John 21
21
Jesus kaa nuukushiishtawaat niishwaashch uchischinuhamuwaakanh
1Paatimaa maak ekw miin Jesus kaa nuukushiishtawaat uchischinuhamuwaakanh anite aniyuu saakahiikaniyuu Tiberias kaa ishinihkaateyich. Maaute maak kaa ishi nuukushiishtawaat. 2Maamuu chii ihtaauch uchii misiwe, Simon Peter, Thomas, an Kaa niishitwaau kaa ishinihkaataakanuut, Nathanael, an Cana kaa uhchiit anite Galilee aschiihch kaa ihtakuniyich, kaye aniyuu niishu Zebedee ukusisa ekw maak niishu kutakach chischinuhamuwaakanich. 3Ekw Simon Peter kaa itaat aniyuu chischinuhamuwaakanh, “Nika nituu nuutamesen.” Kaa itikut, “Chika wiicheutinaan.” Kaa puusitwaau. Iskan tipiskaau maak chii ihtaauch ekaa uhchi pitahuyaatwaau. 4Iskutak maak e ati petaapaniyich, Jesus chii niipuu anite yaayeu, mikw namui uhchi chischeyimeuch anichii chischinuhamuwaakanich Jesus aniyuuh. 5Chii itikuuch maak, “Eshkw aa namui chipitahuyaanaawaau.” “Namui,” chii iteuch.
6Ekw kaa itaat, “Chika pitahuyaanaawaau anite chinihiiwiniwaahch itehche ishi pakashtawehekwe an chitahiipiiwaau.” Kiipaa kaa pakashtawehwaatwaau aniyuu utahiipiiwaauh. Namui uhchi saupiteuch aniyuuh utahiipiiwaau iskutak wehchipitaatwaau e ishpish chii mihchetiyich unamesimuwaauh.
7Aniyuuh maak chischinuhamuwaakan Jesus kaa saachihaat, chii iteu aniyuu Peter, “Utipeyihchikeu an.” Iskutak maak Simon Peter piyehtahk Utipeyihchikeu e aawiyich aniyuuh chii pushchishkam utakuhp aniyuu kaa manahk che aapatisit, ekw kaa pakashtawekwaashkuhtit. 8Ekw anichii kutakach chischinuhamuwaakanich kaa pechi naatakahahkwaau, e utaapetwaau aniyuu utahiipiiwaauh e saakaschineyich namesa. Namui maak naashch taauch uhchi ihtaauch, wiyesh nishtwaau mitaahtumitanuu misit chii ishpishinaakusiichenich anit uhchi yaayeu. 9Iskutak maak kaa kapaatwaau chii waapahtamuch ishkuteyuu namesa e takashwaakanuyich anit ekw maak aaihkunaauh. 10Ekw Jesus kaa itikutwaau, “Peshuwaahkuch anichii pasch namesach kaa pitahuyaayekw.”
11Ekw Simon Peter kaa akwaasipitaat aniyuu ahiipiih. Wiyesh maak mitaahtumitanuu miin niyaayinumitanuu nishtu chii tashiichen aniyuuh namesa. Aat maak aniyuu e chii ishpish saakaschineyich namesa namui yaapach uhchi piikwepayuuh aniyuu utahiipiiwaauh. 12Ekw kaa itikutwaau Jesus, “Aashtamukw, pechi miichisukw.” Namui maak waachipeyakw anichii chischinuhamuwaakanich uhchi wii iteuch, “Awen chiya.” Wesh chii chischeyimeuch Utipeyihchikeu aniyuuh. 13Jesus maak chii naateu, kaa utinaat aniyuu aaihkunaauh ekw kaa maamaatinamuwaat, kaye aniyuu namesa ekun kaa ihtuutawaat.
14Eukw maak uyuu nishtwaau kaa nuukushiishtawaat Jesus aniyuuh uchischinuhamuwaakanh kaa ishpish wanishkaat nipuwinhch uhchi.
