Romam 2
2
Mwataki̱ Kwamange
1Di̱ne yiko, ti̱n fal ti̱ne ya̱m we, n ti̱n bi̱bu ti̱ku ki̱leti bi̱kami̱mu. Kangu ti̱ku ki̱le bi̱kamangu, we di̱chi̱ne yare ki̱bedu. Di̱ne n ti̱n bi̱bu ti̱mwata ya̱m a ni̱bumu ti̱ma ti̱n chitu wu n chi ki̱made. 2Ki̱ka̱ngu, ni yim mwataku Kwamangu a bi̱yili̱m, we bi̱bu ki̱ma ki̱letimu. 3Aya m mun! Wu mun fwa ya̱m we ki̱chitu wu mun mati̱ne, mun kamadu mwang swidu we mwataku Kwama Tenga? 4Ka mun swa̱ba nabwe li̱me Kwama n ti muku ni̱ran kangu n ti bwanu konga? Mwang yimbu mwi li̱me Kwama di̱ne ke n wo ki̱ti̱ma?
5Aya di̱ne ni̱r muni ki̱ngki̱ng mwang nwebu diye, mun yal dur munu mi̱ne ki̱fwini Kwama wuduwe we di wu n Kwama ka tidi tas di̱ne kabake. 6N Kwama ka ni kawure wuko ki̱ti̱me, ka wu yile, ka wu bwila. 7We ni̱bu bi̱bu a yoti̱ ni̱ru we kwing ki̱ma chi a le, ka ni chi ti̱kuri ki̱diya kwadi. 8Aya bi̱bu ki̱bau dutu chiitu mi̱n dwiyeni̱nu, bi̱ba ko bi̱yili̱mu ki̱bunti̱ bwilamu, n Kwama ka ma ki̱fwini ki̱ni chi nabwen.
9Kanang wuwule niye wu ki̱ tum bwila, ka wuranbwi ki̱ni riye n ti di̱kumen: A mwetuwe ni̱bu Yafudam, ka swan ti̱nu a Yelena. 10Aya dukan n ti dwiyentu n ti li̱me, n wu ka nang wuwule niye wu ki̱ma chi a le. A mwetuwe ni̱bu Yafudamu ka swanti̱na Yelena. 11Nangki̱n, n Kwama a swabuswabe.
12Kanang wuwule niye wu a yar yo a yimbu yili̱n Kwamate, ka ya ti̱welan we ki̱taku chiyangu. Aya wa yar we yo a yaki̱bunti̱ yili̱ne, ka ya kabaku ki̱ku a yili̱nange. 13Aya bi̱bu a nwe yilamu a kau chi mi̱nbu wa̱re swike we kakku Kwamamu aya bi̱bu ki̱bunti̱ yili̱n Kwamati̱mu nang bi̱bu ka ya delaku Kwamamu. 14We Kuutiyu a newe ki̱ni yili̱n Kwamati̱mu, ka bunti̱ yili̱ntu we ni̱tu chitu, a kau chi mi̱n yili̱n Kwamatu, kasi ki̱ku n chi a newe ki̱ni a yili̱ni̱mu. 15Yo kwer n chi a nwe we ni̱tu chiitu, yilangu ki̱ma nangange, bwi chiiyu a kau di̱mwar, ki̱yaka chidu we ni̱tu chitu ki̱toti̱ chidu. 16Di ka bedu wu n Kwama ka kaba ni̱bu mi̱n ki̱letiye, ki̱dangu ka kaba ni̱bu mi̱n ti̱lairi ti̱tu a di̱Masiya te, yinang ka ya̱m bi̱li̱m mi̱ma fwangu.
Ni̱bu Yafudam n ti yili̱n Musatu
17M Mun wu mun ngau kwiye mwi m mun naba Yafuda, mwi mun bunti̱ yili̱n Kwamaye, mun kuku ti̱ni dur mwi m mun n yim Kwama, 18mwiko n yim chi Kwama ki̱baddite, di̱ne mwang swaan we yili̱ntu chi a da makite, 19Yinu n yo we ni̱r munu mwi n lwe mwang twa̱ku wu a kubu diye, mwang kau yiiku we ni̱bu a swaanbu chi me. 20N ke mwang miya bi̱bu n ke ni̱bu Yafudam mi̱nu, bi̱bu mwang da̱u mwi di̱bu di̱ne a swaanbu ya̱m Kwamame, di̱ne muni ki̱ni yili̱n Kwamatu mwang medu mwang miyaditu.
21M mun wu mun miya bi̱kamu mi̱nde, mwang miyabu dur munu mi̱nba? M mun wu mwang kebu ni̱bu ka ma kuti̱te, mwang maba? 22M mun wu mwang yi mwi ni̱bu a madu ti̱kulitu we, mwang maba? M mun wu mwang babu mwang nwe ya̱m di̱yori̱me, mwang mabu kuti̱tu we senga? 23N ti̱n bi̱bu ti̱kuku duru ti ti̱bunti̱ yili̱ni̱mu, ta kaibu Kwama mi̱nbu ni̱ru we yo ta bunti̱bu yilanga? 24Yinangu a mwalangu, “Kuuti ki̱ swa̱ba di̱n Kwama nu di̱ne chi̱n!”#2:24 Yic 52:5.
25Biku laabiyang ni̱bu Yafudamu ki̱ni ki̱kwi ka ti̱yadu we yilange, aya ka ti̱ki yilange, ti̱ki̱la ti̱kau yinang bi̱bu a no yimbu Kwamam. 26Ka bi̱bu ke ni̱bu Yafudam a bibu laari̱mu a bunti̱ chi yilangu ki̱fwade, n Kwama a ne mar chidu ka kadu yinang bi̱bu a bi laari̱ma? 27Bi̱bu a bibu di̱ten laari̱mu, yinu ki̱bunti̱ yili̱nti̱mu, ka mar chi̱nu a bwa di̱ne kasi ki̱ku ta yim yili̱n ti̱tu ta biti̱ labitangu, ta bunti̱bu yili̱ntu.
28Naba Yafuda siine niyang da̱ngbu a biku laarangi siine n ke di̱ten bwine. 29Naba ni̱bu Yafudam siine ni kudu a ni̱r ki̱n, biku laarang kangu ki̱ku a Fi̱ki̱m a ni̱rang, n ke yili̱n ti̱mwali̱ri. Ki̱duum ni̱bu bi̱bumu, n Kwama nang wu ki̱wer chide, n ke ni.
ទើបបានជ្រើសរើសហើយ៖
Romam 2: Tula
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, The Nigeria Bible Translation Trust and Wycliffe Bible Translators, Inc. All rights reserved.
