LALAKOGI 20
20
I Bol u vano lo vanue Masedonia ko Akaea
1Lo tagugi a rorona hi mo hivo, siu i Bol mo ware tabulutegi nire ladohogo mo laqa lawera huri vena vai mesuri ginire ko mo tuletulegi lawera, siu mo sireginire mo vano lo vanue Masedonia. 2Mo vano turu na qatui venue u sao ko mo vai siagaginire sinobu gina leo vai mesuri u sao. Siu mo vano lo vanue Akaea. 3Mo toga aiehi a vule gaitolu. Mo vagataie huri na matahalana ve vin vano lo vanue Siria. Nge ingeie mo rongo ve ira duvi Israel rau teu na leoi gana, siu nge mo lado vena vano turu na vanue Masedonia taligu. 4I Sopata i netui Biras a nati Berea mo hurie. I Aristakas ko i Sekandas ingere dena qatui venue Tesalonaeka, i Kaeas talo vanue Debe, i Timoti ko a tangaloi gairue vage ta Esia i Tikikas ko i Trovimas, ingere doluegi hi ram hurie vage. 5Rau vano tomue ram toga rarai gamai lo vanue Troas. 6Gau vano lo aka dena vanue Vilibae lo tagui gaganie nora duvi Israel a henagi a hinagai bereti ngehi hatie isi lolona, a rani gailime goro gam bulu meire lo vanue Troas, gau toga aiehi a wik gatagale.
A sirosiro vagasigi lo vanue Troas
7Lo sarere#20.7 E revirevi gam sone vanai ve gan hudu-hudugoro ko gam gagani bubugi, ko ve gan lalakogi na hinaga gogona. I Bol mo laqa lawera sinobu mo dadari lolo livugei bongi, siu huri vin vano denire maraga robongi. revirevi lo leo nora ta Kris a leo hi a iloilogi mwere ngaha vena, “A muei reni talo wik, “mo huri na doridori nora duvi Israel tuei a rani mo tauvuigi lo matainaho roro. 8A laeti u sao lolo mahoi vale hi gau sone bubugi aie. 9A mwalakelo gatagale a henana i Iutikas u toga lo matailengi. I Bol mo laqa mo sigei, i Iutikas a matana mo huegi mo maturu u meturu geluve mo soi lo ulu vale lalangi gaitoligi mo dumi lo tano. Lune ram ragasie dena tano nge u mate beno. 10Siu i Bol mo hivo lo tano mo soi hivo mo rago bibi nwalakelo hi mo veve lawera vena, “Ne mese romasi huri ingeie u mwaso taligu.” 11Siu ingeie mo hage taligu namawe lobera, mo vise vurivuri na bereti gogona ram ganie siu rabei gagani bubugi. Mo laqa taligu meire u ribi mo dadari a matainaho mo kalo, siu mo sireginire. 12Ram lai na mwalakelo hi ram mule, ram rong garea u liu huri u mwaso taligu.
Ngere rau vano dena qatui venue Troas lo qatui venue Maelitas
13I Bol mo veve lawera ve ingeie vin dige vin huri vanue vin dadari lo vanue Asos, nge igamai gai vano lo aka gain leie aiehi. Gamai gam lai na aka gam vano tomue lo vanue Asos, ingeie mo vanai atagu. 14I Bol mo haqe gamai lo qatui venue Asos, mo kalo mei gamai lo aka gam vano lo qatui venue Maetiliu. 15Gam siregi na qatui venue hi maraga robongigi gam dadari lo vanue Kios. Maraga robongi taligu gam vano lo vanue Samos, siu lo rani tuegi gam vano gam dadari lo qatui venue Maelitas. 16I Bol mo tarani ve a aka na toa kakarani lobei venue Eveses, nge he hage te varea aiehi. Huri he tarani tea ve vin susuni na nona taro lo vanue Esia. Nge mo tarani vena vano siseri lo vanue Jerusalem, huri tare a taro mo qaravu teu mo tarani vena dadari aiehi huri na bongi Pentekos.
