Romam 5
5
Li̱mang n ti ti̱mi̱lan
1Ki̱ka̱ngu niyang kau ni̱bu yilem di̱ne keku bi̱yili̱mang chirengu, ni ya Li̱mangu n ti Kwama di̱ne chitu n Yesu Masiya Tewuduwe a ma nimi̱ne. 2Di̱ne keku bi̱yili̱mang chirengu, m Masiya a yo ni ya da fi wuduwe ni ti mi̱n. Ni ma ti̱mi̱lan we yo ni̱re wu a fiswe ware n ti Kwama we dwiyen kitu. 3A bwin yiko, n chi̱ni ni ri̱kadu we nwe riye di̱ne ni yim riye ki̱ya̱r ni we dako, ki̱yodu ni ya ruku. 4Ya̱rki̱ku ki̱yo Kwama ki̱nwe ta̱ma̱ng ki̱ni da chire, keku Kwamang ki̱bedu ki̱ni yo ni̱re wu a yaku yukange. 5Yo ni̱re wu a ne ka kau ti̱kusi we ni̱r chi̱renu di̱ne ni yim n Kwama a mi̱la ni, a ni chi̱ni Fi̱ki̱m bi̱bi wauwaudi̱m di̱ne mi̱laku kang.
6Ti̱da̱ng we yo no n chi̱ni niyang tibu ya dukane, m Masiya a bwa di̱ne bi̱bwilamu a ki̱swi wu n Kwama sute 7Di̱ne a ma bwar yinang ka n chi̱ni ni ya wu ka bwadu ko ke ki̱ yu nii wu yilengu. Kasi ki̱ku ni medu ni ya wu ka bwadu di̱ne nii wu yilengu. 8Aya n Kwama a yung mi̱laki̱ kangu we di̱chi̱niye yo n chini we ki̱leti suke, n Masiya a bwa di̱ne chini.
9Yo a chaku niye di̱ne ki̱tuumu a fwali̱me, ki̱kumag n ki̱n ka yu nidu we ki̱fwini Kwama. 10Kangi yangu a no n chi̱ni fakwarbu Kwamam aya ki̱ka̱ngu ni ya dokaku n ti Kwama di̱ne bwa wu n Yesu a ma. A mwintuwe ni swidu we ti̱welan ki̱diya kwaditu di̱ne ti̱kuri kitu. 11N ke ka ti̱tu, ni ma ti̱mi̱lan di̱ne chi n Kwama a ma a bweko n Tewuduwe Yesu Masiya, wu a di̱ki̱ne ni ya dokaku.
N Adamu n ti Masiya
12Tiyangu ki̱letiyu a lewe ti̱ti̱niyangu a nii wiinangu, yinu bwa di̱ne ki̱letiye, yinu we yiko, bwa a tau ni̱bi kwang, di̱ne ni̱bi kwang a ma ki̱leti. 13Ki̱kumang, ki̱letiyu n we ti̱ti̱nitu feredi yo yili̱n Musatu a tibu bede. Di̱ne yilangu a newe we, ki̱letiyu a yabu kiku 14Aya a mwetuwe ki̱dang Adamuwangu, a lanta ki̱dang Musa, bwa a ma mati̱n ku ni̱betu ki̱ni kwang. A matuwe kasi no nang bi̱bu a mabu ki̱le a wa̱re wiin wu n Adamu a ma mi̱ne, yo a bunti̱bu yilang Kwamange. Adamu no ki̱duum we wu a no ka bede.
15Aya Ki̱li̱mang Kwama a newe yinang ki̱leti Adamu. Nangki̱n ki̱le Adamuwe a yal ni̱bu mi̱ne bwa. Aya li̱me Kwama nabwen, a mwinta yo ki̱li̱mangu n ki̱na ma a ni wiinangu, ka nang chikiye n Yesu Masiya a be ki̱ni delaku we ni̱bu nabwen. 16Ti̱nti̱ne ki̱li̱mang Kwamangu n ke di̱ne nangang ki̱le nii wiinnange. Yinu mwa̱taki̱ku a nabe ki̱le nii wiine yinu a be ki̱ni kayaku. Yinu ki̱li̱mang a nabe nee ki̱letiyu, yinu ki̱li̱mang Kwamangu a be ki̱ni kwalan ki̱len. 17Bi̱yili̱m, di̱ne ki̱le nii wiine, bwa a ya da wu ka kwaba ni̱be nabwen. Aya ti̱wannantu nabwe di̱ne n Yesu Masiya n ki̱kun nang wu a kwira lwadi̱me we. Kanang wuwule niye wa yiu li̱me a ya swiku n ti fi swe yile n ti ki̱n kama mati̱n ti̱kuri a di̱Masiya.
18A tatuwe yiko, di̱ne ki̱le ni wiine, ni̱bi kwang a kau ni̱bu ki̱leti̱m. A fi wiine naba yile wiin, a chaku ni̱bu mi̱ne ti̱kuritu a no twiyaditu. 19Aya yinangu nii wiin a nwebu diyangu, ni̱bu nabwen a kau ni̱bu ki̱letiyangu, yiko ti̱n di̱ne nii wiin wu ki̱nwediye ni̱bu nabwen ka kau bi̱bu ki̱tum yilem.
20Yilangu a lewe a yo ki̱letiyu nabwen, aya fi ki̱letiyu susube, li̱me ki̱suddu ki̱laan yiko we dungkwale wuko. 21Yinangu ki̱letiyu ki̱ma mati̱ntu we bwangu, ki̱tau ni̱bu a ki̱letiyu, we yiko ki̱yo yile ki̱ma mati̱ntu we tumku yile wu ki̱bedu ki̱ni ti̱kuri ki̱diya kwadite a di̱Yesu Masiya Tewuduwe chire.
ទើបបានជ្រើសរើសហើយ៖
Romam 5: Tula
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, The Nigeria Bible Translation Trust and Wycliffe Bible Translators, Inc. All rights reserved.
