Romam 4
4
N Yibrayim a chir di̱ne keku bi̱yili̱mang
1Ni fwadu ko n Yibrayim tuke chire ferediye a swaan ya̱m bi̱bi yire? 2Ki̱kumang ka no Yibrayim a ya chirku we nangang yile konge, n ki̱n a no ya chi ka ngan kwiye aya a newe a kakku Kwamangu. 3Ya̱m Kwamamu a fwa ko, “N Yibrayim a ke bi̱yili̱mu we ya̱m Kwamamu, di̱ne keku bi̱yili̱mang kangu a kaki̱mi̱n yile we kakku Kwamangu.”
4Ki̱ka̱ngu ka nii a ma nangange, sure ko a ne yidi li̱mang, ki̱yiu ture ko. 5Aya ni̱bu ki̱ya yile di̱ne keku bi̱yili̱mange n ke nangang kawureng, 6Ti̱tu nang chi n Dauda ki̱fwaditu, yo a yi ko naba ti̱mi̱lane, n ki̱n wu Kwama a yib a mar ki̱n a wu ki̱tum yile. A kurabu kasi no ti̱ti̱le ti̱tu wuko a maatu.
7Ni̱bu ti̱mi̱lani̱m,
n chi bi̱bu ki̱ki yili̱ni̱mu di̱ne ka du chimi̱n ki̱taku chiyangu,
n chi bi̱bu ni̱bu a du chimi̱n ki̱letimu.
8Naba ti̱mi̱lane,
wu n Tewuduwe a ne ki ki̱leti kiye!
9Kano ti̱mi̱lan ti̱tu n Dauda a fwaatu n ti̱u kana bi̱bu a bi Lari̱ma ka n ti bi̱bu a bibu laari̱ma? A newe yiko! Bi̱bu a bibu laari̱mu wetuwe mure. A mang fwa we bi̱mwali̱li̱mu ya̱m mi, “N Yibrayim we keku bi̱yili̱mang kangu n Kwama a yiu ki̱n a yile.”
10Ti̱chitu wu a fwe fere? A kakka ka a kuteng ki̱ku m Yibrayim a bii laaranga? A kakku, n ke a kuteng. 11N ki̱n a yiu a ya di̱mwal biku laarangu, yinu biku laarang kangu a kau di̱mwal di̱du ka yungdu yile kon di̱ne keku bi̱yili̱mang n Kwama a yiu ki̱n a yile yo n ki̱n a no a tibu we. Di̱ne yiko, m Yibrayim nang te wu a bi̱bu a ke bi̱yili̱mi kwang we di̱Kwama yo n chi a tibu bi laarang, ko ke chi ya kiku a yilengu. 12N ki̱n nangti̱ te we bi̱bu a bii laari̱mu, n ke ka bi̱bu a biimu aya n chi a bunti̱ nani Yibrayim we keku bi̱yili̱mangu we yayu yile yo no a tibu bi laare.
Bwaku Kwamangu ni yadu a kekubi̱yilimang
13Ya̱m bwa̱ki̱ ko m Yibrayim ka kau wu ka chau kula n ti ki̱kuwang kangu a ti̱ti̱nimu a chirebu a yili̱n Musan aya a chire a yile wu a keku bi̱yili̱mange. 14Nangki̱n, ka bi̱bu ki̱bunti̱ yili̱n Musati̱mu a kau bi̱ba kulame, keku bi̱yili̱mangu a mabu ki̱kwi, ti̱nti̱ne bwa̱ki̱ Kwamangu a kab a newe. 15Di̱ne yilangu ki̱bedu ki̱ni ki̱fwini Kwama. Yinu fi a ne yilang we, a ne kiku yili̱nangu we.
16Di̱ne yiko, bwa̱ki̱ Kwamangu a ti a keku bi̱yili̱mang. Ti̱tu ke a bunti̱ nabwe li̱me Kwama, yinu ke a ya kiku we bwe bwiye Yibrayimi kwang, Kanang chikiye n ke ka bi̱bu yilang a si̱ngi̱mu aya n ti bi̱bu a tau keku bi̱yili̱mang Yibrayim. N ki̱n nang te chire kwang, 17Nang chi ya̱m Kwamamu ki̱fwade ko, “N yo mun te wu a kuuti nabwen.”#4:17 Mwe 17:5. Ti̱tu a fwe di̱ne n Yibrayim a ke bi̱yili̱mu a di̱Kwama wu ki̱ni kwa̱miyu ti̱kuriye n ti ya̱m ki̱mu ki̱yo chi a ka̱bitu ki̱kaddu.
18Yo n Kwama a bwa̱u Yibrayim mi̱n ko n ki̱n ka kau te we a kuutiyu nabwene tiyang ka fwa ki̱mi̱nangu “Nang tiyangu bwebwiyeti mwiyu ka kannangu.” 19Aya keku bi̱yili̱mang Yibrayimangu a ki̱tabu kasi ki̱ku n ki̱n a yim ko ki̱mwang ki̱ka̱ra̱ng yinangu ka kau te we ki̱swi wu swa̱tu kitu kuul yinu naye ko n Saratu ki̱twa̱ne.
20Amwituwe keku bi̱yili̱mang kangu a ki̱tabu we bwa̱ku Kwamangu, we bi̱yili̱mu keku bi̱yili̱mangu a ki̱la ki̱sudusube, aya ruku we keku bi̱yili̱mang kangu yina ri̱kati̱ Kwama. 21N ki̱n a kamabu chi ko bayim we bwa̱ki̱ku n Kwama yo ka ma ki̱mi̱ndangu. 22Keku bi̱yili̱mang Yibrayimangu nang chi a yo n Kwama a yo ki̱n naba yile.
23Aya ti̱kwa̱li ti̱tu ko, “A yiu ki̱n a yiletu.” A mwalbu di̱ne kana ki̱n n ki̱kun. 24Di̱ne chi̱ni ti̱nti̱n, ki̱yo ni mi̱nu we ni̱ru n Kwama ka yo chi̱ni ni̱bu yilem ka ni ke bi̱yili̱mu we di̱ki̱ne wu a kuku Tewuduwe n Yesu we bi̱bu a bwarani̱me. 25N Yesu wu a bwa di̱ne ki̱leti chireye, a kuku ki̱n ke n chi̱ni ni kau ni̱bu yilem we kakku Kwamangu.
ទើបបានជ្រើសរើសហើយ៖
Romam 4: Tula
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, The Nigeria Bible Translation Trust and Wycliffe Bible Translators, Inc. All rights reserved.
