Nangi̱n Fandubi̱m 26
26
M Bulus a kwila yikiyu a kakku Akarifa
1Yinu Aka̱rifa a yi Bulus ko, “Ni̱n nin ki̱swi, kwila ya̱mu a dur muni̱mu.” M Bulus a kuku kangu, a mwe ki̱fwa ya̱mu.
2“Mai Aka̱rifa, m ma ki̱ti̱me yinangu mang kwila ya̱m bi̱bu ni̱bu Yafudamu a fwaran we dur mi̱ni̱mu diwu we kakki̱ mwangu. 3Ti̱nti̱ne, n yim m mun ki̱ni yingku we dati ni̱bu Yafudamu n ti dokaku ni̱bangu a yo yaram a le tibe chiye. Di̱ne yiko, mi̱n wananu, ma bwanu we nweki̱ ya̱m bi̱bangu.”
4Yinangu tikaketi ni̱bu Yafudamu a yimangu, a mwetuwe ki̱dangu mi̱n a bwelenangu, yo m mi̱n we kuu bi̱n mi̱ne a lanta Wurchalima. 5N chi a yim mi̱n feredi. N chi chifwan ka medu ka fwadu ko m mi̱n a kwa̱l ni̱bu Farisamu. Kwa̱l ni̱bu Yafudam di̱du a mabu ti̱kali ki̱ni bunti̱ki̱mu 6Ki̱ka̱ngu n ti we kakku changu ti̱mami kabaki̱ku di̱ne mang yo ni̱ru we riku bwa̱ki̱ Kwamangu a ma tukebi̱ chi̱remu mi̱nangu. 7Bwa̱ki̱ Ki̱ku nang ki̱ku ti̱fi̱ki̱ri ni̱nti kub chiri turabitu a yo ni̱ru we ki̱yam riku kangu, a yo n chi ki̱funbwiyu ki̱ sii Kwama kum n ti kuko. Tete Mai, Di̱ne mang yo ni̱ru we riku bwa̱kangu, nang chi a yo ni̱bu Yafudamu ki̱ku ki̱le miye. 8Wureni a yo we da̱ngki̱ changu ti̱kudu n Kwama a ne ka medu ka kuku kwa̱miye?
9“M mi̱n no m bwa̱u we ni̱r mi̱nu ti̱n mi mang funti̱bwi mang kai chaku kakang di̱n Yesunu naba Nasa̱rete. 10Nang chi mang ma a Wurchalima, tikake Fansetiyu a ni mi̱n da n yo ni̱bu nabwen a le di̱bi̱nti̱le we Wurchalima. M mi̱n wetuwe bi̱bu a ke ki̱ni bwa chimu. 11Mi̱n bunti̱ kambi Kwamatu mi̱n ni ni̱bu riye, mi̱n funti̱bwi mi̱n yo chidu ki̱fwa ya̱m swa̱ban we di̱n Yesunu. Di̱ne mang kai ni̱re, mi̱n bunti̱ chi we bi̱nti̱tu ka nang bi̱bi̱le ti̱me mi̱n ni chi riye.”
Yinangu m Bulus a woki̱ti̱m ki̱mangu
12Yinangu mang chakakku ki̱ni nangang ki̱bwilang ki̱kangu, wuka di m mi̱n a wa̱re Dimasku, di̱ne tikaketi fanseti a ni da a niti̱ taki̱da wu ki̱ni dukane. 13Ki̱ni tibe kuko Mai, nang daandu we, n ku kaang yiiku ki̱ku a lati̱ wu a kuko a chire a dii, a yingei n ti ni̱bu ni̱n bungadu waremu. 14Ni̱nni ki̱ni kwang ni̱n yaran a ti̱m, yinu n nwe di̱kan ker ki̱fwami ya̱m ki̱ni yii ni̱bu Yafudame ko, “Chawulu, a mayire mun ni mi̱n riye? Mun ni dur mun riye we kati̱n ti̱tu mun madu n ti mi̱nitu.”
15M mi̱n m bi̱u mi, muna wure, Tewuduwe?
