Romam 1
1
Di̱siir Bulusi̱n
1Mi̱na Bulus bwe wu kali̱lle Yesu Masiya. Fandu wu suture wu n Kwama a yal ko a ya fwa ya̱m bi̱li̱m, 2bi̱bu n Kwama a bwa̱u a yii Fa̱kube feredi we ya̱m bi̱mwali̱li̱m ki̱mi̱me. 3Ya̱m bi̱bu a dur Bwe ko n Yeseu Masiya. Wu we da niye, a bi̱u ki̱n a ki̱fi̱ku Mai Daudange. 4Kwama a yung n Yesu Masiya Bwe ko we kunku kangu a furangu, di̱kan a Fi̱ki̱m Tewuduwe. 5N Kwama a ni mi̱n da wu mang kau fandu Yesu Masiya di̱ne di̱n ki̱ne, ke n yal ni̱bu we kuuti a ma kwa̱mbi̱r ke a ke bi̱yili̱mu a bunti̱ ki̱n, ke a ni ki̱n dwiyen. 6N ti̱n wetuwe bi̱bu n Kwama a yal ke a kau bi̱bu m bi̱u Yesu Masiyamu.
7Mi̱n mwal bi̱bu a Romamu mi̱nu, bi̱bu n Kwama a mi̱lan, a yal chi ke a kau ni̱bu ki̱mi̱mu. Li̱me n ti li̱mang ki̱ka di̱Kwama Te chire n ti Tewuduwe Yesu Masiya a swe n ti chi̱ni.
M Bulus a twa̱ba̱ buni n ti di̱wan
8N ke mang mwedu ki̱ni di̱wan a di̱Kwama we di̱n Yesu Masiya di̱ne ti̱n ki̱ni kwang. Di̱ne ti̱ti̱niti kwang ki̱fwa ya̱m keku bi̱yili̱mang changu. 9N Kwama wu mi̱n ma ki̱mi̱n nangange ki̱ni ni̱r mi̱ni diin we di̱mwar Ya̱m bi̱li̱m Bwe kone, nang wu ka fwadu kangi kwadu mi̱n kuri ki̱ni chi̱n we twa̱ba̱ku buniyangu. 10We twa̱ba̱ku mangu ki̱dati kwang. Ki̱ka̱ngu ka no Kwama ka kemide, a no nii da mang ya chimi̱n di̱siir.
11Chi a yo mang bau mang ya bwana di̱ chi̱ne, di̱ne ke ti̱ya rikeki̱ku a Fi̱ki̱m Kwamamu, ke a ni chi̱n dukanu. 12Chimi̱n fwaditu nang ti̱tu. Ke m mi̱n n ti chi̱n ni rike yichireyu ki̱dangu ki̱ni kiin we keku bi̱yili̱mang chirengu a di̱Yesu. 13Mi̱n baddu ta yindu kebu mi̱m, tiko mi̱n kuru kwadu mi mang ya bwa a di̱ chi̱ne ke ni̱bu nabwen a wo ki̱ti̱m we di̱chine yinang kangu a fwe we yikayu kuuti yangu, (aya a maribu ko n ya a lanta ki̱ka̱ng).
14Mi̱ni ki̱ni ki̱da̱dda̱ku di̱mwar ya̱m bi̱li̱mu we dur mi̱nu di̱ne ni̱bu Yelenamu n ti bi̱bu n ke Yelenamu, bi̱bu a swaani̱mu n ti bi̱bu a swaanbi̱mu. 15Nang chi a yo mang bau mang fwa chimi̱n ya̱m bi̱li̱mu ti̱nti̱n, n ti̱n ni̱bu Roma.
Dukan mwaku ya̱m bi̱li̱m
16Mi̱n mang nwebu dibwi we fwaku ya̱m Kwamamu di̱ne ti̱tu dukan Kwaman, ke a yu ka wuwule niye wu ki̱ke bi̱yili̱m a di̱Yesuwe: A mwetuwe ni̱bu Yafudam, ka swan ti̱nu a Yelena.#1:16 Mar 8:38. 17Nangki̱n, ya̱m bi̱li̱mu ki̱yungdu yinangu Kwama a yo niyang kau ni̱bu ki̱tum yilem, yile wu ki̱bunti̱nu a keku bi̱yili̱mang we wu a ti kake ti wu a swane. Yinang ka mwal we Ya̱m Kwamamangu, “Ni̱bu ni̱ri dini̱mu ka swidu ki̱ni keku bi̱yili̱mang.”#1:17 Aba 2:4.
