John 20
20
Kaa pisikwaach chiipaikamikw
Matthew 28.1-8; Mark 16.1-8; Luke 24.1-12
1An kaa chisheayimiheuchiishikaach wiipach maak miin e ati waapahch, eshkw e ukaach anite chiipaikamikuhch chii ituhteu Mary Magdalene kaa waapamaat aniyuu asiniih e chii iichehtahaakanuyikupanen anit e uhchi piihchaanuyich. 2Kaa chihchipahtaat kaa nituwaapamaat Simon Peter ekw maak aniyuu kutak chischinuhamuwaakan Jesus kaa saachihaayich ekw kaa itaat uyuuh, “Chii utinamuweuch Utipeyihchikeu wiiyuuyuu namui maak nichischeyihtamuwaan taanite kaa chiskashtaawaatwaau.”
3Ekw Peter kaa wiiwiit iskutak kaa itweyich uyuu e wiicheukut aniyuu kutak chischinuhamuwaakan. Anite chiipaikamikuhch ekute kaa ishi chistuhtetwaau. 4Taapishkun chii chihchipahtaauch mikw maak chii aakuschipayistaakuu Peter aniyuu kutak chischinuhamuwaakan ekw wiya niishtam kaa paapahtaayich anit. 5Iskutak maak piyaapahtaat anite an kutak chischinuhamuwaakan chii nuwewiyuu anite e piihtaapahtahk aniyuu chiipaikamikuyuu. Mikw machunishiyuu chii waapatam e ashteyich anite. Namui uhchi piihcheu. 6Chek kaa uhchi paapahtaat Simon Peter ekw kaa piihchet wiya anite. Chii waapahtam aniyuu machunishiyuu anit e ashteyich. 7Ekw aniyuu kutachiyuu machunishiyuu kaa aapataniyich Jesus kaa piskweyetinikanuyich ustikwaan tipaan anite chii ashteyuu e chii nuutamechinikanuyikupane. 8An kutak chischinuhamuwaakan, an niishtam kaa paapahtaat anit, kaye wiya chii piihcheu anite, kaa waapahtahk kaye kaa ati taapwehtahk e chii uhpiskaayikupanen. 9Uyuu maak mekwaach eshkw namui uhchi nisituhtamuch anit aniyuu Chishemanituu utayimuwinihch kaa itashteyich miin che wanishkaayich. 10Ekw kaa chiiwetwaau wiichiwaawaahch uchii chischinuhamuwaakanich.
Jesus kaa nuukushiishtawaat Mary Magdalene
Matthew 28.9, 10; Mark 16.9-11
11Ekut anit wiiwiitamihch aniyuu chiipaikamikuyuu kaa niipuut Mary e maatut. Aniyuu maak e maatuut chii nuwewiyuu e piihtaapahtahk aniyuu chiipaikamikuyuu. 12Ekut kaa waapamaat niishu enchil e waapaaspisuyich e apiyich anit Jesus kaa chiskashtaakanuyich wiiyuu. Peyakw anite e chii ishi ustikwaanuyich chii apuu ekw an kutak anite itehche e chii ishi usitiihch ekute kaa apit. 13Ekw kaa itikut aniyuu enchil, “Iskweu, Chekwaan wehchi maatuuyin.” Ekw Mary kaa itaat, “Chii utineuch Nitipeyihchikem namui maak nichischeyimaauch taanite kaa chiskahaatwaau.”
14Uyuu maak kaa itwet chii iicheskweyuu kaa waapamaat aweyuu e niipuyich anite uspiskunihch, Jesus maak aniyuu mikw namui uhchi nisituunaweu. 15Chii itikuu maak, “Iskweu, chekwaan wehchi maatuuyin. Awen kaa nanituwaapamat.” Kaa kanawaapamaat Mary aniyuu nihtaauchihchikanh kaa naanaakachihtaayich e iteyimaat, ekw kaa itaat, “Pechi wiihtamuu maa taanite kaa ahiit ekw maak che nituwaapamak.”
16“Mary,” chii iteu Jesus. Chii kweschikaapuu Mary ekw kaa itaat aniyuu Jesus Hebrew e ishi ayimit, “Rabboni,” chii iteu. Uu maak Rabboni kaa iinaanuuhch e itweshtamuwaataakanuuhch Utipeyihchikeu iinaanuu.
