LALAKOGI 21
21
Bol mo vano Jerusalem
1Gam tuletulegi meire siu gam sireginire. Gam vano utu, gam dadari lo vanue Kos. Maraga robongi gam vano gam dadari lo vanue Rota, siu gam siregi aiehi gam vano gam goso hage lo qatui venue Batara. 2Gam haqe na aka vage aiehi mo rarai ve na vano lo vanue Vonesia, gam kalo lune gam toa gam vano taligu. 3Gam toa mo vano gam lehi na vanue Saebras, gam toa liliu mo hivo vovohoi na vanue Ijib ve gan vano lo vanue Siria. Gam goso hage varea aiehi lo qatui venue Taea huri a aka mo tau na lakolako aiehi ko igamai gam hage varea. 4Gam haqe na rorongtagi noi Jisas ram toga aiehi, gam toga bulu a wik gatagale, a Vui Gogona mo hora na rorongtagi ingere hi ve rain vano rain veve lawe Bol ve vin mese vano lo qatui venue lawua hi Jerusalem. 5Gau toga meire u tatarise beno siu gam maraga gam vano teligu. Siu ingere doluegi mei horara tora reneture talo qatui venue hi ram huri gamai, igamai doluegi gam hivo lolo one lo tahi aiehi gam sisiqeu hivo lolo one gam tataro, 6igamai doluegi gam tuletulegi. Siu igamai hogosie gam hivo lo aka taligu, nge ingere ram mule taligu.
7Gam toa mo huri na turegimei taligu hi gau liliu denie gam vano lo qatui venue Toleme. Gam hage varea, gam haqe retuada aiehi gam toga meire a rani gatagale. 8Maraga robongi gam siregi na qatui venue hi gam vano lo qatui venue Sisaria. Aiehi gam vano lo valei tangaloi wahewahegi na Roro Garea hi i Vilib, gam toga lobena ingeie denire gaibitu hi tomue rau buluire hora. 9I netune a maresu vavine gaivesi rahe lagi te mosigei, gesegi ram waregi sere na leo noi God. 10Gau toga aiehi he qaravu tea, nge a tangaloi veve rarai gatagale a henana i Akabas mo dadari ingeie dena vanue Judia. 11Mo vonai lobemai mo lai na wasi Bol, mo vau na karune ko a limana gina wasi hi. Ko mo veve vena, “Nge ngaha a leo nona Vui Gogona. A tomtomuegi nora duvi Israel a Jerusalem ingere rain lei na wasi tangaloi hi rain veu bibie, rain teue lo limara tangaloi tavala varea den duvi Israel.”
12Lune igamai gam rongo a leo hi, igamai ko a sinobu talolo togagi venue hi, gam veve siaga lawe Bol ve vin he vano tea Jerusalem. 13Siu i Bol mo duvire mo veve vena, “?Huri havai nem vai na lalakogi mwere hi, nem ngara mwere hi, nem vai asiesigi na domiku. Ineu nau mesinge ve rai veuhieu mwere hi. Nge hatie hogosie hi. Nge ineu nau mese nge vage ve nai mate a Jerusalem, huri na henai Jisas, a noda Huqe.”
14Siu igamai gahe suri laie tea. Gamai gam toga hivo gam veve vena, “A domiana nona Huqe na eno lune mwere hi.”
15Gau toga aiehi u mala qaravu, siu gam vagatai na nomai lakolako gam vano a Jerusalem. 16A rorongtagi noi Jisas lavasigi ta Sisaria ram huri gamai vage, ram lai gamai gam vano lo valena tangaloi gatagale ta Saebras, ingeie a rorongtagi noi Jisas u tuei beno a henana i Nason. Gam vano gam maturu lo valena.
I Bol mo vano mo lehi Jemis
17Lune gam dadari lo qatui venue lawua hi a Jerusalem, ira ladohogo aiehi ram havuhevu u liu huri ram lehi gamai. 18Maraga robongigi gam vano tomai Bol ve na lehi Jemis ko ira tamaragai talo warelue ingere aiehi vage. 19I Bol mo lai vurugeginire, ko mo veve sere na gineu doluegi ngehi i God u veie lawera tangaloi tavala varea den duvi Israel turu na nona tabanagi. 20Lune ingere ram rongo na leo noi Bol, ram ware gareagi God. Siu ram veve lawea vena, “Tuemai. Iniko gu ilo vurugeginire duvi Israel hi hano ve u teri rau lado hogo gi Jisas, siu ingere doluegi ram hako siagagi na Leo Hora noi Mosis. 21Ngere rau rongo na roromu beno, huri ve gu huhuire duvi Israel hi ram toga lo vanuara tangaloi tavala varea ve ran mese huri na Leo Hora noi Mosis. Siu ve gu veve lawera vage, ve rain mese tevegigilegi reneture ko rain mese huri na togatoga nora duvi Israel. 22Ngaha rain rongo ve gu dadari beno tangaha. ?Siu dain vei wuraha? 23Goin vei mwere hi gamai gain veve lawego. A tangaloi gaivesi ram toga hano, rau vei na waratau siaga mei God. 24Mavugo, goin leire ko goin bulu meire lo nora tataro huri ingere rain mwasara lo nagoi God. Siu u garea ve goin voli na kakarue rain wehire i gi nora rugurugu huri hudu goro God ginie. Huri ingere rain mwasara dena nora waratau siaga hi lo nagoi God, rain bala vohogi na vulure, rain hiri vohoginie dena qature. Gena gigilegi hi, a tangaloi rain iloe ve a leo hi a tangaloi ram laqaginie hurigo hatie hogo, nge iniko gom hako bibi na Leo Hora noi Mosis mo sigei. 25Igamai gau hora na leo beno lawera tangaloi tavala varea den duvi Israel hi rau lado hogo lui Jisas, gau veve sere na leomai lawera ve rain mese gani na hinaga hi rau ruguruguginie lawe na god wagineu. Rain mese gani na dai, rain mese gani mo kakarue hi a tangaloi rau kumure, ngehi a daigi mo eno mosigei lolo vihigora. Vage ve rain mese vai vagasile mena vavine.”
