Mark 2
2
Jesus kaa miinuwaachihaat naapeu ekaa uhchii aahchiyich
Matthew 9.1-8; Luke 5.17-26
1Namui mihchetu chiishikaau uhchi miyaaupayuuh ekw Jesus miin kaa piihchet aniyuu ihtaawiniyuu Capernaum kaa ishinihkaateyich. Iskutak maak memuushihaakanuut miin e chii pechi chiiwet ekw kaa mishihteyaachimunaanuyich miin e ihtaat. 2Nuwach maak mihchetu aweyuu chii pechi takushiniyuu, chek namui uhchi tepiskaatuyuuh aniyuu waaskaahiikaniyuu, mechim anite wiiwiitamihch ishkwaahtemihch chechii tawaayich. Chii kacheschimeu maak Jesus aniyuuh kaa takushiniitwaau, Chishemanituuh utayimuwiniyuu e aayimuutamuwaat. 3Uyuu maak mekwaach, neu naapeuch chii uhchi peshuweuch wiitaapewaau ekaa nisitusiyich utashpishimuwinihch e pimaashkushiniyich. 4Aniyuu maak kaa ishpish chii mihchetinaanuyich namui peshuch uhchii naateuch Jesus. Ekw kaa pakunepitahkwaau anite tahkuhch aniyuu waaskaahiikaniyuu nihaau tipiskuuch anit kaa niipuyich Jesus. Ekute kaa uhchi aashaapihchenaatwaau aniyuu naapeu ashpishimuwinihch e pimishiniyich. 5Jesus maak chii waapahtamuweu uyuuh naapeuh e ishpish taapwehtamiitwaauh ekw kaa itaat aniyuu naapeu ekaa kaa nisitusiyich, “Nikus, chiwepeyihtamaakuun chimachihtwaawinh.”
6Chii ihtaauch anit anichii wiishuwewiniyuu kaa chiskutamaachetwaau, e ishi maamituneyihtahkwaau, 7“Chekwaayuu uyuu wehchi ishi ayimit uu naapeu. Paashtaamuu uyuu kaa itwet. Namui wii naapeu kata chii wepeyihtamaacheu machihtwaawinh, mikw Chishemanituu kata chii wepeyihtamaacheu.”
8Jesus maak tiiwehch chii muushihtaau utahchaahkuhch uyuu e ishi maamituneyihtamiyich ekw kaa itaat, “Chekwaan an wehchi ishi maamituneyihtamekw. 9Taan yaakw wiyehtihch chechii itaakanuut uu naapeu ekaa kaa nisitushiit, ‘Chiwepeyihtamaakuun chimachihtwaawinh,’ maak itaakanuut ‘Wanishkaa, utinh chitashpishimuwin che ati pimuhteyin.’ 10Chika waapahtiitinaawaau Iinuu Ukusisa taapwe wiya e ayaat tipeyihchichewiniyuu utah aschiihch chechii wepeyihtamaachet machihtwaawinh.” Ekw kaa itaat aniyuu naapeu ekaa kaa nisitusiyich, 11“Chititin, pisikuuh, utinh chitashpishimuwin, che chiiweyin.”
12Tiiwehch maak chii uhchi pishikuu an naapeu mekwesiin anit e mihchetinaanuyich, kaa ati utinahk aniyeyuu utashpishimuwin ekw kaa maachiit. Misiwe maak anichii anit kaa ihtaatwaau chii miskaateyihtamihiikuuch uyuu kaa ispayiyich kaye chii maamihchimeuch Chishemanituu e itwetwaau, namui wiiskaat nuuhchi waapahtenaan uu e ispayihch.
Jesus kaa wiishaamaat Levi chechii nuushuushkaakut
Matthew 9.9-13; Luke 5.27-32
13Jesus maak kaau chii naashipeu aniyuu Galilee saakahiikaniyuu. Chii mihchetiyuu aweyuu e pechi nituwaapamikut ekw kaa chiskutamuwaat. 14Aniyuu maak e ati pimuhtet chii utihteu naapeu chisheuchimaau shuuliyaayuu kaa maamuushtinamiyich e itaapatisiyich. Levi chii ishinihkaasuyuuh. Alphaeus chii ishinihkaasuyuuh uhtaawiyuuh. Mekwaach anite umasinahiicheukamikuhch chii apuu uu Levi. Ekw kaa itaat Jesus, “Pechi papaawiicheuh.” Chii pishikuu maak Levi kaa ati wiichewaat Jesus.
15Paatimaa maak Jesus ekw maak mihchetu uchischinuhamuwaakanh e chii pechi wiicheukut chii miichisuuch anite Levi wiichiihch. Ekut kaa ihtaayich kaye mihchet aniyuuh chisheuchimaau shuuliyaayuu kaa maamuushtinamiitwaauh kaa itaapatisiyich kaye ekut kaa ihtaayich aniyuuh kutak aweyuuh kaa machaatisiyich. 16Ekw anichii wiishuwewiniyuu kaa chiskutamaachetwaau aniyuuh Phariseeh kaa aapachihiikutwaau chii waapameuch Jesus e wiichimiichisuumaayich aniyuuh Chisheuchimaau shuuliyaamiyuu kaa maamuushtinamiitwaauh kaa itaapatisiyich kaye kutak aweyuuh kaa machaatisiyich. Chii kakwechimeuch uchischinuhamuwaakaniyuu e itaatwaau, “Chekwaan wehchi wiichimiichisuumaat uyuuh kaa Iteyihtaakusiitwaauh.”
