Romam 3
3
Ni̱r di̱yili̱n Kwaman
1Yoye nii wu n ki̱n ni̱bu Yafuda a la bi̱kami wureni? Ta̱ma̱ng kangu wureni we biku laari̱ngu? 2Ki̱la we wa̱riyu nabwen! Ni̱bu Yafudam nam bi̱bu n Kwama a wudu chimi̱m ya̱m ki̱mi̱mu.
3Aya wureni, ka bi̱kamu a kebu bi̱yili̱me ya̱m Kwamamu, ti̱kan chiya? Ke kwalan keku bi̱yili̱mang chiyange a kwel ni̱r di̱yili̱n Kwamana? 4Ya̱m Kwamamu ki̱ni bi̱yili̱mu, ka n wure naba ti̱kwaniye ya̱m Kwamam a yi ko,
“Ke ya̱m mumu a yung yilemo;
Ke n chau ki̱la yo ni̱bu ki̱ kaba mi̱n ya̱me.”
5Ka kwalan yile chire ki̱yilawe yile Kwama a diye, ni fwadu ko wule? Yoye n Kwama a lele we ti̱welan kitu ki̱wiyadu a dur chi̱renita? Mi̱n fwadu yinang ka ni̱bu ki̱fwadang. 6Ki̱kumang a newe yiko. Ka no yiko, n Kwama ka kaba ti̱ti̱nitu mi̱ndi yire? 7Wuka nii a ne kedu, ka di̱ne ki̱leti miyu bi̱yili̱m Kwamamu a chire fi̱lang a dwiyeke, wureni a yo Kwama ki̱duiyu chiku ko mi̱n naba ki̱letiye? 8Ka yiko, a ne ni chakakku ki̱ni maku chi ti̱bwilaitu ke a kau nangang ki̱yileng chirenga? Yinangu bi̱kamu ki̱ swa̱ba nidu we ti̱ti̱ki̱ritu ko, “Ni ma ti̱bwilatu ke yile a fwe.” Kaiku chiyangu a da.
A ne nii ki̱tum yile we
9Ni swan ya̱mu ko wule? N chi̱ni ni̱bu Yafudam ni la wure? Ko wiin! A ma tu mang fwa ya̱mu mi ni̱bu Yafudam n ti Yelena a fi wiine we lwadi̱me wa ki̱letiye. 10Yinang ka a mwal we ya̱m Kwamam a yi ko.
“A ne nii ki̱tum yile we, a ne ni we ko wiin.
11A ne nii we ko wiin, wu ki̱ni swangku bi̱yili̱mange,
A ne wu ki̱bau Kwama we.
12Ni̱bi kwang a ni Kwama kuteng,
N chi a fi wiine a kau bi̱kusi̱m,
A ne ni we ko wiin wu ki̱tum bi̱yili̱me,
A newe ko wiin.” 13“Ya̱mi chiyu a ri ki̱ni bi̱bu a ki̱chibem;
ben chi̱nu a ri ki̱ni ti̱kwani.”
“Chi ki̱chiredu a yiniye, ki̱ni ni̱bu riye yinang bun son.”
14“Yini chiyu a ri ki̱ni fufuke.”
15“N chi a li̱m bwiyu we kaiku niyangu n ti chiku kangu;
16Kasi no finu n chi ki̱fan nange bob ki̱ni furi ki̱lin.
17N chi a yimbu wa̱re li̱me.”
18“A ne tayi Kwama we a ni̱tu chitu.”
19Ki̱ka̱ngu kasi no yilangu a fwa ko wule, a fwa a bi̱bu ki̱yadu we yili̱ni̱mu, ke ni a fwadu ti̱kan chi we aya ti̱ti̱nitu ka yindu ko mwataku Kwamangu ki̱yam ki̱nu. 20Di̱ne yiko, a ne nii wu ka swida kakku Kwamange we ka di̱ne ki̱tum yile; di̱ne yilangu ki̱yodu mun ku ki̱lemo.
Tiyangu niyan ya yile we di̱Kwamangu
21Ki̱ka̱ngu wu yile a di̱Kwama, a bwin yilangu, a be wuse ni mi̱ne wa̱re yile, wu tatti̱ki̱dai yi ka̱riyu n ti fa̱kubu a fwa. 22Wauwade n wu Kwama wu, ki̱yadu we ka nang wuwule niye wu a ke bi̱yili̱mu we di̱Yesu Masiya a ne lakaku we. 23Di̱ne ni̱bi kwang a ma ki̱leti, a ki̱tan we dwiyen Kwamatu. 24A mwintuwe ki̱ka̱ngu we nabwe li̱me ko a yo n chi̱ni n ke ni̱bu ki̱leti̱m, a ma ti̱tu a di̱Yesuwe, n ki̱n wu a chaku ni we ki̱letiyu n ki̱n a da̱biyu. 25N Kwama a ke bwako a kau wa tuke, a keku bi̱yili̱mang we ki̱tum ki̱mu. N Kwama a ma ying ko ke ki̱yung yile ko. 26A yungi ying we ki̱ku ki̱dang ko n ki̱n n ki̱fwan naba yile. Ti̱nti̱ne, ki̱yo wa ke bi̱yili̱m a di̱Yesuwe ki̱ya yile we kakku Kwamangu.
27Yinu ngauku kwiyengu a bwa̱le? A newe. A wuwule da? A di̱ne ni bunti̱ yili̱na? A newe yiko. Aya a keku bi̱yili̱mang. 28Nangki̱n ni ku fal we keku bi̱yili̱mangu yile ki̱yadu we kakku Kwamangu. N ke ko ni ka buntu yili̱n. 29Kano Kwama wu ni̱bu Yafudam n chi kuna? A newe yiko! Kano yikayu kuuti, Kwama n ke wu chiya? Ki̱kumang! Kwama wu ni̱bi kwang. 30N Kwama ka wu wiine. Ka yo bi̱bu a bibu laari̱mi wauwadu we kakku Kangu di̱ne n chi a ke bi̱yili̱me. 31Yoye, ya̱m yili̱ni̱mu a newe di̱ne ya̱m keku bi̱yili̱manga? Ko bayim! Ya̱m yili̱ni̱mu n we, dukan ya̱m yili̱ni̱mu a susube.
ទើបបានជ្រើសរើសហើយ៖
Romam 3: Tula
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, The Nigeria Bible Translation Trust and Wycliffe Bible Translators, Inc. All rights reserved.