Ki̱fwini Kwama we ki̱letiyu
18Ki̱fwini Kwama a kwa̱la̱n we dii, di̱ne ki̱letiyi kwang n ti chi ti̱bwilai ti̱ta ni̱bu bi̱bu ki̱yinge bi̱yili̱mu ki̱ni ni̱tu ti̱kwani̱n chiti̱mu. 19N Kwama ki̱wu chimi̱n ki̱tele, di̱ne n chi a yim chi a no dakan ka yinde. N Kwama ki̱fwan a yung chi. 20We tile bi̱rke, da Kwama niyang yimbe n ti dukan ki̱nu ki̱diya kwadi̱nu n ti fiswe ko wa Kwama, ni swaan yinang, we chitu n ki̱n a yowetu, a ne ni ka ya filliye we.
21Aya kasi ki̱ku n chi a yim Kwamangu, a nibu dwiyen kitu a lami̱nti̱bu di̱wan. Ti̱kuran chitu a kau ti̱kusi, ni̱tu chitu a ne swaanku we, a ri ki̱ni ki̱liye. 22Kasi ki̱ku n chi ki̱da̱du ko chi kasanangu, n chi kasi di̱bu. 23N chi ki̱sute dwiyen Kwama siinitu ki̱ni dwiyen nii wu bware n ti ta ki̱ni̱bitu n ti ta naitu n ti kwali̱chinu ki̱kwa̱dukwa̱kane,
24Di̱ne yiko, n Kwama a du chi ko a nang burti̱du yinang ka ni̱r chi̱nu ki̱badangu. N chi ki̱bwiti̱du, ki̱kai yichiyu ki̱ni ti̱kulitu. 25N chi ki̱sute bi̱yili̱m Kwamamu ki̱ni ti̱kwani, n chi ki̱ sii kwalin chinu n Kwama yonu ki̱du Kwama we, wu ka yiu delaku ki̱diya kwade. Amin.
26Nang chi a yo, n Kwama a du chi ko a nang bwita yari chitu. Ko no nang nati̱bu chimu, ki̱manadu yinang kwartabu a du ki̱swi n Kwama a yon chiye we ki̱ma dati a dakabiyu. 27Nang kangu kwartabu a du da wuyile n ti nati̱be, yinang ka no dakanangu, kwartabu kima chi dibwitu a bwiti chi. Kwartabu ki̱ma da wumu kiyale ti̱wela Kwama wu fi̱rantuwe da chiye.
28Di̱ne yiko, yo n chi a ko ka yiu Kwama wu yile, n ki̱n a du chi ko a nang temadu we ni̱tu chitu, n chi ki̱ma chi a no dakabu ka made. 29N chi a ri ni̱tu chi̱tu ki̱ni bwilai n ti ti̱kwaniti̱ n ti ni̱r di̱kwani̱n n ti muli̱n mi̱kakwiye n ti kubeku. N chi a ri ki̱ni kati̱n ki̱fwini n ti kakku dutang n ti ti̱kulani n ti di̱buti̱r n ti muli̱n. N chi a ma ti̱fwaran n ti 30ni̱bu yii rarabi̱m n ti bi̱bu a ko Kwamam n ti ni̱bu mweki̱ni̱m n ti bi̱bu a kubu ki̱siyang niyangi̱m n ti bi̱bu ki̱kukku dutu chitu nabweni̱m. N chi ki̱babba wa̱ri bwilayu we bwa we mi̱ne, a mabu kwa̱mbi̱r we seli̱bu.
31N chi a ne ti̱kuran we, a ribu bwa̱ki̱ changu, a ne ki̱ke we, a ne chi ki̱bune we. 32Kasi ki̱ku n chi a yim we kabaku Kwama ki̱yilangu ko ni̱bu bi̱bu ki̱ma ti̱chitu wumu a lwe bwangu, n chi a dubu ti̱chitu wu, ki̱ru ni̱tu we bi̱bu ki̱madi̱mu ko da chi a le.
ទើបបានជ្រើសរើសហើយ៖
Romam 1: Tula
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, The Nigeria Bible Translation Trust and Wycliffe Bible Translators, Inc. All rights reserved.
