LALAKOGI 11
11
I Bita mo veve sere na matahalana lawe na warelue ta Jerusalem
1Ira gaihora ko ira reretehigi doluegi lolo vanue Judia, ram rongo na roro huri ve ira haroharo vage ram ladohogo gina leo noi God. 2Lune i Bita mo hage a Jerusalem, a sinobu ngerehi ram tarani ve ran teve gigileginire, haroharo, ram veveginie. 3Ram veve vena, “?Huri havagineu iniko gom toga meire hi rahe tevegigilegi tea, ko gom gagani bubugi meire?”
4Ko i Bita mo veve sere na gineu doluegi lawera hi rau vei lo tauvuigi mo dadari lo vagasigi. 5Mo veve vena, “Ineu nau tataro lo vanue Joba, nau hueri nam lehi na gineu mo himei den eulu mwere na gete lawua a hugugi gaivesi, mo dadari kakarani lobeku.” 6Ko ineu nam leo hivo lolona nam lehi na kakarue ram tino lolo togagi venue mena kakarue talolo labute, a mwata ko a gineu mwaso lavasigi mwerehi, ko a manu talolo labute. 7Siu nam rongo na dilo mo veve lawea u vena, ‘Bita, gon maraga, gon ue ko gon gani.’ 8Nge ineu nam veve vena, ‘Hatie vohogi, Huqe! Huri ineu a hinaga rau sokora sige a valiveligi lune rahe ahu na wuwaku tea vohogi.’ 9Ko ineu nam rongo na dilo hi mo vonai dena eulu taligu mo veve vena, ‘A gineu ingere hi i God u vei mwasaraginire goin mese veve huri ve rau sokora.’ 10A leo hi u vonai vagatolu, siu a gineu ngerehi doluegi ram hage taligu lo eulu.
11“Ko siserigi a tangaloi gaitolu ram vonai lo vale hi gam toga aie. A tangaloi gatagale ta Sisaria a henana i Konilias mo hora na tangaloi gaitolu hi ram vonai ve ran laieu gain vano taligu bulu. 12Ko a Vui Gogona mo veve laweau vena, ‘Gon mese ladogairue huri ve goin vano mweire.’ Ire tuada gaiono hi vage ram hurieu. Ko lune gam dadari Sisaria, gamai doluegi hi gam soro vano lolo valei tangaloi hi Konilias. 13Ko ingeie mo vevesere lawe gamai, huri ve ingeie u lehi na engsel gatagale u soro lolo valena mo veve lawea vena, ‘Gon hora na leo na vano Joba gon ware na tangaloi hi a henana i Saemon Bita.’ 14Ingeie vin veve na leo lawego ngehi ve iniko ko i renetumu nei mwaso ginie.”
15“Ko lune ineu nam tauvuigi nam laqa, a Vui Gogona mo himei lure u tatarise vurugegi mwerehi u himei lude tomue. 16Ko ineu nam ladohaqe na leo noi noda Huqe tomue, ngehi u veve vena, ‘Jon u vei na garuhigogona gina wai, nge vin he ribi tea, i God vin garuhigogonagi gimiu gina Vui Gogona.’ 17Ngehi u matamwasara vurugegi huri ve i God u bete na hogogi lawera haroharo, mwerehi u bete lawe gide lune dau ladohogogi Jisas Kraes noda Huqe. !Huri ve ineu a hava tangaloi ve nai tugoro na tabana noi God!”
18Lune ingere ram rongo na leo hi, rahe laqa lune tea taligu, ram waregareagi God ram veve vena, “nge ngaha i God u vei na matahala mo bete na mahogi lawera haroharo tavala varea denire Israel. Huri ve ingere rain ladowenigi dena nora galegaleasi ko rain mwaso.”
A warelue ta Antiok
19Lo taro hi ram wehi Stivin, a sinobu ngerehi rau ladohogo lui Jisas, lavasigi ram toa dena vai bulabula hi ram vano ram dadari Vonisia, Saebras, ko Antiok. Ram veve sere na rorogi lawera a duvi Israel hogosie. 20A sinobu lavasigi hi rau ladohogo, ingere ta Saebras ko Saerini ram vano Antiok ko ram veve sere na rorogi lawera haroharo vage. Ram veve sere na Roro Garea lawera huri na Huqe Jisas. 21Ko a managi noi noda Huqe mo toga meire, ko a tangaloi u sao ram ladohogo gena leohora, ko ram tudori ram huri na noda Huqe.
22Koa rorogi huri na gineu ngaha mo dadari mena warelue noi Jisas a Jerusalem, siu ram hora Banabas mo vano a Antiok. 23Lune ingeie mo dadari, mo leo huri ve i God u bului vurugegi na sinobu, ingeie u rong garea ko mo ragasi na domine, ko mo garoginire ve ingere rain labe siaga lo Huqe gina lolo lolora doluegi. 24I Banabas ingeie a tangaloi garea, ko ingeie u horo gina Vui Gogona ko a ladohogo, giniehi a sinobu u sao ram huri na Huqe.
25Siu i Banabas mo vano a Tasas, ko mo hikesi Sol. 26Lune nge, mo haqea mo laie rom vonai taligu a Antiok, ko ingere rom toga meire sinobu talo warelue lo vanue hi huri na higao dolue ko rom huhui na sinobu lawua lo vanue hi. Lo vanue hi Antiok a tangaloi tavalavarea ram tau na hea ngaha kristin a iloilogi huri ve a tangaloi ram huri Jisas.
27Lo taro hi a tangaloi veve rarai lavasigi ram mwalue den Jerusalem ram hivo Antiok. 28Gatagale denire a henana i Akabas, mo labe hage mo veve sere gina huireana nona Vui Gogona, huri ve vin he ribi tea vin maro doluegi na ureure. U vei lo taro hi i Klodias nge a huqegi nora ta Rom. 29Siu a rorongtagi noi Jisas ram ladolado huri ve rain hora na vatu vatavatahaginire huri ve rain bete lai gai vihe vin hivo buluire ladohogo lui Jisas lo vanue Judia. 30Siu ingere ram vai mwerehi, ko ingere ram mabu na vatu hi lo limei Banabas tona Sol, huri ve ingere roin betea lawera tamaragai talolo warelue ta aiehi.
ទើបបានជ្រើសរើសហើយ៖
LALAKOGI 11: HNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of the South Pacific, 2013
