LALAKOGI 10
10
I God u laqa mei Konilias
1A tangaloi gatagale lo vanue Sisaria, a henana i Konilias. Ingeie a leogoroi tangaloi vuro vudolue ta Rom, ingere a burigi ta Itali. 2Ingeie a tangaloi ladohogo. Ingeie mei renetune ko ira hine hi vage ram toga lolo valena ram tataro lawe God, ko ingeie mo bului mo bete mane lawera mahoi tangaloi a duvi Israel. Ko mo tataro lawe God gesegi. 3Lo rani gatagale, lo matainaho vano a taroi tataro, ingeie u hueri mo leo vurugegi na engsel mo veve lawea vena, “Konilias.”
4I Konilias mo matagu uliu, ingeie mo leo garagaragi na engsel mo veve vena, “?A havagineu ngaha?”
A engsel mo duvi lawea vena, “I God u rongo na nomu tataro beno, ko u lehi na nom lalakogi garea ko he galuve ginigo tea. 5Siu iniko gon hora na tangaloi na vano lo vanue Joba vena ware na tangaloi gatagale na vonai hano. A tangaloi hi a henana i Saemon Bita. 6Ingeie mo toga lobena tangaloi a henana i Saemon tuegi hi mo basao na gineu lo vinui kakarue, mo toga kakarani lobei tehi.” 7A engsel hi mo vano denie, siu i Konilias mo ware na nona tangaloi tabanagi gairue, ko mo ware na nona tangaloi vuro gatagale vage, ingeie a tangaloi u ladohogo gi God. 8Mo veve na gineu hi lawera mo horara ram vano lo vanue Joba.
I Bita vage u hueri mo lehi na gineu
9Lo rani tuegi lo matainaho tu vovohoi ram vonai kakarani lo qatui venue Joba. Nge lo tarogi hi i Bita u hage namawe lo ului vale ve na tataro. 10Siu ingeie mo mwaruruhi, mo rongoe huri ve na gagani nge lo tarogi hi ram vai rarai na hinaga huri ve vin geni, ingeie mo hueri. 11Ingeie mo lehi na mahava mo waga, a gineu mo hivo vuine lo tano u mwerena gete lawua, a hugugi gaivesi, mo himei lolo ure. 12Lolo gete hi, a gineu mwaso u sao lolona, a kakarue, a gineu hi ram taka, ko a halai menu vatahae. 13Ingeie mo rongo na dilo mo gato meie mo veve vena, “Bita! Gon ue ko gon gani.”
14Siu i Bita mo veve vena, “Hatie vohogi, Huqe. Ineu nahe gani te gineu hi rahe tatarise tea huri geni, sige rau sokora lo nagomu.”
15Ingeie mo rongo na dilo mo gato meie taligu vagatuegi mo veve vena, “Goin mese domigi ve a gineu ingere ngaha rau sokora ngehi ineu i God nam veve huri ve rau mwasara.” 16A leo hi u vonai vagatolu, siu a gete hi mo hage taligu lo mahava.
I Bita mo haqe na iloiloi nona hueri
17I Bita mo hikesi na iloiloi nona hueri hi u lehe, lo taro hi a tangaloi ngerehi i Konilias mo horara ram vano ram hui na valei Saemon, nge ingere rau labe be lo matai ara. 18Ram hui siaga ram veve vena, “!Ei! ?A tangaloi hi a henana i Saemon Bita ingeie tangaha sige hatie?”
19I Bita mo ladolado lo nona hueri mosigei, a Vui Gogona mo veve vena, “!Gom rongo! A tangaloi gaitolu ram hikesigo. 20Gon maraga, gon hivo vuine, ko goin mese lado gairue huri ve goin hurire, huri ineu nau horara ram vonai.”
21Siu i Bita mo masuri mo hivo vuine mo veve lawe na tangaloi ingere hi mo veve vena, “Ineu ngaha hi nem hikesieu. ?Bataha nem hikesieu te huri havai?”
22Siu ingere ram duvi vena, “A tangaloi tomtomuegi talolo vuro i Konilias, mo hora gamai. Ingeie a tangaloi vovohoi u lado mavagi God. A tangaloi a duvi Israel rau lado mavaginie garagara. A engsel gatagale mo gato meie mo veve vena, ‘Gon ware Saemon Bita vano lo valemu ko goin rongo te havagineu vin veve.’ ” 23I Bita mo ware na tangaloi ngerehi talolo vale, siu mo bongi ingere ram maturu aiehi.
I Bita mo vano lo valei Konilias
Siu lolo robongi i Bita mo maraga mo hurire. I retuana lavasigi ta Joba ram hurie vage. 24Lo rani tuegi ingeie mo dadari lo vanue Sisaria, i Konilias mei rehavana ko ira buluine hi u warera vonai ram toga tarea. 25Lo taro hi i Bita mo vena ahu lolo vale, i Konilias mo mwalue mo siuolo ginie, mo soi hivo goro na nagona gina lado mava ginie. 26Siu i Bita mo duleie mo maraga, mo veve lawea vena, “Gon labe, huri ineu a tangaloi vage.” 27I Bita mo laqa mei Konilias mosigei, ingere vunu rom ahu lolo vale, i Bita mo lehi na tangaloi u sao rau kalo bubugi beno.
