Mark 3
3
Naapeu kaa maaskaniyich utihchii
Matthew 12.9-14; Luke 6.6-11
1Peyakwaau miin Jesus e piihchet Jewa ayimiheukamikuhch chii ihtaayuuh anit naapeu e maaskaniyich utihchiyuu. 2Chii ihtaayuuh kaye anit aweyuuh e wii naanituu mamishimikut Jesus ekw naashch kaa naanaakachihiikut chechii aahch miinawaachihiiweyikwen e ayimiheuchiishikaayich. 3Jesus chii iteu aniyuu naapeu kaa maaskaniyich utihchiyuu, “ashtam ute niikaanaanihch.” 4Ekw Jesus kaa kakwechimaat aniyuu iinuu anit kaa ihtaayich, “Taan e itashtech wiishuwewinihch chechii ihtuutamuwaauhkupane e Jewa ayimiheuchiishikaach. Taan maauch meywaashich chechii ihtuutaman chekwaan. E miyutuutaman maak e machituutaman, e pimaachihtaayin maak e wanaachihtaayin.” Anichii maak anit kaa ihtaatwaau namui mitun uhchi chishtuuch. 5Jesus chii chishuwaasuu e kanawaapamaat eyuu maak chii misimitehiiskaakuu aniyuu e siipihtamiyich. Ekw kaa itaat aniyuu naapeu kaa maaskaniyich utihchiyuu, “Tashupayihtaah chitihchii.” Chii tashupayihtaau maak an naapeu aniyuu utihchii, ekw maak kaa miinuwaachihtaakanuyich aniyuu utihchii, mwehch aniyuu kutachiyuu utihchii kaa ishi miywaayich ekun kaa ishinaakuniyich aniyuu utihchii kaa maaskaniyich.
6Ekw anichii Phariseech chii ati wiiwiyuuch anit Jewa ayimiheukamikuhch. Ekw tiiwehch kaa nituwaapamaatwaau aniyuuh aweyuuh Herod kaa wiichihaayich ekw kaa nishtawiitwaau. Chii aayimuutamuch taan chipaa chii ihtuuch chechii nipahaatwaau Jesus.
Yaayeu saakahiikanihch kaa mihchetinaanuyich Jesus e nituhtawaakanuut
7Jesus chii chistuhteu e wiicheukut uchischinuhamuwaakanh, ekw anite Galilee saakahiikanihch kaa ituhtetwaau. Mihchetu maak aweyuu chii nuushuushkaakuuch. Nanaahkuu chii uhtuhteyuu, Galileehch chii uhtuhteyuu kaye Judeahch, 8kaye Jerusalemihch, Idumeahch, kaye maak akaamihch aniyuu Jordan siipiiyuu chii uhtuhteyuuh. Eyuu maak Tyre ekw maak Sidon kaa ishinihkaateyikwaauh ihtaawinh chii uhtuhteyuuh. Chii pehtamuwaakupanenich uchii awenichii misiwe taan kaa aihtiyich Jesus ekw kaa wii pechi nituu nituhtawaatwaau. 9Jesus chii iteu uchischinuhamuwaakanh chechii ayeskuushtaayich utiyuu chek nituweyihtaakuniyiche chechii puusit wesaa siihchiskaakute aweyuu. 10Wesh aniyuu mihchetu aweyuuh e chii miinuwaachihaat ekw mihchetu kutak aweyuuh nanaahkuu e itaaspineyich kaa pechi kakuhkunituyich e wii taahtinikut. 11Machiahchaahkuch maak michihpin wiyaapamaatwaau Jesus chii ihtuutaweuch aniyuuh aweyuuh kaa piihchishkuwaatwaau chechii pahchishiniyich uhchishkuu Jesus e ihtaayich ekw kaa uhchi tepwetwaau anichii machiahchaahkuch e itwetwaau, “Eukw chiya Chishemanituu Ukusisa.” 12Jesus maak suuhk chii ayimiheu e itaat ekaa chechii wiihtamuwaayich aweyuu awen e aawit.
Jesus kaa wiyaapamaat niishushaap Apastalh
Matthew 10.1-4; Luke 6.12-16
13Ekw Jesus kaa shaakachuwet wachiyuu. Ekute kaa wiishaamaat aniyuu kaa wiyaapamaat. Chii naatikuu maak. 14Ekw niishushaap kaa wiyaapamaat chechii papaawiicheukut kaye chechii chihchitishahwaakanuyich chechii kacheskweyich. 15Kaye chii miyeu tipeyihchichewiniyuu chechii wiiwiitishihwaayich machiahchaahkwa. 16Maauyuuh kaa wiyaapamaat, Simon, eukun uyuu Peter kaa ishinihkaataat Jesus, 17ekw miin James, Zebedee ukusiyuuh, ekw maak John, James wiichishaanh. Uyuuh Jamesa ekw maak John Boanerges chii ishi nispiwiiheu Jesus. Uyuu maak kaa ishi nispiwiihaat nimischuuch ukusiwaauh ishi itweshtamaataakanuuyuu. 18Ekw miin uyuuh kaa wiyaapamaat, Andrew, Philip, Bartholomew, Matthew, Thomas, ekw maak James. Uu maak James, Alphaeus chii ishinihkaasuyuuh uhtaawii. Thaddaeus chii ishinihkaasuu miin kaa wiyaapamaakanuut, ekw miin kutak Simon kaa ayimihewaatisiit kaa ishinihkaataakanuut, 19ekw maak Judas Iscariot an che wiyeshipachishtinaat Jesus, eukw uyuu miin kaa wiyaapamaat.
