Romanos 10
10
1Atzita'm, wiyuŋšej ndumʌtzoco'yʌs sunba wa'y quiotzoquiaju te' Israel-pʌnda'm, y nwa'cjapya'ʌs Dios te'šej wa'y chʌjcu. 2Porque ŋgotzamyajpa'ʌs que quioquipyajpa Dios, pero ja'n nʌctʌ'yoquiupyit. 3Como ja'n ispʌcjayay te' Diojsis jyusticia, te' tzi'papʌtʌ, chʌcme'chajpa wa'y quiojtyaju ñe' jyusticia. Te'cotoya jamyato'ŋoyjaya te' Diojsis jyusticia. 4Te' aŋgui'mgu'yis ja'ndʌ musi justococojtu, pero Cristo's jyustococotpa mumu jujche'ŋ wyʌ'aŋjambapʌ's.
5Porque jya'yʌyu Moisejsis que iwʌ's chʌcpa te' justicia te' aŋgui'mgupyit ijtupʌ, maŋba ijtu te'wʌpit. 6Pero te' justicia tzi'papʌtʌ Diojsis te' wʌ'aŋjamgupyit, yʌ'šej nʌmba: Uy nʌmi ndzoco'yojmo, ¿iwa'sʌ'ŋ maŋba qui'mu tzajpojmo wa'y maŋu yajwanajcu te' Cristo? 7O ¿iwa'sʌ'ŋ wanacpa mʌja jʌŋgʌ'ojmo wa'y maŋu yajqui'mu Cristo ca'yajupʌ'ojmoc? 8¿Pero ja'nja ñʌmi yʌ'šej? 'Yaŋijtumij te' tzame's, y nʌmis matoŋu y nʌmis nʌctʌ'yu mis ndzoco'yojmo. Yʌ'wʌte' te' tzame ndzamgopuŋbapʌtʌs wa'mis nwʌ'aŋjamdamu. 9Juca ne' aŋnacapitmis ŋgowʌ'aŋjamba que Jesús miste' Ngomi, y juca nwʌ'aŋjambamis ndumʌtzocoy que Diojsis yajwinsa'u ñe'cʌ ca'yajupʌ'ojmoc, maŋbamij ŋguiotzojcu. 10Porque tʌ ndzocopyit wʌ'aŋja'mopyatʌ y justococotpatʌ Diojsis, y tʌ aŋnacapit cowʌ'aŋja'mopyatʌ y yajcotzocpatʌ Diojsis.
11Nʌmba jeque te' Totojaye: Mumu jujche'ŋ iwʌ's wyʌ'aŋjamba ñe'cʌ ja'n maŋu cha'ajcuy chi'yaju. 12Porque tu'mbacta'mdij judío mumu pʌnji'ŋ. Te' tumʌpʌ Comi, te'wʌte' mumu pʌ'nis Quiomi, y mumu jujche'ŋ wyejwindzoŋyajpapʌ's ñe'cʌ, jana yaye pyʌjcʌchoŋyajpa mumutiyʌ. 13Porque jujche'ŋ wyejwindzoŋjapyapʌ's tʌ Ngomi Diojsis ñʌy maŋba quiotzojcu. 14¿Jutza' jeque maŋba wyejwindzoŋyaju te' jawyʌ'aŋjamyapʌmaj? ¿Y jutza' maŋba wyʌ'aŋjamyaju juca ya'iwʌ'smaj jachamjayajtʌ'ʌ? ¿Y jutza' maŋba myatoŋyaju juca ja'ndiyʌ chamgopuŋjayajpapʌ's? 15¿Y jutza' jeque maŋba chamgopuŋyaju te' pʌ'nis juca ja'n quiʌ'wejyatʌy? Yʌ'šej ja'yʌyu: Jene sa'sata'm ñe'ŋbac te' chamgopuŋyajpapʌ's te' evangelio tzi'papʌ'stʌ sʌ'mnaquiuy, y te' chamgopuŋyajpapʌ's oyeta'mbʌ tiyʌ.
16Pero jamyato'ŋoyja mumupʌ's te' evangelio. Te' Isaías jeque nʌmba: Señor, ¿iwʌ'sa wyʌ'aŋjamu tʌs ndzamgopuŋupʌ tiyʌ? 17Te'šej jeque wʌ'aŋja'moyajpa te' pʌnda'm te' myatoŋyajupʌ tiyʌpit. Myatoŋyajpa te' tzame, te' chambapʌ's Dios.
18Pero ŋgʌ'aŋwa'cpa'ʌs: ¿Jamyatoŋyamajsʌ'ŋ? Jʌ'ʌ, jeque, porque nʌmba:
Mumu naswindumʌ'a nu'cu cʌ'we'ista'm chamyajupʌ tiyʌ,
Y nasa'acapoyo'moše'a nu'cu.
19Y ŋgʌ'aŋwa'que'tpa'ʌs: ¿Jañʌctʌ'yasʌ'ŋ yʌ'wʌ Israel-pʌ'nista'm? Moisejsis jya'yʌyu, yʌ'šej nʌmu Dios:
Ʌsmij maŋba nyajcʌjoŋdamu eyata'mbʌ pʌnbit ja'ndʌ nacionšej ŋgomʌ'ipʌ.
Y ja'n ñʌctʌ'yoyapyʌ pʌnbitta'm maŋba'ʌsmij ndzʌjqui'šca'tamu.
20Y Isaiajsis jana na'chcuy chamu jutz nʌmu Dios:
Te' ja'namʌj me'chapyʌ's inʌc pa'tyaju'ʌj.
Y nyajqueñaju'ʌs ne' nwin te' jaquiʌ'aŋwa'quiapʌ'sʌj.
21Pero chamgue'tpa te' Israel, y nʌmba: Tumʌ jama'ʌs ndzi'jo'yaju ŋgʌ' yʌ' ja'n myato'ŋoyapyʌ y nuyuta'mbʌ.
ទើបបានជ្រើសរើសហើយ៖
Romanos 10: ZCNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Nuevo Testamento en Zoque Copainalá © Sociedad Bíblica de México, A.C. 1967.
