Nangi̱n Fandubi̱m 27
27
M Bulus a le kwa̱mbi̱re mwe a ki̱yika Roma
1Yo dokaku a ri nang yika Yitaliya, ni̱bu a du Bulus n ti bi̱kam ni̱bu ti̱bi̱nti̱li̱m a kang wuka wuduwe ni̱bu ki̱rangmu, wu di̱n ki̱nu n Yuliyus, n ki̱n wuka we ni̱bu ki̱rang kwa̱l Kaisari̱nu. 2Ni̱n kun yayu, ni̱n bunti̱ kwa̱mbi̱re mwe wu a ti̱m Adiramitiya, wu ki̱baddu ka bunti̱ beti̱ bi̱ni yiyu a ki̱ti̱ku Asiya. Wuka naba Tasalonika wu a ti̱m Makadoniya di̱n ki̱nu n Aristakus, n we n ti ni̱n. 3Bafi̱nenangeko ni̱n lam Sidon. N Yuliyus a maka Bulus, a du ki̱n a ya bwana fati̱bi̱ ki̱me ke n chi a maka ki̱n. 4Yo Nang kun ki̱ni kwa̱mbi̱re mwe, ki̱fi̱be mwe a yingle ni̱n. Di̱ne yiko ni̱n bunti̱ kuteng Saiyifuru ba̱la̱ngu ki̱fi̱be a ne dukan wengu. 5A kutengu nang yabu nabwe la ti̱m Ki̱likiya wu a wume Famfiliya, ni̱n yika Mira, wu a wume ti̱m Likiyame. 6We fiko wuduwe ni̱bu ki̱rang Romame a bau wuka kwa̱mbi̱re mwe Aleksandiriya wu ki̱yika ti̱m Yitaliyame, a yo ni̱n we.
7Ni̱n ma ditiyu nabwen yayu a ku ni̱mi̱nbu, ni̱n mwata Kinidus yi bawi. Di̱ne ki̱fi̱be mwe a du ni̱n be, ni̱n bunti̱ ki̱ti̱ku bale a ne mwe we, ka nang chikiye a kuteng bekune Kirite a kwati̱na Salomiye. 8Ni̱n bunti̱n ki̱ti̱ku laang, ni̱n su fiko bawi, yinu ni̱n lam wuka fi wu ni̱bu ki̱yalu ko yo ni̱re laike ki̱dwan n ti bi̱n Likiyanu.
9Yade nang kai ki̱swi we fiko nabwene, yayu a kabbi ki̱ni riye. We ki̱dang kangu ki̱swi a tu a su nabwen, ka nang chikiye di yiye yafudame wu a da̱uku dimwen ki̱letiye a su. Yinu m Bulus a ngau chimi̱n ki̱kure. 10N ki̱n a yi chi ko, “Ni̱bu, n ku yayu wu yaka bwiladu, yaka yo chitu nabwen ka twiyadu, chi ka twiyade n ke kana kwa̱mbi̱re mwe n ti kuli̱n, ti̱kuri chi̱retu n wetuwe.” 11Aya n Yuliyus a kebu ki̱ni ya̱m Bulus, n ki̱n a ki̱la a ke ya̱m ni wu ki̱sii kwa̱mbi̱re mwe n ti wu kwa̱mbi̱re mwe n wu ki̱ne.
12Yade fi n chi ka fi̱kande a lebu we kwa̱mbi̱re mwe ka sa̱na̱ng wenge, duwe chi kwang a ke ko chi chakakku ki̱ni yayu, ka we chi lam Finikiya ke chi ma sa̱na̱ngu a bwako. Finikiya wuka fi wu kwa̱mbi̱ri mwei ki̱ tiindu a Kirite wu ki̱da̱ng ki̱twale n ti tibe ki̱twale n ti twa̱r wuli̱n.