Taanite kaa uhtinahk Jesus umaskuusiiwin
Matthew 12.22-32; Luke 11.14-23; 12.10
20Ekw kaa chiiwet Jesus taanite aniyuu mekwaach kaa ihtaat. Ekw miin kaa mihchetiyich aweyuu e pechi maausikuyich. Chek namui mechim uhchi ishpishiyuuch Jesus ekw maak uchischinuhamuwaakanh chechii miichisutwaau. 21Iskutak maak aniyuuh kaa peshutaahkumaat piyehtamiyich uyuu chii nituwaapamikuu chechii chistuhtahiikut anit uhchi wesh chii iteyimikuu aweyuu ekaa kuiskukuteyich umituneyihchikan. 22Kaye anichii wiishuwewiniyuu kaa chiskutamaachetwaau mekwaach chii ihtaauch anit. Jerusalemihch chii uhtuhteuch. Chii iteuch maak, “Beelzebul, machi ahchaahkuch uchimaamuwaauh piihchishkaakuu. Eukunh aniyuuh maayikut mitewiniyuu chechii wiiwiitishihwaat machiahchaahkwa.” 23Ekw Jesus kaa wiishaamaat ekw kaa ayimihaat tipaachimuwin chiskutamaachewinh e aapachihtaat, “Taanite chechii uhchi wiiwiitishihwaat machimanituu machimanituuh. 24Wesh michihpin awenichii peyakw aschiiyuu kaa uhchiitwaau machipaihkahtaatutwaawenich namui mitun kata uhchi miyupayuuch anit utaschiiwaahch. 25Maak peyakutenuu awenichii machipayihkahtaatutwaawenich namui mitun kata uhchi miyupayuuch. 26Machimanituu maak muyaam e nishkuushtaasut ishinaakusite, mitun e papahkaanihiisut namui kata chii ishikaapuu. Kata piikupayiniyuu uchimaawin. 27Namui mikw kata chii ishi piihcheweu awen e suuhtisiyich naapeu wiichiihch chechii nituu kachemutamuwaat, paatishkaan maahkupitaate ekw yaakw chechii utinamuwaat taan e ishi tipiyeusiyich.”
28“Taapwe wesin chititinaawaau, kata wepeyihtamuwaakanuuch awenichii misiwe umachihtwaawinawaauh nesht taan e ishi machaayimuumaatwaau aweyuuh. 29Mikw maak an awen che paashtaamaakwe Kaa payehchisiyich Ahchaahkwa namui wiiskaat kata uhchi wepeyihtamuwaakanuu. Kaachiche kata nishuuwanaachimaakanuu uyuu e ishi machituutahk.” 30Eukw uyuu kaa ishi wiihtamuwaat Jesus aniyuuh ayimihewin wiishuwewiniyuu kaa chiskutamaacheyitwaauh wesh chii itikuu e piihchishkaakut machiahchaahkwa.
Aweyuuh Jesus e ukaawiyit kaye aweyuuh e wiichishaanit
Matthew 12.46-50; Luke 8.19-21
31Chii uhchi takushiniyuu Jesus ukaawii kaye wiichishaanh. Wiiwiitamihch anite chii niipuuyuuh ekw kaa piihtetishahwaayich aweyuuh chechii nituu wiishaamaayich Jesus. 32Chii mihchetiyuuh aweyuuh e waaskaapishtaakut Jesus. Ekw kaa itikut, “Wiiwiitamihch aahchin ihtaauch chikaawii ekw maak chiichishaanich, chiwiishaamikuch.” 33Ekw Jesus kaa itwet, “Awen maak nikaawii kaye awenichii niichishaanich.” 34Misiwe chii aitaapuu e kanawaapamaat aniyuu aweyuu kaa waaskaapishtaakut ekw kaa itwet, “Maauchii niichishaanich kaye eukuu nikaawii. 35An awen che ihtuutamukwe Chishemanituu utiteyihtamuwiniyuu eukun an wiichishaaniyaan kaye eukun an wiichishaaniskwemiyaan kaye eukun an wekaawiyaan.”
ទើបបានជ្រើសរើសហើយ៖
Mark 3: crjrNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.