17Jesus kaa itwet, “Ekaawii taahtin wesh eshkw namui Nuuhtaawii e ihtaat nuuhchii ishi uhpiskaan. Nituwaapamach niichishaanich che wiihtamuutwaau che uhpiskaauch Nuuhtaawii kaye chiyawaau Kuuhtaawiiwaau e ihtaat ishi, Nichishemanituum kaye chiyawaau Chichishemanituumiwaau.”
18Mary Magdalene kaa chistuhtet e naanituwaapamaat aniyuu chischinuhamuwaakan ekw kaa wiihtamuwaat e itaat, Utipeyihchikeu nichii waapamaau. Chii wiihtamuweu kaye aniyuu taan kaa itikut che itaat.
Jesus kaa nuukushiishtawaat uchischinuhamuwaakanh
Matthew 28.16-20; Mark 16.14-18; Luke 24.36-49
19Aniyuu maak e ati utaakushiyich aniyuu e chiishikaayich chii nishtawiyuuch anichii chischinuhamuwaakanich. Chii aataapishkahuusuuch mekwaach aniyuu e nistuuwiitwaau wesh chii kushteuch aniyuu Jewa uchimaau. Sischikuuch maak chii uhchi waapameuch Jesus e niipuyich anit e ihtaatwaau. Chii itikuuch maak, “Chiyaameyihtamukw.” 20Iskutak maak kaa chiishi waachiyemaat aniyuu uchischinuhamuwaakanh ekw kaa waapahtiyaat utihchii kaye uhpimeyuu. Nuwach maak chii sichiyeyihtamuch e chii waapamaatwaau utipeyihchikemuwaau. 21Miin kaa ayimihaat aniyuu uchischinuhamuwaakanh e itaat, “Chiyaameyihtamukw. Mwehch Nuuhtaawii kaa pechi itishahuut chiyaameyihtamuwinihch ishi kaye niya chititishahutinaawaau chiyaameyihtamuwinihch ishi.” 22Ekw anite e ihtaayich kaa ishi ayehet kaa itaat, “Utinaahkw Kaa payehchisit Ahchaahkw. 23Wepeyihtamuwekwe awen chika wepeyihtamuwaakanuu, ekaa wepeyihtamuwekwe namui chika uhchi wepeyihtamuwaakanuu.”
Jesus ekw maak Thomas
24An maak peyakw chischinuhamuwaakan Thomas kaa ishinihkaasut aayaahch e ishinihkaataakanuut peyakw an kaa niishitwaau chii ishinihkaataakanuu, namui uhchi ihtaau wiya Jesus kaa takushiniyich. 25Aniyuu maak e wiihtamaakut aniyuuh kutak chischinuhamuwaakanh e chii waapamaayich Jesus, namui uhchi taapwehtaweu. Chii iteu, “Namui nika uhchi taapwehten paatish chii taahtinamuche utihchiih anit kaa chiistaaskuhwaakanuut kaye paatish chii taahtinake anit uspakaahch.”
26Yaanaaneu chiishikaau maak ishpish ekw miin kaa nishtuwiitwaau anichii chischinuhamuwaakanich. Thomas maak kaye wiya ekut kaa ihtaat. Chii aataapishkahwaakanuuch chishtuhkanihch yaapach maak Jesus chii pechi piihcheu kaa pechi uhchishkuukaapuushtawaat. 27Kaa itaat aniyuu Thomas, “Taahtinh nitihchii kaye ute uhpimeyuu pechi taahtinh, ekun ekw ishpish aanuwehta, taapwehta ekw.”
28Ekw Thomas kaa nishkweushihaat e itaat, “Nitipeyihchikem kaye Nichishemanituum.”
29Jesus kaa itaat, “Chitaapwehten aa mikw e pechi waapamiin. Shaweyihtaakusuuch anichii kaa taapwehtahkwaau aat ekaa uhchi waapamitwaau.”
Taan e itaapatahch uu masinahiikan
30Jesus uchischinuhamuwaakan mihchetu chii waapamikuu maamishkaach chekwaayuu e ihtuutahk ekaa uhchi masinahiikanuyikwaau utah masinahiikanihch. 31Eukw uyuuh kaa masinahiikanuukwaau chechii taapwehtamekw eukw uyuuh Jesus Chishemanituu Ukusisa ekw maak taapweyimekwen che ayaayekw pimaatisiiwin.
ទើបបានជ្រើសរើសហើយ៖
John 20: crjrNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