Ki̱fi̱be mwe laa
13Yo ki̱fi̱be a mwe ki̱kunedu we twa̱r wuli̱ni bayim bayi̱me, ni̱bu a da̱u ko chitu ka swe bunge. N chi a wuwe ka̱mbi̱ru ki̱tau kwa̱mbi̱re mwenu, a bunti̱ bekune mwe wu a Kirite, ki̱dwan n ti ki̱ti̱ku laangu. 14A tibu ke di̱kan di̱bwilan ki̱fi̱ben a chire a bale tibe kir kulane n ti twa̱r a fwale suuu we bekune mwe. 15Yinangu ki̱fi̱be a tung kwa̱mbi̱re mwengu, a newe ki̱ni dukan ka mwatu ki̱fi̱benu we. Ni̱n du ki̱fi̱be ki̱ tung ni̱nu a ne chi nang maditu we. 16Yinangu nang bunti̱ kuteng wukane bekune mwengu, wu ni̱bu ki̱yalu ko Kauda, ki̱fi̱be a swe bunge we fiko, ni̱n wuwe be kwa̱mbi̱re mwe bawi ki̱dwan n ti kwa̱mbi̱re mwe wuduwe.
17A kuteng ki̱ku n chi a wuwe kwa̱mbi̱re mwe wuti̱re a yo we wuduwengu, n chi a do bwiyu a kwaba dwati̱tu a kana kwa̱mbi̱re mwe wuduwe ki̱n, ko ke a wuladuwe. Di̱ne n chi ki̱wulu ko kwa̱mbi̱re mwe ke a a ngaudu duru we yane Sirtise, n chi a si̱ku si̱kki̱ni ka̱mbi̱ri a no kukunu ko ke ki̱fi̱be a tung kwa̱mbi̱re mwe a ya yayu n ki̱fwane.
18Di̱ne muli̱n mwenu, ki̱yingle ni̱nu yinang, bafi̱nenangeko, n chi a mwe ki̱ wo kuli̱nu a kwa̱mbi̱re mwenu ki̱kuru a mwe. 19We wutare di, n chi a chaku di̱kanu kuli̱n ki̱ni fa̱li chi we kwa̱mbi̱re mwe a fwal a fi̱lang. 20We yiko, ni̱n ma ditiyu nabwenabwen nang kubu di n ti ki̱switiyu. Di̱bwilan ki̱fi̱ben di̱du ki̱riti̱nu a ka di̱ni̱nne. Di̱ne riye, ni̱n da̱u ko nang twiyadu we mwe laa.
21Yade a da̱u ki̱swi n chi a chabu chiye, m Bulus a kun a ti we tibe chi a yi chi ko, ni̱bu, ka no ti̱nwe ya̱m mi̱mu mang yi mi ni kunu we bekune mwe Kirite, a no niyang nwebu riye wu. 22Aya ki̱ka̱ngu mi̱n ngau chimi̱n ki̱kure ti̱mu ni̱ri kwing, a ne ni ka kwala ti̱kuri kite we tibe chi̱n aya ni medu ni kwala kwa̱mbi̱re mwe. 23Nangki̱n, we kum wu, wuka naba di̱tumbi̱re wu m mi̱n a fa̱la̱ng kange, Kwama wu mi̱n ma ki̱mi̱n nangange, a timituwe. 24A yi ko, “Nwedu tayi we Bulus, a mwintuwe mwang tidu we kakku Kaisarangu. Aya di̱ne mune, bi̱bu ti̱bungadu waremu ka swidu we a li̱me Kwama. 25Di̱ne yiko, ti̱mu ni̱ru kwing ni̱bu, di̱ne n ke bi̱yili̱mu we Kwamami yinangu a fwamiyangu, ka fwedi yiko. 26Aya a mwintuwe di̱bwilan ki̱fi̱benu ka twa̱ki̱ nidu ka yika mi̱n wuka yane bekune mwe.”
27We kum wi kub chiri yaana, di̱bwilan ki̱fi̱benu ki̱fi̱ki̱ kwa̱mbi̱re mwe nabwe laa Meditereniyane, ki̱ni ki̱tangti̱lang kuma̱ng, ni̱bu ki̱sii kwa̱mbi̱re mwemu a da̱u ko kano ni̱n mwata ki̱dwan n ti ti̱mu. 28N chi a swe swa̱n mwenu, aya a lam naniyu kuul ki̱ni wan turau. A kutengu nang chau kakki bayimangu, a sweti̱ ki̱da. A ya naniyu wan turkubu. 29Di̱ne n chi ki̱wul tayu ko ke chi tekaduwe n ti wuka bekune mwe, n chi a kwi ka̱mbi̱ru ki̱ni turenginu n chi yaana a mar we kuteng kwa̱mbi̱re mwengu ko ke kwa̱mbi̱re mwe a kwanti̱duwe.