Jesus ekw maak Peter
15Iskutak maak kaa chiishi miichisutwaau, Jesus chii iteu Simon Peter, “Simon, chii kaa ukusiitutaask John, uste aa niya chisaachihiin ishpishaat uchii.” Ekw Simon Peter kaa ishi nishkweushihaat, “Ehe, Utipeyihchikeu, chichischeyihten e saachihiitaan.” Jesus maak chii iteu, “Nanaakachihiich nimaanishchaanishimach.” 16Niishwaau maak miin Jesus chii iteu aniyuu Simon Peter, “Simon, John kaa ukusiitutaask, chisaachihiin aa.” Ekw kaa ishi nishkweushihaat, “Ehe, Utipeyihchikeu, chichischeyihten e saachihiitan.” Jesus maak chii iteu, “Nanaakachihiich nimaanishchaanishimach.” 17Nishtwaau maak miin Jesus chii iteu, “Simon, John kaa ukusiitutaask, chisaachihiin aa.” Ekw Peter naashch kaa macheyihtahk wesh ekw nishtwaau kaa kakwechimikut Jesus e itikut, “Chisaachihiin aa.” Ekw kaa itaat, “Utipeyihchikeu, misiwe chekwaan chichischeyihten, chichischeyihten e saachihiitaan.” Jesus maak chii itikuu, “Nanaakachihiich nimaanishchaanishimach. 18Kuiskw chiwiihtamaatin, eshkw e chii uschiniichiiwiin mikw taan waa aihtiin chichii ihtin kaye mikw taanite waa ituhteyin ekute kaa ituhteyin. Iskutak maak chisheinuuyine, suwanischeyine maak chika maahkupitaakanuu chitihchii ekw che ituhtahiikuyin anite ekaa wii ituhteyin.” 19Uyuu maak Jesus kaa itwet chii nituweyimeu chechii chischeyihtamiyich taanite che ishi nipiyich chechii uhchi chisteyimaakanuyich Chishemanituu. Ekw Jesus kaa itaat, “Pechi papaawiicheuh.”
Jesus ekw maak an kutak chischinuhamuwaakan
20Peter chii kweschikaapuu kaa waapamaat aniyuu kutak chischinuhamuwaakan, aniyuu Jesus kaa saachihaayich. Eukun aniyuu kaa aaspichisimuyich Jesus e ihtaat mekwaach kaa miichisutwaau kaye kaa ishi kakwechimaat, “Utipeyihchikeu, awen che wiyeshipachishtinisk.” 21Iskutak wiyaapamaat Peter uyuu naapeu chii kakwechimeu Jesus, “Utipeyihchikeu, uu maak wii naapeu.”
22Jesus chii itikuu, “Nituweyimike chechii pimaatisiit paatish miin takushinuuche, taan maak chechii ihtiyin chiya. Pechi nuushuushkuu chiya.”
23Ekw kaa mishihtepayihch tipaachimuwin anit mekwesiin wiichishaanimaauch e ihtaatwaau aniyuu ekaa che uhchi nipit uu chischinuhamuwaakan. Mikw maak namui uhchi itwekupane Jesus ekaa che uhchi nipiyich. Chii iteu, “Netuweyimaauche eshkw chechii pimaatisiit takushinuuche, taan maak chechii ihtiyin chiya.”
24Eukun uu chischinuhamuwaakan kaa tipaatutahk uyuuh chekwaayuuh, kaye kaa masinahahk uyuuh chekwaayuuh. Chichischeyimaanuu maak e taapwemakaniyich misiwe taan kaa ishi wiihtahk.
E ati chiishipayihch uu miywaachimuwin
25Mihcheniyuu maak yaapach kutak chekwaayuu Jesus e chii ihtuutahk. Misiwe paahpeyakw waawiihtaakanuyikwaau chekwaayuuh taan kaa ihtit, namui chipaa uhchii tepashteuh utah aschiihch ushihtaakanuuhkwaau masinahiikanh.
ទើបបានជ្រើសរើសហើយ៖
John 21: crjrNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
