʌ'yaju wene 'yaŋmaŋ, y mij, panayupʌ olivo-aŋmaŋšej mij ijtu. Y ŋguiojtyajumij te' tzatzpʌ'yajumʌy wa'mis mbʌcjayu te' wyatzi's ñʌ' y pyʌmi olivo-po'qui'sñe'. 18Uy comʌ'i juca masmij 'yoye que ja'nde' te' 'yaŋmaŋda'm. Y juca jene oye mis ŋgomʌ'pya nwin, musʌ que ja'nde' mis mbʌmitzi'i te' watzi, sino que te' watzi'smijte' mbyʌmitzi'pa mij.
19Maŋbasʌ'ŋmij ñʌmu: Tzatzpʌ'yaju te' aŋmaŋ wa'yʌj tey cojtyaju ʌj. 20Te'šejte', pero jawyʌ'aŋjamya ñe'cʌ'sta'm, te'cotoyate' tzatzpʌ'yaju, y mij, te' nwʌ'aŋjamgupyit ñchʌ'pyamij. Uy jene oye comʌ'i nwin, sino que na'tzʌ. 21Juca jayajcotocoya Diojsis te' ñe'cʌpʌ cu'yu'aŋmaŋ ni mij ja'nmij maŋu nyajcotocoquie'tu. 22Quenja jeque Diojsis 'yoye'ajcuy y te' ño'ti'ajcuy. Wiyuŋšej te' tzatzpʌ'yajupʌcotoya te' ño'ti'ajcuy, pero mijcotoya te' 'yoye'ajcuy, juca ñe' 'yoye'ajcuy mis ŋgo'ŋjojcʌtʌcjapya. Y juca ja'n te'šej, yajtimij maŋbamij nyajʌcʌ'que'tu. 23Y yajti ñe'cʌta'm Diojsis maŋba quiotwʌtzʌquiatʌju tzatzpʌ'yajumʌy juca chaquiajpa te' jana wʌ'aŋjamguy. Porque Dios mujsopyapʌte' wa'y quiotwʌtzʌquiatʌju. 24Porque juca mij, panayupʌ po'cʌsimij njyacpʌ'yaju y maŋumij ŋguiojtyaju oyepʌ olivo-po'cʌsi, ¿cuantimastya' te'ta'mbʌ, ñe' 'yaŋmaŋda'm maŋba quiotwʌtzʌquiatʌju te' ñe'ta'm nijpupʌ olivo-po'cʌsi?
Maŋba pyʌjcʌchoŋwʌtzʌjcu Diojsis te' Israel-pʌnda'm
25Atzita'm, wa'mis jana ne'cʌtij mujsoyešej ŋgomʌ'ytyamu nwin, sunba'ʌs wa'mis mustamu yʌ' jayajqueyapʌ tiyʌ Diojsis winata'mbʌ tiempo'oyj: Nuyu'ajyaju choco'yojmo wene te' Israel-pʌnda'm, hasta que tʌjcʌyajpa mumu maŋba tyʌjcʌyajuše'ŋ te' gentilta'm. 26Pijche'ca maŋba quiotzoquiaju mumu Israel-pʌnda'm. Yʌ'šej ja'yʌyu:
Sio'ŋojmoc maŋba minu te' Sombʌ'opyawʌ,
Y maŋba yajʌcʌ'pʌ'jayu Jacojpis quiʌwo'ma's yacha'cuy.
27Y yʌ'še'ʌste' ndzamdzi'yaju que maŋba'ʌs ndzʌjcu, nʌmu Dios,
Nyajʌcʌ'jayaju'camʌs ñe'ta'm quiowa.
28Japyʌjcʌchoŋya'ŋmʌjcʌ te' evangelio ñʌcma'yʌyajpa Diojsis jujcha' qui'nisoyajpapʌ, wa'mij mbyʌjcʌchoŋdamu mijta'm. Pero ya'acta'mbʌ aŋsʌ'ŋoyj quiopiŋyaju Diojsis, y šuñajpa te' winata'mbʌ tyatajpit. 29Te' chamdzi'oquiuquiʌsi y te' wye'oquiuquiʌsi ja'n quipswitu'i Dios. 30Porque mista'm, jamyato'ŋoyjaytyaŋgue'tamis Dios cʌtʌquiajupʌ aŋsʌ'ŋojmota'm, pero yʌtij ñdyo'ya'ŋʌytyambamij ñe'cʌ's, te' Israel-pʌ'nista'm jana myato'ŋoquiupyit. 31Te'šejtijque' yʌ' Israel-pʌ'nista'm ja'n myato'ŋoyay yʌtij, wa'mij ñdyo'ya'ŋʌytyamu Diojsis. Y te'šejpʌ to'ya'ŋʌ'oquiupyit maŋba tyo'ya'ŋʌyajque'tu ñe'cʌta'm Diojsis. 32Chaquiatʌju Diojsis mumu pʌn wa'y jana myato'ŋoyaju. Te'šej chʌjcu wa'y tyo'ya'ŋʌpyʌ'u mumu pʌn ñe'cʌ's.
33Y ay, ja'ndʌ musi muspʌ'u te' Diojsis jene aŋba'tepʌ myujsoquiuy ni te' ñʌctʌ'yoquiuy. Ja'n musi ñʌctʌ'yjayu ya'iwʌ's tiyʌ quipsaŋgospo'ʌwya'a Diojsis wa'y tyujcu. Y ya'iwʌ's ja'n myusi tiyʌ nʌ chʌjcu ñe'cʌ's. 34¿Iwʌ'sa jeque ñʌctʌ'yjayu tʌ Ngomi's quipsoquiuy? ¿O iwʌ'sasʌ'ŋ 'yaŋnʌctza'mʌyu ñe'cʌ? 35¿Iwʌ pʌ'nisasʌ'ŋ chi'u Dios wina tiyʌ'iwʌ, wa'y chi'witu'u tiyʌ'iwʌ ñe'cʌ's? 36Ñe'cʌ's chʌjcu mumutiyʌ, y ñe'cʌpit ijtu, y ñe'cʌcotoya. Yajmʌja'ŋwʌcotzamya mumu pʌ'nis mumu jamacotoya. Amén.
ទើបបានជ្រើសរើសហើយ៖
Romanos 11: ZCNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Nuevo Testamento en Zoque Copainalá © Sociedad Bíblica de México, A.C. 1967.