30Aya ni̱bu ki̱sii kwa̱mbi̱re mwemu a swe tali̱mu ka wulu. N chi a si̱iku wuti̱re kwa̱mbi̱re mwe ko kano ni̱bu ka da̱ddu ko chi si̱ku ka̱mbi̱r di̱du ki̱ni turen we kwa̱mbi̱re mwe wuduwe. 31Yinu m Bulus a yi wuduwe naba kune Roma n ti ni̱bu ki̱rangmu ko, “Ka ni̱bu bi̱bu a swebu we mure kwa̱mbi̱re mwe, a ne da ta swide we.” 32Yo n chi a nwe, ni̱bu ki̱rangmu a mwata ti̱dwatu kwa̱mbi̱re mwetu, a du kwa̱mbi̱re mwe a ya we mwe.
33Yo ti̱mu a kwiyane, m Bulus a wana chi ko a chau chitu. A yi chi ko, “Wudiye kub chiri yaana, a kana kamaku di̱ne kabu yayuwe a ma bwar, ta chabu ti̱kan chi. 34Di̱ne yiko, mi̱n wana chi̱nu ti̱chau chabti̱tu di̱ne li̱mang bwiyangu. Di̱ne n yim wuka chi̱n a ne kwala kasi no ki̱riyang kangi kiin we dur ki̱nu.” 35Yo a fwa bi̱be, a da̱u ki̱danne, a twa̱ba̱bunitu a wana Kwama, yinu a wulan a nika chi. 36N chi ki̱ni kwang a ya kungku ni̱rangu, n chi a chatti̱ chabti̱tu. 37N ni̱n ki̱ni kwang we kwa̱mbi̱re mwe, kuuliti turau ki̱ni wan ti̱dibiin chiri burukuun. 38Yo n chi a chau a lwe, n chi a kaar chaammu a fwala mwe. Ti̱tu a yo kwa̱mbi̱re mwe a ma wayang.
39Yo ti̱mu a kwiyane, ni̱bu ki̱sii kwa̱mbi̱re mwemu a yimbu bwa chi a ngan dure. Aya n chi a swaan wuka fwiti̱ne ki̱swaiye n chi a bunte. Yinu n chi a funti̱bwi a sii kwa̱mbi̱re mwe ko chi yodu a yane ka we fwede. 40N chi a mwata dwa̱ti̱tu a ka̱mbi̱r di̱du ki̱ni turenu, yinu a duwe mwe. We ki̱swi wuko n chi a kwi ki̱lwade we chi ki̱ tung kwa̱mbi̱re mwe. Yinu n chi a kuku ka̱mbi̱ru a kakku kwa̱mbi̱re mwenu yinangu ki̱fi̱be ka medu ka tungdi kakangu. N chi a yo dur kwa̱mbi̱re mwenu a bale mwe.
41Aya yo nang lam fi mwe ki̱ngabande, kwa̱mbi̱re mwe a ku yane, a yo dur kwa̱mbi̱re mwenu a le yane ki̱ri̱ng. We bale kutenge, kwa̱mbi̱re mwe a mwe ki̱ngi̱radu di̱ne di̱bwilan labi mwetu.
42We fiko ni̱bu ki̱rangmu a kun ki̱baddu ka chi̱be ni̱bu ti̱bi̱nti̱limu, di̱ne ke wuka a wullu a swiduwe. 43Aya naba kune wuduwe di̱ne a ke ka yu Buluse, a ko ti̱kuran ti̱tu. Yinu a ni da ko ka nang wuwule niye wu a me mwe, a chir a yu yikiyu a yika ki̱ti̱ku laangu. 44Bi̱kamu a fi̱l bwi kwa̱mbi̱re mweyu, bi̱kamu a fi̱l ti̱wulani kwa̱mbi̱re mwetu. Nang tiyangu n chi a chir mi̱n we laa li̱mangu.
ទើបបានជ្រើសរើសហើយ៖
Nangi̱n Fandubi̱m 27: Tula
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, The Nigeria Bible Translation Trust and Wycliffe Bible Translators, Inc. All rights reserved.