I Bol mo tuletulegi lawera ta Evesas
17I Bol u hora na leo dena qatui venue Maelitas vano lo qatui venue Evesas, mo warera tamaragai talo warelue ve rain vanai lobena. 18Ram vanai mo veve lawera vena “Neu ilo na doridoriku beno nau vaie gesegi lune nau toga lobemiu, lo tarogi nau vanai turu hano tomue lo vanue Esia. 19Ineu nam vai na tabana ingere naha a vevenagi ineu a tangaloi tabanagi noi noda Huqe, a domiku u tei toga, gesegi a noku tinengi mo hale huri gimiu. A asiana mo hogosieu gesegi, i ira duvi Israel ram vai leo ve ran vai asiesigieu. 20Neu ilo vurugegi lune nam vevesere na Roro Garea nam huhui gimiu lolo valemiu, sige lo nagora tangaloi, nahe vunigi na havagi neu tea hi ve vin bului gimiu. Nau veve sere na gineu doluegi. 21Nau veve siaga lawera duvi Israel ko a tangaloi wagiwegineu huri ve ran tudori dena nora galegaleasi ran huri God ko ran lado hogo gina noda Huqe Jisas. 22Ngaha nain vano a Jerusalem a vevenagi nam ronghuri na Vui Gogona, nge nau haroe ve a havagineu vin vei laweau aiehi. 23Siu ngaha nau ilo vurugegi beno huri ve lo vataha na qatui venue nau vano aie, a Vui Gogona u haharagi laweau ve nai dadari aie hi rain teueu lolo valei veuveu ko nain haqe na gineu esi rain hogosieu u sao. 24Siu ineu nahe lado te huri na mwasoaku. Nge ineu nam tarani ve nai vano tuturedu lo noku tabana nge hi a Huqe i Jisas u betea laweau, huri ve nai matamwasaragi na Roro Garea ko a lengai tabetabe lawua noi God.
25“Nam dige lategi lolo livugemiu doluegi hi God mo ratahigi goro gimiu. Siu siseri ngaha nau ilo ve den gimiu te gatagale vin he lehieu tea taligu. 26Nau matamwasaragi beno lawe gimiu hi bagataha, nge tare te gatagale den gimiu mo sala ngehi hatie buguku. 27Huri ineu nahe wiribibi na gineu te gatagale den gimiu, nge nau veve sere na gineu doluegi hi God mo tarani. 28Nen leo huri vurugegi gimiu sibomiu ko a tangaloi ingere hi a Vui Gogona u teure beno lo limemiu ve nen leo hurire. Nen leo hurire tangaloi warelue noi God, mwere na tangaloi leo goroi sibsib mo leo goro na bulana sibsib sibona. Huri i God u voli tuguhi na tangaloi ingere hi beno gina dai Netune sibona. 29Nau ilo vurugegi beno ve lune nai vano den gimiu, a tangaloi ingere hi rau mwere na wiriu turu rai vanai lolo livugemiu rain livu geburegi gimiu mwere na sibsib. 30A tarogi vin vanai a tangaloi lavasigi den gimiu sibomiu rain keli huri ve rain tomuegi ira ladohogo lui Jisas, ve rain hurire sulo nora kalikeli. 31Ngehi nein leo huri vin garea. Siu vage, nein lado haqe lolo higao gaitolu, rani ko a bongi ineu nau huhui gimiu doluegi mena noku tinengi.
32“Bagataha nam tau, gimiu lo limei God ve na vai gareagi gimiu gina nona leoi tabetabe u lawua vin wiribibi gimiu. A leo hi vin vei siagagi gimiu huri vin hui huire vage gina nona gareana u sao hi u vagatai tau huri na nona tangaloi doluegi. 33Neu nahe tarani tea silva nona tangaloi sige a kol sige a luqe. 34Igimiu sibomiu neu ilo vurugegi huri ve ineu nam tabana gena limeku ngaha, huri na havagineu ineu mei retueku, ingere hi gam qilodo lune. 35Ineu nam haharagi na halai tabana huire ingere ngaha lawe gimiu beno, huri ve dain buluire kekenagi, dain ladohaqe na leoi noda Huqe Jisas sibona u veve vena, ‘A havuhevu lawua lawe rahine hi ram betebete den rahine hi ram lai na hogogi vurogi.’ ”
36Lune i Bol u laqa u rovo nge mo sisiqeu hivo mo tataro meire. 37Ngere doluegi ram ragobibie ram ngara ram sungunie ko ram sireginie. 38Ram hagavie u liu a vevenagi mo veve vena, rain he lehe tea taligi. Ngere ram hurie ram hivo ram taue lo aka.
ទើបបានជ្រើសរើសហើយ៖
LALAKOGI 20: HNT
គំនូសចំណាំ
ចែករំលែក
ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of the South Pacific, 2013