26I Bol mo lai na tangaloi gaivesi hi ram vano. Maraga robongi mo bulu meire, ram tataro huri ve ran mwasara lo nagoi God. Siu Bol mo soro lolo sara Gogona, a sarai valei God huri vena veve sere lawera rugurugu, huri ve a rani gaivihe vage mo eno huri na lalakogi hi huri na tangaloi gaivesi hi rain mwasara lo nagoi God. Huri ira rugurugu hi rain wehi na kakarue gaivesi, gagatagalegi vataha na tangaloi gaivesi hi, huri vin haharagi ve a nora taro u rovo.
Ram wiribibi Bol lolo sara Gogona
27U kakarani ve a rani gaibitu hi na rovo, ira duvi Israel lavasigi ram vanai dena vanue Esia, ram lehi Bol lolo sara Gogona a sarai God. Ram maraga ram vai na sinobu ram lolo gagasi ram wiribibi Bol. 28Ram laqa siaga ram veve vena, “!Ei! !Gimiu a duvi Israel! !Siseri! !Ne bului! A tangaloi ngaha hi nge u vano vataha na mahomahoi ute mo huhui na tangaloi ve ran lado vurogi gi gide a duvi Israel. Mo veve lawera vage ve rain mese huri na Leo Hora noi Mosis, ko a vale gogona noi God ngaha vage. Siu vage u lei na tangaloi tavala varea den duvi Israel talolo sara Gogona, mo sokori na ute Gogona ngaha.” 29Ingere ram veve mwere hi huri rau lehi na tangaloi ta Evesas gatagale i Trovimas tona Bol ru dige bubugi lo turegi lo qatui venue lawua hi. Siu ram lado ve i Bol u lei na tangaloi hi rum vano lolo sara Gogona
30A leo mo toa lategi lolo qatui venue lawua hi, a tangaloi ram toa tabulutegi, ram wiribibi Bol ram reveie tavarea dena arai Vale Gogona noi God. Siu ram gorogoro na mataiara doluegi. 31A tangaloi ingere hi ram tarani ve rain uevagamate Bol, nge a leo mo dadari lawe na muei tangaloi vuro ta Rom, huri ve a sinobu lo vanue Jerusalem rain vai na vuro lawua. 32Siserigi a muei tangaloi vuro hi mo laire leogoro tangaloi vuro mwere nora tangaloi, ram toa mo hivo siseri lobera tangaloi ingere hi. Lune ingere ram lehi na muei tangaloi vuro hi meire nona tangaloi vuro, rahe wehi Bol tea, ram sireginie. 33A muei tangaloi vuro mo vano kakarani lobei Bol, mo wiribibie, mo veve lawera tangaloi vuro ve rain vauhie gina seni gairue. Siu mo huire vena, “?Hava tangaloi ngaha? ?U vei na havai?” 34A sinobu hi ram gato siaga, lavasigi ram veve na leo wagineu lavasigi ram veve na leo wagineu. A muei tangaloi vuro hi he haqe na leo vovohoi tea ve wuraha. Siu mo veve lawera nona tangaloi ram laie ram hage meie lolo valera. 35I Bol mo dige mo hage kakarani lobei kalokaloi vale hi, nge a tangaloi vuro hi rahe hage lai tea. Siu ingere ram hau Bol, ram walie ram horaginie tanamawe, ram hage meie, a vevenagi a sinobu hi ram mero lawagi. 36Ingere hi ram hurie atagu ram waregi siaga, ram veve vena “!Nen ue vagamatea!”
I Bol u mata-mwasaraginie sibona lawera
37A tangaloi vuro ingere hi rau lei Bol ve ran vano meie lolo valera, i Bol mo veve lawe na muei tangaloi vuro hi vena, “Gon siregieu na laqa te biti meigo.”
A muei tangaloi vuro hi mo veve vena “!Ei! ?Iniko gu ilo na leo nora ta Kris?” 38“?Nam lado ve iniko a tangaloi ta Ijib, huri tomue gu maraga gum vai vei na ratahigi lawua, gu lei na tangaloi hi rau ueue tangaloi u teri vagavesi nem vano lo vanue vurogi?”
39I Bol mo duvi mo veve vena, “Ineu a duvi Israel. Nau vora lo qatui venue Tasas lo vanue Silisia, giniehi, ineu a nati aiehi lo qatui venue lawua hi. Garea, gon siregieu nan laqa mena sinobu ingere hi.”
40A muei tangaloi vuro hi mo sireginie, siu i Bol mo labe lo kalokaloi vale hi mo horagi na limana mo sivesive haginire ve ran toga rorongo. Lune ram rorogo i Bol mo laqa meire lo leo Hibru, a leo nora duvi Israel.
ទើបបានជ្រើសរើសហើយ៖
LALAKOGI 21: HNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of the South Pacific, 2013
