Nangi̱n Fandubi̱m 25
25
M Bulus a yikani ki̱ni ya̱m ki̱mu a di̱ Kaisare
1Diti yitta a kuteng ki̱ku n Festu a be ke ki̱chakakku ki̱ni Kwabnatangu, A kun we Kaisariya a yika Wurchalima. 2We bwako, tikaketi fansetiyu n ti tikaketi ni̱bu Yafudam, a mar keme Buluse a di̱ki̱ne. N chi a wana ki̱n ko, 3a ma wa̱re m Bulus ka ki̱lan Wurchalima di̱ne chi a do bi̱kam ni̱bu ka mwatu ki̱nu we wa̱re ka chidu. 4N Festu a yi chi ko, “Ni̱bu ka to Bulus a Kaisariya, m mi̱n m mi̱fwan mang ya bwako a ne tike. 5Di̱ne yiko, bi̱duum chimu a be ware n ti mi̱n, ka ni wu a ma wuka ki̱le, n chi ka bi̱tti̱nu.”
6A kuteng ki̱ku n Festu a da ditiyi nari̱bu ka kubengu, a kun a ki̱la Kaisariya. Bafi̱nenangeko, a yi ni̱bu ko a chakku ki̱mi̱ne Bulus, n ki̱n a swe a kaba ya̱mu. 7Yo m Bulus a lam fiko, ni̱bu Yafudamu a chire we Wurchalima a kun a mu ki̱mi̱ntuwe ki̱ni ya̱miyu we dur ki̱nu nabwen yiyu a mabi̱ duri. 8Yinu m Bulus a kun a yu dur ki̱nu ko, “Mang mabu ki̱le we yili̱n ni̱bu Yafudamitu n ti kan di̱dunu a Wurchalimanu ka n Kaisare ko bayim.”
9N Festu wu ki̱baddu ni̱bu Yafudamu ka wer ki̱ne, a yi Bulus ko, “We mwang kedu mwang ya Wurchalima ke ni̱bu a kaba mi̱n ya̱m bi̱bu we kakku manga?”
10M Bulus a yi ki̱n ko “M mi̱n a kakku kan mwataku Kaisar, finu nang kan mwataki̱nu wu a Roma siine, fi nang fi a dakan ni̱bu ka kaba mi ya̱m we. Yo kwer mwang yim mang mabu ki̱lewe ni̱bu Yafudame. 11Ka m mi̱n mang ma ki̱le wu a lwe mang bwade, a ne mang kodu mi ni̱bu a chiyuwe. Aya ka a ne bi̱yili̱m we keme chiye, a ne nii a lwe ka ni mi̱nu a fa̱la̱ng chiyange we. N ke ya̱mu ka yika kakku Kaisar.”
12A kuteng ki̱ku n Festu a twaya ya̱mu n ti kwa̱l ki̱nangu a ke ko, “Ya̱m mumu a da, ni̱n tung ya̱mu a di̱Kaisare yinangu mwang babbangu.”
M Bulus a kakku Aka̱rifa n ti Bani
13A kuteng diti bayimangu, m Mai Aka̱rifa n ti Benis a ya Kaisariya yaka siye Festu. 14Yade n chi yaka ma diti we bwako, n Festu a fwa Mai mi̱n ya̱m we dur Bulusi̱nu. N ki̱n a yi Mai ko, wuka ni we wu n Felis a dummi a di̱bi̱nti̱le. 15Yo mang ya Wurchalima, tikaketi fanseti n ti tikaketi ni̱bu Yafudamu a mar keme niwe a di̱mi̱ne ko, mwata ki̱mi̱n ya̱m chi̱kki̱m.
16N ki̱nta chi mi a dakabu we da wu Roma ni mwata ni mi̱n ya̱mu niyang ya̱nti̱labi̱m. A dakan bi̱bu a mar kememu ka fwa ya̱m, n ti wu n chi a mar keme ko yinu naba ki̱le ka da̱u ki̱le ko. 17Yo n chi a be fi a di̱mi̱ne, mang kaibu ki̱swi n yi chi mi a be miye ki̱n, n swe n kaba ya̱mu.
18Yo ni̱bu a mar kememu a kun ki̱fwa ya̱me, n chi a chirebu ki̱ni wuka ki̱le wuduwe wu ki̱kamadu kanodu a mange. 19Chi mang swaane, n chi a tuka ya̱m a wa̱re bunti̱ke, n chi a kebu n ti bwa wuka niye wu n chi ki̱yalu ko n Yesuwe, wu m Bulus kiyi ni̱bu ko n we ki̱ni ti̱kuriye. 20Yinangu mang ku chitu a ma bwarangu, m bi̱u Bulus mi ka n ki̱n ka kedu ka ya Wurchalima ke ni̱bu a kaba ki̱mi̱n ya̱m bi̱bu we bwako. 21Aya yo m Bulus a bau ya̱m ki̱mu ka yika kakku Kaisarange, n yi ni̱bu mi a nang to ki̱nu a lami̱nti̱ yo mang tung ki̱nu a bwa di̱Kaisare.
22Yinu n Aka̱rifa a yi Festu ko, “N ke mang nwe ya̱m ni wumu m mi̱fwan. Wuko ko, ‘Mwang nwe ya̱m bi̱bu fi̱nenang.’ ”
M Bulus a fwa Aka̱rifa mi̱n ya̱mu
23Bafi̱nenangeko n Aka̱rifa n ti Benis a lewe ki̱ni kuli̱n mati̱mi̱n, n chi a be n ti tikaketi ni̱bu kuni̱mu n ti bi̱duumu a bi̱ni̱mu. Yinu n Festu a yi ni̱bu ko a be ki̱ni Bulus. 24Yinu n Festu a yi ko “Mai Aka̱rifa n ti ni̱bu we fimu, nii wu ni̱bu Yafudami kwang a mar kemeko a Wurchalima n ti Kaisariya n nang wu. N chi ki̱bwa̱ka ti̱ni kemi ko ni dudu we ki̱ni ti̱kuritu. 25Aya m mi̱n mang kubu chi a ma, wu a lwe ka bwade. Aya yo n ki̱n a yi ko ni ya ki̱ni ya̱m ki̱mu a nii wuduwe n Kaisare, n ke mi mang tung ki̱nu we bwako.
26“Aya a bwin yiko, m mi̱n mang yabu ki̱kwi tas wu mang mwal Mai Kaisar mi̱nu a dur ki̱ne. Di̱ne yiko m be ki̱ni ki̱n we kakku changu Aka̱rifa mi ka we mang ya chi mang mwalu a dur ki̱n a kutengu ni ta̱l ya̱m ki̱mange. 27We di̱mi̱ne ka kadu yinang di̱tu ka ni chaku ni wu we di̱bi̱nti̱lu ni tum, niyang yungbu ki̱le wu a mange.”
ទើបបានជ្រើសរើសហើយ៖
Nangi̱n Fandubi̱m 25: Tula
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, The Nigeria Bible Translation Trust and Wycliffe Bible Translators, Inc. All rights reserved.
