Apostoro ikip oma kambi 22
22
22 Ik.
1Iriwak utara newa ekashi utara, tane echi otta ku ki yaikikkara itak nu wa en kore yan.
2Orowa, shinuma anak ne Hebrai un itak ani ye shiri utara nu chiki naa mo no okai ruwe ne: awa, shinuma ene hawe ani :— 3Kuani anak ne Yudea un guru ku ne, Kirikia moshiri un Tarsus machiya ta ashikore, koroka, tan kotan ta an Kamarieru chikiri samata a en shukup an, awa, chikoro ekashi tuitak gusu oupeka no a en epakashnu an, aige, tanto obitta no echi utara 4korachi kuani ne yakka Kamui gusu eyaitunnap ku ki nisa ruwe ne: aine, rai pakno tan Ruhu ku epokba wa okkai ainu ne yakka matne ainu ne yakka tupetupe hine ipakashnu chisei ta aahupte kuni ne ekoshi nisa ruwe ne. 5Kamui kora kenru esapane guru ne yakka obitta no okai ekashi ikiri tura en gusu nei no paweteshu ki: nei utara orowa no iriwak utara orun kambi ku koro, awa, Damaskos kotan ta okai utara atupetupere wa apanakte kuni ne Yerusarem kotan ta ku tura kuni ne nei kotan orun ku payekai shiriki okai nisa ruwe ne. 6Aige, payekai shiri an wa, to noshike pakita, Damaskos kotan ta koehange no ek chiki, ekushkonna kando orowa no en okari ta poro nupeki at nisa ruwe ne. 7Orowa, shiri kata ku bachiri, aige, en orun ene itak ki hawe ku nu :— Sauros, Sauros, hemanda gusu eani anak ne en epokba ruwe he an? ari itak. 8Awa, ene ku ese-hi :— Utarapa, Aokai anak ne hunna ne ruwe he an? En orota Shinuma ene itak-hi :— E epokba Nazaret kotan un Yesu Ku ne ruwe ne, ari itak. 9Orowa, en tura no okai utara anak ne nei nupeki nukara poka ki nisa ruwe ne a koroka en orun ye hawe seenne nu nisa ruwe ne. 10Orowa, Utarapa, hemanda ku ki yak pirika ya, ani ku itak. Utarapa en orun ene hawe oka-hi :— Hopuni wa Damaskos kotan ta oman yan; yakun, nep ne yakka e ki kuni aesanniyop anak ne e orun anure tusu ne na, ari itak. 11Orowa nei nupeki arakuru gusu ingara eaikap chiki en tura no okai utara ku teke ani hine Damaskos kotan ta ku ek nisa ruwe ne. 12Orowa, nei kotan ta oshiroma obitta no okai Yudea un utara orowa no akopaweteshu ki, tuitak gusu aainukoro Ananias ari an reihei ani areikore shine ainu anak ne en orota ek, 13aige, en samaketa ash hine: ku iriwak ne Sauros, ingara kuni nrondum akore na, ari itak. Awa, nei epakihigeta ku ingara wa shinuma ku nukan nisa ruwe ne. 14Orowa, shinuma ene itak-hi :— Chikoro ekashi koro Kamui anak ne koro irenga e eraman hemhem ki, nei oupeka ambe nukara hemhem ki, koro paro wano itak hawe nu hemhem a ki kuni ne esanniyo nisa ruwe ne. 15Shinuma gusu obitta no okai utara orun e nukara hemhem ti nu hemhem ki orushpe epaweteshu ki kusu ne gusu ne na. 16Aige, tane hemanda e ehuye ya? Hopuni wa baptisma akore hine Shinuma reihei konishuk, orowa, chikokatpak furaye wa isamka yan, ari itak. 17Orowa, kuani Yerusarem kotan ta ku hoshipi wa Kamui kora kenru ta inonno-itak ku ki rapoketa ku kurukokonna shiknatara, aige, en orun Shinuma ene ye-hi ku nukara :— 18Tunasbino ran wa Yerusarem kotan wano oman yan, inambe gusu ne yakun, En gusu e ye paweteshu arabe nei utara shomo uk kusu ne ruwe ne gusu ne na. 19Orowa, ene ku itak-hi :— Utarapa, obitta no okai uwekarapa chisei ta E koeishokoro utara ipakashnu chisei ta ku ahupte hemhem ki shirikik hemhem ki nisa ruwe ne ari an ambe nei utara yaikota eraman: 20orowa, Aokai gusu paweteshu ki guru ne Stepanos koro kem aechikiki ita, kuani ne yakka nei samaketa ash wa ramuoshma, samata, shinuma raige utara koro raipi ku shikkashima nisa ruwe ne na, sekoro ku itak. 21En otta Shinuma ene itak-hi :— E oman: tewa no ehangeko no an Oya utara orun e arapare ash kusu ne na.
22Tapan itak pakno nei utara ikokanu ruwe ne; orowa no hawe ashte wa ene itak-hi :— Tap okaibe iki ambe moshiri wano oyakta omande: nei guru shiknu kuni gusu an ambe shomo ne ruwe ne gusu ne na. 23Orowa, nei utara hawe ashte hemhem ki, koro raipi shiraraye hemhem ki, koponchi herikash-parure hemhem ki gusu, 24nei tumi-koro utara ikiri esapane guru anak ne shinuma chashi otta ahunde kuni ne kashpaotte nisa ruwe ne; samata, hemanda gusu nei utara anak ne shinuma orun hawe ashte ruwe he an eraman kuni ne, akoshirikik wa koipishi kuni ye nisa ruwe ne. 25Orowa, nei utara at ani shinuma kote yakun, Pauros anak ne nei samaketa ash shine ashikne hotne tumi-koro utara esapane guru otta ene itak-hi :— Akokatpakte shomo ne an Roma un guru shirikik arabe anak ne tuitak nei no an ambe ne ruwe he an? 26Nei ashikne hotne tumi-koro utara esapane guru tap itak nu chiki, shinuma nei tumi-koro utara ikiri esapane guru otta oman hine nure wa ene itak-hi :— Nekon a e iki etokush ruwe he an? Tan guru anak ne Roma un guru ne ruwe ne gusu ne na. 27Orowa, tumi-koro utara ikiri esapane guru ek wa, — Aokai anak ne Roma un guru e ne ruwe he an? en nure wa en kore yan, ari Pauros otta itak. Orowa, Ruwe un, ani shinuma ye. 28Orowa, nei sapane guru ene itak-hi :— poro ataye ku sange nei no an kuni ambe ku hok nisa ruwe ne, ari itak. Koroka, nei no ku hekatu nisa ruwe ne, ani Pauros ye ruwe ne. 29Tata otta shinuma koipishi kusu ne a utara anak ne nani oyakta paye: orowa, shinuma Roma un guru ne sekoro eraman hene ki gusu, samata, tupetupe nisa ruwe ne gusu, nei tumi-koro utara ikiri esapane guru anak ne ishitoma nisa ruwe ne na.
30Koroka, nei shimge tobo ta, Yudea un utara orowa no aeiyonnupba kuni son no ikkewehe eraman rusui gusu, nei sapane guru shinuma pita nisa ruwe ne; orowa, Kamui kora kenru esapane utara newa obitta no okai ikoramkoro utara uwekarapa kuni ne kashpaotte, aige, Pauros sange wa nei utara kotchaketa ande nisa ruwe ne na.
ទើបបានជ្រើសរើសហើយ៖
Apostoro ikip oma kambi 22: AINU
គំនូសចំណាំ
ចែករំលែក
ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© British and Foreign Bible Society 1897, 2018