John 19
19
1Ekw Pilate kaa itashuwaataat Jesus chechii chistuhtahaakanuyich chechii nituu pishishtehwaakanuyich. 2Anichii maak shimaakanishach chii ushihtaauch uchimaau astutiniyuu kaa kaasutewaayikwaau niipisiyaahtikw e aapachihtaatwaau. Kaa pushchishkamutiyaatwaau Jesus aniyuu astutiniyuu. Kaye e chinwekaniyich akuhpiyuu e mihkwekaniyich chii pushchishkamutiyeuch. 3Chii maayeyimeuch mwehch e maamihchimaatwaau e itaatwaau, “Eukw chiya Jewa iinuuch uchisheuchimaamuwaauh.” Kaye chii utaamihkwehweuch utihchiiwaau e aapachihtaatwaau.
4Miin kaa wiiwiit Pilate kaa itaat aniyuu Jewa iinuuh, “Miin chika pechi wiiwiihtahaakanuu uu naapeu chechii waapahtamekw ekaa miskamuch taan chechii ishi nishuuwanaachimak niya wii.” 5Ekw Jesus kaa pechi wiiwiit anit aniyuu chisheuchimaaukuuhpaaneu wiichiyuu e chichishkahk aniyuu uchimaau astutiniyuu kaa kaasutewaayikwaau niipisiyaahtikuhch kaa uhchi ushihtaakanuyich kaye maak aniyuu kaa chinwekaniyich akuhpiyuu kaa mihkwekaniyich e chichishkahk. Ekw Pilate kaa itaat aniyuuh Jewa iinuuh, “Kanawaapamaahkw maa uu naapeu.”
6Anichii maak kaa niikaanapitwaau ayimiheuchimaauch ekw maak anichii Jewa iinuuh kaa niikaanishkuwaatwaau iskutak wiyaapamaatwaau Jesus, chii tepweuch e itwetwaau, “Chiistaaskuhwaahkw, chiistaaskuhwaahkw.” Pilate chii iteu, “Chiyawaau nituu chiistaaskuhwaahkw. Namui nimiskamuwaan taan kaa ishi machituutamukwe.”
7Ekw anichii Jewa iinuuch kaa nishkweushihaatwaau Pilate e itaatwaau, “Nitayaanaan wiishuwewin, itashteu anit niwiishuwewinaahch chechii itashuwaanuyich chechii nipahaakanuut aniyuu e chii itwet wiya e aawit Chishemanituuh Ukusisa.”
8Pilate maak kaa pehtahk uyuu e iinaanuyich, etituu chii sechisuu. 9Ekw miin kaau kaa piihchet anite chisheuchimaaukamikuhch ekw kaa kakwechimaat Jesus, “Taanite wehchiyin.” Namui uhchi chistuu Jesus. 10Ekw Pilate kaa itaat aniyuu Jesus, “Namui aa chiwii ayimihiyin. Namui aa chichischeyihten e ayaayaan tipeyihchichewin chechii itashuweyaan chechii pachishtinikuyin maak chechii chiistaaskuhukuyin.”
11Ekw Jesus kaa nishkweushihaat e itaat, “Mikw chesuwaat Chishemanituu e chii miisk aniyuu chechii ihtuut eukun wehchi ihtakuhch an chechii ihtiyin. An maak awen chiya e ihtaayin kaa ishi pachischisuwaasit eukw etituu mechi ihtuutahk.”
12Uyuu maak kaa itweyich Jesus Pilate, chii wii pachishteneu. Ekw mikw anichii Jewa iinuuch kaa tepwetwaau e itwetwaau, “Paachishtinekwe Jesus namui chiwiichewaakanitutawaawaau chisheuchimaau siisar. Wesh awen kaa chisheuchimaauhiisut namui nahiihtaweu Caesar.”
13Iskutak maak Pilate piyehtahk aniyuu kaa ishi tepuweyich aniyuu Jewa iinuuh wiiyawiitimihch chii ituhtaheu aniyuu Jesus ekw kaa waweyapit anit wiyaaskunichesuu tehtapuwinihch, anite e asiniihkaanuuniyich e chii asteyich. Hebrew e ishi ayiminaanuuhch Gabbatha ishinihkaataakanuu anit aniyuu kaa asiniihkaanuuniyich. 14Mekwaach maak an e chiishikaach miyaaskachewin makushewin e ayeskuushtaakanuuhch chiishi chiishikaau. Chekaat maak chii aapihtaachiishikaayuu Pilate kaa itaat aniyuu Jewa iinuuh, “Kanawaapamaahkw maak uu chichisheuchimaamuwaau.”