Mi̱n nang Yesu, wu mun ni riye. 16Kun, n yungi̱n dur mi̱nu di̱ne mwang kau wuduwe bwe nangangemi mwan mami nangang, mwang ma di̱mwar we chi mwang kuutu a di̱mi̱ne n ti chi yamang yungi̱nu a bwa kake.
17Mang yunu we ni̱bu mumu, n ti ni̱bu bi̱bu n ke kuu ni̱bu Yafudamu, bi̱bu man tum munu we di̱chiyemu. 18Mwang wudu chimi̱n nuiyu, ka chiredu we ki̱liye n ti fa̱la̱ng Setanangu ka ki̱la bwa di̱Kwama. Ka a ma yiko ka ya duku we ki̱leti chiyu. N chi ka yati̱ kula ware n ti ni̱bu bi̱bi wauwadi̱mu di̱ne keku bi̱yili̱mang a di̱mi̱nengu.
M Bulus a fwa nangan kangu
19Di̱ne yiko, Tete Mai Aka̱rifa, mang kobu dwakam bi̱yili̱mu mang kuumu. 20Di̱ne yiko, m mwe di̱mwaru we Dimasku yinu m mwetuwe Wurchalima n ti ba̱la̱ng Yafudiya kwang n ti yikayu kuuti, mi n chi a duwe chi ti̱bwilaitu a ki̱la bwa di̱Kwama, ti̱nti̱ne nangi̱n ti̱yili chitu ka yungdu n chi a suten. 21Nang chi a yo bi̱kamu ni̱bu Yafudamu a tai we Kan di̱dunu a Wurchalimanu ki̱baddu ka chiyitu.
22Aya n Kwama a makai a lanta di, nang chi a yo mi̱n ma seli̱bu n ti bwesi̱mu mi̱n di̱mwaritu. Mang fwabu bi̱kam ya̱m aya nang bi̱bu fa̱kubu n ti Musa a fwa ko ka fwedi̱mu. 23Mi̱n fwa Masiya wu a mwintuwe ka nwe riye, ka kau wukake we kunki̱ kwa̱miyagu. We yiko, nang ki̱swi ni̱bu nabwen ka kuun diye, ni̱bu Yafudam n ti yikayu kuuti.
24Yo m Bulus we ki̱kwila ya̱m ni̱bi̱mu a dur ki̱ni̱me, n Festu a fwa ya̱m ki̱ni dukan ko, “Bulus, dur munu a ribu! Nabwe kiku mwangu a yingle ki̱kwa̱me mo!”
25Aya m Bulus ko, Tete Festu, dur mi̱nu a ri. Mi̱n fwa bi̱yili̱mu ki̱ni ni̱r mi̱ni si̱k. 26Mare m Mai a yim, mi̱n fwa ki̱mi̱n ya̱mu a ne tayi we. N yim a tabi̱bu bi̱kam we ya̱miyu mi̱n fwadiyu. Di̱ne a fwebu a bura. 27Tete Mai Aka̱rifa, “N ke bi̱yili̱mu we fa̱kubu Kwama ma? N yim n ke.”
28M Mai Aka̱rifa ko, “Bulus, mwang yodu mang kau naba bunti̱ke we baku swi wu bayi̱ma?”
29M Bulus a yi ki̱n ko, “Ki̱swi bayim ka nabwen na, mi̱n twa̱ba̱bunitu we Kwama n ke di̱ne kana mune aya n ti bi̱bu we fi ki̱nweyimu, ka kadu yinang mi̱n aya a bwin kwabaku a maklanangu.”
30M Mai a kun, Kwabna a kun ti̱n n ti Benis n ti bi̱bu ware n ti chimu. 31Yo n chi a chir we kan kabaki̱ne, n chi a ti ki̱twayadu ko ni wu a mabu chi a lwe yi̱ngeke ka bwange.
32N Aka̱rifa a yi Festu ko, “Ka n ke ni wu a tu a yi ko ni̱bu a tung ya̱m ki̱mu a di̱Kaisare, a no mwang maiyu.”
ទើបបានជ្រើសរើសហើយ៖
Nangi̱n Fandubi̱m 26: Tula
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, The Nigeria Bible Translation Trust and Wycliffe Bible Translators, Inc. All rights reserved.