17Jesus maak chii pehtaweu uyuu e itweyich ekw kaa itaat, “Namui nituweyimeuch nituhkuiin anichii awenichii ekaa kaa aahkusitwaau, mikw anichii kaa aahkusitwaau eukunich netuweyimaatwaau nituhkuiin. Namui anichii kaa kuiskutaatisiitwaau wehchi takushiniyaan. Nichii takushin chechii nituumakwaau umachihtwaauch chechii kweskaatisiitwaau.”
E aayimuutech ekaa miichisut awen mikw chechii ayimihaat
Matthew 9.14-17; Luke 5.33-39
18Peyakwaau mekwaach John siikahaahtaacheu uchischinuhamuwaakanh ekw maak anichii Phariseech uchischinuhamuwaakanawaauh ekaa miichisutwaau, chii ihtaayuuh aweyuu e ishi kakwechimikut Jesus, “Chekwaan wehchi ekaa miichisuyich John uchischinuhamuwaakan kaye anichii ayimihewin wiishuwewiniyuu kaa chiskutamaachetwaau uchischinuhamuwaakanawaauh. Chiya maak chichischinuhamuwaakanich namui ihtuuch wiyawaau ekaa miichisutwaau.”
19Jesus chii ishi nishkweushiheu e itaat, “Mwehch anite mekwaach e niipuunaanuuhch chika chii ihtuuch aa ekaa chechii miichisutwaau anichii kaa wiishaamaakanuutwaau e makushaanuyich. Namui naanituu. Michihpin e ihtaayich anit e ihtaatwaau aniyuu uschinaapewaan namui mechim kata uhchi iteyihtamuch ekaa chechii miichisutwaau. 20Paatimaa kata utihchipayuu an e chiishikaach che pechi utinaakanuut an uschinaapewaan ekut maak yaakw an e chiishikaach ekaa che uhchi miichisutwaau.
21“Namui awen aapachihtaau machunishiyuu ekaa uhchi uchipayiniyich e wii miishahahk akuhpischiishiyuu. Wesh uyuu miishihiikaachete uchipayiyiche maak etituu kata piikupayuu an akuhp taanita anit kaa piikupayihch. 22Kaye maak namui awen piihtaapuutaau e ushkaakamiyich shuuminaapuuyuu anite e weskachuuniyikwaauh usikai puutaahch. Wesh uyuu ihtite mitun kata paahkaapayiniyuuh aniyuu usikaipuutaih, ekw maak misiwe che nanaayuuhch an shuuminaapuu kaye aniyuuh usikaipuutaih. Namui maak miin kata chii aapatanh. Namui awen uyuu ihtuu wesh e uskaakamihch shuuminaapuu anite e ushkaakwaau usikaipuutaahch piihtaapuutaakanuu.”
Jesus kaa aayimuutahk e ayimiheuchiishikaayich
Matthew 12.1-8; Luke 6.1-5
23Peyakwaau e Jewa ayimiheuchiishikaayich Jesus chii pimuhteu anite pahkweshikaniminaahtikw e nihtaauchihtaakanuyikwaauh. Uchischinuhamuwaakanh chii wiicheukuu. Aniyuu maak e ati pimuhteyitwaau chii nanaatwaanamiyuu anit e wanishkwaaskuniyikwaau uyuu pahkweshikaniminaahtikw. 24Ekw Phariseech kaa itaatwaau Jesus, “Chekwaan wehchi ihtuutamekw an chekwaan atuch chipaa uhchi ihtuutaakanuu e ayimiheuchiishikaach.”
25Jesus chii nishkweushiheu e itaat, “Chichii ayimihtaanaawaache masinahiikanihch anit tepaachimaakanuut aniyaa chisheuchimaau David, kaye maak misiwe aniyuuh kaa wiicheukut taan kaa ihtitwaau iskutak kaa wii miichisutwaau. 26Chii piihcheuch Chishemanituu uwaaskaahiikanimiihch ekw David kaa muwaat aniyuu kaa payehchisiyich aaihkunaau, ekw kaa ashamaat aniyuuh uwiichewaakanh. Mekwaach Abiathar chii chisheayimiheuchimaawiiche uyuu. Mikw maak ayimiheuchimaauch iteyihtaakusuuch chechii muwaawaatwaau uyuu aaihkunaau, wesh ekun e itashtech ayimihewin wiishuweusinahiikanihch.”
27Ekw uyuu maahchishtai kaa ati itwet Jesus, “Chishemanituu chii ushihtaau e ayimiheuchiishikaayich che wiichihiikuyich naapeu, namui uhchi ushiheu naapeuh mikw ayimiheuchiishikaau wiishuwewinh chechii nanaakatuweyihtamiyich. 28Iinuu Ukusisa maak, mechim e ayimiheuchiishikaayich tipeyihtam.”
ទើបបានជ្រើសរើសហើយ៖
Mark 2: crjrNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.