15Chii ishi taachikweuch maak anichii Jewa iinuuch, “Nipahaahkw, nipahaahkw, chiistaaskuhwaahkw,” e itwetwaau. Ekw Pilate kaa itaat, “Chinituweyiminaawaau aa chechii pachishtinak chichisheuchimaamuwaau chechii chiistaaskuhwaakanuut.” Ekw aniyuuh kaa niikaanapitwaau ayimiheuchimaauh chii nishkweushihiikuu Pilate e itikut, “Mikw Caesar nuuchisheuchimaaminaan namui kutak awen.”
16Ekw Pilate kaa pachishtinaat Jesus anite aniyuu shimaakanisha e ihtaayich chechii chiistaaskuhwaatwaau aashiteyaahtikuhch. Ekw kaa chistuhtahaatwaau.
Jesus kaa chiistaaskuhwaakanuut aashiteyaahtikuhch
Matthew 27.32-44; Mark 15.21-32; Luke 23.26-43
17Kaa chistuhtahaatwaau aniyuu Jesus e pimuhtahaayich utaashiteyaahtikumiyuu anite kaa ituhtahaatwaau “Chiipaistikwaan kaa ihtakuhch” kaa ishinihkaateyich. Uu maak “Chiipaistikwaan kaa takuhch” kaa ishinihkaatech, Hebrew e ishi ayiminaanuuhch “Golgotha” iinaanuu. 18Ekute maak anite kaa chiistaaskuhwaatwaau kaye maak niishu naapeu chii chiistaaskuhwaakanuuyuu kaa chimayaakanuyich iituu anit e ihtaat. 19Ekw Pilate kaa masinahahk masinahiikaniyuu chechii chikamuhtaakanuyich anit ishpimihch Jesus utaashiteyaahtikumiihch e itashteyich, “Jesus Nazareth kaa uhchiit eukw uyuu Jewa iinuuch uchisheuchimaamuwaau.” 20Mihchetu Jewa iinuuch chii pechi ayimihtaauch aniyuu masinahiikaniyuu wesh namui uhchi waahyuunaakuniyuu aniyuu ihtaawiniyuu anit kaa ihtaatwaau. Nishtuyich maak ayimuwinh chii ishi masinahiikanuyikupane aniyuu masinahiikaniyuu Hebrew e ishi ayiminaanuuhch, Latin ekw maak Greek. 21Ekw anichii Jewa iinuuch aniyuuh kaa niikaanapitwaau utayimiheuchimaamuwaauh chii iteuch aniyuu Pilate, “Namui chipaa uhchi itashtaan an Jewa Uchisheuchimaamuwaau kaa itashtaayin.” Aahchisinahah an teyakuch chechii itashtech, “Chii iteu, Niya Jewa iinuuch uchisheuchimaamuwaau.”
22Pilate chii iteu, “Taan kaa itashtaayaan ekun che itashtech.”
23Iskutak kaa chiistaaskuhwaatwaau aashiteyaahtikuhch anichii shimaakanishach aniyuu Jesus ekw aniyuu uchekwaanimiyuu kaa maamaatinamaatutwaau e neutwaau paahpeyakw chii ayaauch peyakw chekwaayuu. Aniyuu maak akuhpiyuu uschich kaa chii chichishkamiyich e seyekaniyich chii ishinaakuniyuu namui uhchi ihtakuniyuu anit chechii pimikwaataakanuyich. 24Chii itituuch maak anichii shimaakanishach, “Ekush ekaa uhchi piikushamuwaataau uyuu utakuhp. Kuchishihiitutaau e chaahkahiicheyihkw awen che taauhiichekwe aniyuu akuhpiyuu.” Uyuu maak kaa ihtitwaau ekut kaa tipipayiyich taan kaa itasinahiikanuyikupane Chishemanituu utayimuwinihch,
Chii maamaatinamaatuuch nichekwaanimh kaye chii taauhiikaanuu nitakuhp.
25Jesus maak ukaawii peshuch chii niipuuyuu anit Jesus utaashiteyaahtikumiihch kaye ukaawii wiichishaaniskwemiyuu ekut kaa niipuyich ekw maak Mary, Clopas wiichiskweu ekw maak Mary Magdalene. 26Jesus chii waapameu aniyuu ukaawii kaye aniyuu uchischinuhamuwaakan kaa saachihaat e niipuyich anit ekw kaa itaat aniyuu ukaawii, “Eukuu chikus.”
27Ekw kaa itaat aniyuu uchischinuhamuwaakan kaa saachihaat, “Eukuu chikaawii.” An maak chischinuhamuwaakan ekut kaa uhchi chihchi kanuweyimaat Jesus ukaawiyuu anite wiichihch.
Jesus kaa nipit
Matthew 27.45-56; Mark 15.33-41; Luke 23.44-49
28Paatimaa maak Jesus chii chischeyihtam shaash misiwe chekwaayuu e chii chiishipayiniyich ekw kaa itwet, “Niwii minihkwen.” Eukw uyuu kaa itwet chechii tipipayiyich taan kaa ishi niikaan wiihtaakuniyich anite Chishemanituu utayimuwinihch che itwekupane.