28I Bita mo veve lawera vena, “Igimiu neu iloe u mata-mwasaraginie lo leo huhui nora duvi Israel he tatarise tea ve rain siro sige rain bulu mena tangaloi tavala varea. Nge i God u haharagi laweau huri ve nain mese domigi na tangaloi ve he mwasara tea sige u sokora lo nagona. 29Siu igimiu nem hora hurieu nam vonai. Siu ineu nahe veve teve hatie lo leogi nge nam maraga nam dige nam vonai. ?Ineu nam hui gimiu, wuraha huri nem hora haroau?”
30Siu i Konilias mo veve vena, “A rani gaitolu goro beno lo matainaho tubegi mwere siserigi ngaha, ineu nau tataro lolo valeku, ko a tangaloi u luqegi na luqe u varavara, mo labe goro na nagoku, 31mo veve vena, ‘!Konilias! I God u rongo na nomu tataro, mo ladobibi na nomu lalakogi garea hi gom hako mena tangaloi. 32Siu iniko gon hora te tangaloi ran vano lo qatui venue Joba ve ran ware na tangaloi a henana i Saemon Bita. Ingeie mo toga lo valei Saemon tuegi hi mo basao na gineu lo vinui kakarue, ingeie mo toga kakarani lobei tehi.’ 33Giniehi ineu nam hora na leo lawego mo siseri, siu ngaha gu vonai beno u garea. Siserigi ngaha igamai doluegi gam toga tangaha lo nagoi God, igamai gam toga raraigo huri ve gan rongo te havagineu hi a Huqe mo horago huri ve goin veve.’
A leo noi Bita
34Siu i Bita mo tauvuigi mo laqa mo veve vena, “Hibagataha ineu nam ilo vurugegi huri ve a hogo i God mo vai na gineu lawe na tangaloi doluegi rau tatarise.” 35Ihine tea mo matagu ginie, mo vai na gineu u bagoto, nge hate huri tare ve ingeie a duvi Israel sige ingeie a tangaloi tavala varea nge i God u lei vurugeginie.
36“Igimiu neu ilo na leo ngaha hi u betea lawera tangaloi duvi Israel, ingeie u veve huri na Roro Garea huri na leohora hi mo vomai turu Jisas Kraes, ingeie a Huqegi nora tangaloi doluegi. 37Igimiu neu ilo na gineu lawua hi u vei beno. Gitomuegi i Jon u toretore huri na garuhigogona, siu lo tagugi hi a gineu lawua hi u teuvuigi lo vanue Kalili, mo vano turu na vanue Judia doluegi.” 38Siu igimiu neu ilo huri ve i Jisas ingeie ta Nasaret hi i God u vurei gina Vui Gogona ko gina huireana. Huri i God mo toga meie, u dige vataha na ute, u vei na gineu rau garea, vage ingeie u vagamwasoire hi rau toga lo vavai huireana noi Satan.
39“I gamai gau laqagi na leo huri na gineu doluegi hi rau vei vataha na togagi venue nora duvi Israel, vage lolo qatui venue lawua Jerusalem. A tangaloi rau toto vehavehaginie lo gai saroutu mo mate. 40-41Siu lo rani gaitoligi i God mo ragasie dena mateana. Mo haharaginie lawe gimiu hi u leowahe gimiu beno huri ve igimiu nein waregi sere na nona leo. I God he haharaginie tea lawe na tangaloi doluegi, nge ingeie u haharaginie lawe gamai hogosie, nge lo tagugi hi u maraga taligu dena mateana igamai gau gagani ko gau inuinu bubugi meie. 42Siu i Jisas u hora gamai huri ve gain digegi na Roro Garea lawe na tangaloi, igamai gau laqagi huri ve i God u leowahe Jisas ve vin vilegi na doridorire tangaloi hi ram mwaso ko meire rau mate. 43Siu a tangaloi veverarai doluegi hi rau veve rarai hurie vena, ve ihine tea mo ladohogo lui Jisas, i God vin lado vohogi na nona galegaleasi gina huireana lo henai Jisas.”
A tangaloi hatie duvi Israel ram lai na Vui Gogona
44Lune i Bita mo laqa mo sigei, a Vui Gogona mo hivo lure hi rau rongo na leona. 45A tangaloi a duvi Israel hi rau ladohogo lui Jisas ngerehi rau huri Bita dena qatui venue Joba ram garigi garagara huri God mo lingi na nona hogogi hi a Vui Gogona sulo tangaloi hatie duvi Israel. 46Huri rau rongora ram laqa gina leo wagiwegineu ram lailei hagagi God. I Bita mo laqa 47mo veve vena, “A tangaloi ngerehi rau lei na Vui Gogona mwerei gide dau leie. A tangaloi vin he vai lei tea ve na tugorora ve rain mese lai na garuhigogona gina wai.” 48Mwerehi ingeie mo veve lawera ve ran lai na garuhigogona lo henai Jisas Kraes. Siu ram navu denie ve ran toga bulu te mahogi qilodo.
ទើបបានជ្រើសរើសហើយ៖
LALAKOGI 10: HNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bible Society of the South Pacific, 2013