29Chii ihtakun maak anit wiyaakan e saakaschinepech e wiisakaakamihch shuuminaapuu, ekut anit kaa akuhtataatwaau uhpanishiyuu kaa akwaapahkaatahkwaau mistikuhch ekw anite utuuniihch kaa ishi itaaskunamuwaatwaau. 30Iskutak Jesus kaa minihkwet ekw kaa itwet, “Shaash chiishipayuu.” Ekw kaa chistaawaniskweyit kaa ati puunipimaatisiit.
Uspakaahch kaa tahkamaakanuut Jesus
31Anichii Jewa iinuuh kaa niikaanishkuwaatwaau namui uhchi nituweyimeuch aniyuuh e nishtiyich kaa chiistaaskuhwaakanuyich naapeu eshkw chechii itakuchiniyich waapaniyiche wesh eukw aniyuu che chisheayimiheu chiishikaayich, ekw kaa itaatwaau Pilate chechii itashuweyich chechii naatwaakaatehwaakanuyich aniyuuh naapeuh, ekw maak chechii niihtinikaanuyikwaau wiiyuwaauh chechii chiskashtaakanuyikwaauh. 32Ekw anichii shimaakanishach kaa naatwaakaatehwaatwaau aniyuu niishu naapeuh kaa chiistaaskuhwaakanuyitwaau Jesus kaa chiistaaskuhwaakanuyich. 33Jesus maak shaash chii puunipimaatisiyuu wiya iskutak wetihtaatwaau anichii shimaakanishach namui maak uhchi naatwaakaatehweuch. 34Peyakw maak an shimaakanish chii tahkameu aniyuu Jesus anite uhpimeyuu. Tiiwehch kaa uhchi kuikwaasikuuniyich umihkuyuu kaye nipiiyuu anit uhchi. 35An awen tipiiwe uschiishikuhch e chii uhchi waapahtahk uyuu kuiskw wiihtam taan kaa ispayiyich chechii taapwehtamekw kaye chiyawaau ayimihtaayekwe. Chischeyihtam e taapwet taan e ishi wiihtahk. 36Chii ispayuu uu chechii tipipayihch taan kaa ishi niikaan wiihtaakanuukupane Chishemanituu utayimuwinihch che ispayikupane, itashteu,
Namui waachipeyakw uhchi naatwaahiikanuuyuu wiya uskanh. 37Kaye itashteu Chishemanituu utayimuwinihch,
Chika kanawaapameuch aniyuu kaa tahkamaatwaau.
Jesus wiiyuu kaa nahiikaakanuyich
Matthew 27.57-61; Mark 15.42-47; Luke 23.50-56
38Patimaa maak Joseph, Arimatheahch kaa uhchiit naapeu chii nituweyihtamuweu Pilate Jesus wiiyuuyuu chechii chiskashtaawaat. Joseph maak chiimuut chii taapweyimeu Jesus wesh chii kushteu aniyuu Jewa iinuuh kaa niikaanishkuwaayich. Chii niskumuu maak Pilate taan kaa ishi nituweyihtamiyich Joseph. Ekw maak Joseph kaa utinamuwaat Jesus wiiyuuyuu kaa chistuhtataawaat.
39Nicodemus maak chii wiicheukuu. Eukuu Nicodemus e tipiskaayich maauch niishtam kaa pechi naataat Jesus. Chii ayaau maak tuuminikaniyuu niipisiih myrrh ekw maak aloe kaa ishinihkaateyikwaauh e chii uhchi ushihtaakanuyich. Wiyesh mitaahtumitanuu tipaapekahiikan chii ispihtinikuniyuu uyuu tuuminikaniyuu. 40Ekw uchii niishu naapeuch Nicodemus ekw maak Joseph kaa utinamuwaatwaau Jesus wiiyuuyuu kaa tihtipayechinamuwaatwaau machunishihch kaye chii wiihchimaakutaaweuch wesh ekun kaa chii ihtitwaau Jewa iinuuch. 41Anit kaa chiistaaskuhwaakanuut Jesus chii ihtakun nihtaauchihchikan aschii kaye chii ihtakun anit ekaa nihtaa uhchi aapatahch chiipaikamikw. 42Aniyuu maak e chii ishi chiishikaayich, e ayeskuwiihkaakanuyich miyaaskaacheu makushewiniyuu, kaye maak e peshunaakuniyich aniyuu chiipaikamikuyuu, ekute anite kaa ashtaawaatwaau Jesus wiiyuuyuu.
ទើបបានជ្រើសរើសហើយ៖
John 19: crjrNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
