Nangi̱n Fandubi̱m 21
21
M Bulus a yika Wurchalima
1A kuteng ki̱ku nang yo mi̱ne Bulusangu, ni̱n tau wa̱re, ya ni̱n le Kwa̱mbi̱re mwe we nabwe la wu a Kose, bafi̱nenangeko ni̱n yika Rodiyasa, yinu ni̱n kun we fiko ni̱n yika Fatara. 2Kangu nang ya kwa̱mbi̱re mwe me wu ki̱yika Finikiya, ni̱n le ni̱n yika ti̱n.
3We yayu kangu ni̱n yikadangu, yo nang mwata Saiyifuru, ni̱n mar bi̱nu a kantakwelang ni̱n su ni̱n yika Suriya. Yinu ya ni̱n si̱ku a Taya fi kwa̱mbi̱re mwe ka si̱ki̱n kuli̱n ki̱ne. 4Kangu na ya fi ni̱bu bunti̱ki̱mu wemi̱nengu, ni̱n ma ditiyi yidibiin we fiko. We fiko Fi̱ki̱m Kwamamu a twai chi we ni̱tu chitu, yinu n chi a yi Bulus ko a yadu Wurchalima we.
5Aya yo ki̱swi nang yikande a lame, ni̱n kun ni̱n chakakku ki̱ni yayu. Ni̱bu bunti̱ki̱mu n ti bwesi̱m chimi kwang a yo ni̱ne a kuteng bi̱nang. Yinu ni̱n sung ni̱n twa̱ba̱ bunitu we ki̱ti̱ku laangu. 6Yo nang riye, ni̱n le kwa̱mbi̱re mwe n chi a ki̱lati̱ lo. 7A kuteng ki̱ku nang du Tayangu, ni̱n chakakku ki̱ni yayu we mwe ni̱n yika Tolemayi, ya ni̱n sikan n ti kebu ni̱bu bunti̱ki̱mu we fiko, ni̱n datuwe di wiin.
8Bafi̱nenange ko ni̱n yika Kaisariya ya ni̱n le lon Filibu wu ki̱ma di̱mware, n ki̱n wetuwe bi̱bi bi̱dibiimu ni̱bu a sutu di̱ne ke a nang kera chabti̱mu. 9Nii wu ki̱ni fwa̱niti ti̱dibiin ti̱tu ki̱ma fa̱kuitu. 10A kuteng ki̱ku nang ma diti we fikongu, wuka naba fa̱ku, di̱n ki̱nu n Aka̱bu, a be a Yafudiya.
11Yo Aka̱bu a be fi a di̱ni̱ne, a yiu chi m Bulus ki̱muun tarre, a mu tar ki̱nu n ti nani kiyi ki̱n, yinu a yi ko, “Chi Fi̱ki̱m a fwa nang wu, bi̱duum ni̱bu Yafudamu ba Wurchalimamu ka kwau naba kuli̱n di̱de ying, ka da̱du ka ni kuu Roma.” 12Yo nang nwe ya̱m bi̱be, n ni̱n bi̱bu ni̱n ya yayu n ti ki̱ni̱mu, ni̱n wana ki̱n ko a yadu Wurchalima we.
13Aya m Bulus a yi chi ko, “Ti̱fwa wureni ye? A mayire ti̱chimi bwiye, n tu n do bwiyu, n ke di̱ne kana riye mang nwedu a Wurchalima aya kasi no mang bwadu, ka kwer mang bwadu a di̱n Tewuduwe Yesune a lami chi.” 14Yinangu nang swan ko m Bulus a ne sute ni̱rangu, ni̱n ma bwanu ni̱n yi ko, “Tewuduwe ma chi mwang ku a letu.” 15A tibu ke, ni̱n wo kuli̱nu, ni̱n yika Wurchalima. 16Bi̱kamu ni̱bu bunti̱ki̱m we Kaisariya a ya, a yo ni̱ne. N chi a ya, a yo ni̱n a lon Manasone. Nii wu naba Sayifuru. N ki̱n wetuwe bi̱kaki̱mu a ni̱bu bunti̱ki̱mi̱mu.
M Bulus a ya Yakubu mi̱n siram
17Yo nang lam Wurchalima, kebi̱bu a yiu ni̱n fa̱liyi yurau. 18Bafi̱nenangeko m Bulus a yika bwa di̱Yakubu n ti ni̱n. Seli̱bu ni̱bu bunti̱ki̱mi kwang we fiko. 19A kuteng ki̱ku, m Bulus a sikan n ti ni̱bangu, n ki̱n a fwa chimi̱n kanang ti̱ti̱le chiye kwang ti̱tu n Kwama a ma yikayu kuuti mi̱n we nangangu m Bulus a mangu.
20Kangu n chi a nwe ya̱m bi̱bangu, a ni Kwama dwiyentu yinu a yi Bulus ko, “Fate, ni̱bu kuniri ni̱bu Yafudamu a ke bi̱yili̱mu, n chi ki̱ni kwang ki̱ni ni̱ru ka bunti̱ yili̱n Musatu.” 21Ni̱bu bunti̱ki̱mu a fimu a ya ya̱mu ko m mun, mun miya ni̱bu Yafudamu a swe n ti bi̱bu n ke kuu ni̱bu Yafudame mi̱nu mwiko a ni yilang Musangu kuteng. N chi ko mun yi ni̱bu mwiko a bidu laaru we bwesi̱mu, a bunti̱nu yikayu daati Yafudamu we.
22Yoye nang ma bi̱bu ya̱mi yire, yo n chi a nwe ya̱m beku mwange? 23Di̱ne yiko, mwang ma chitu nang fwa mi̱nitu. Ni̱nni ki̱ni ni̱bi baana bi̱bu a bwa̱u we ni̱r chini̱mu. 24Bungan n ti ni̱bu bi̱bu, ti̱ma yiye nurake ware kwang, yinu mwan fe chi a tabbitu ke dutu chitu a ya kwalku. Yinu ni̱bu ka kedu ko a ne bi̱yili̱m we ya̱m bi̱bu ni̱bu a fwa a dur muni̱mu. Aya n chi ka kedu ko mwang mabu ti̱kali ki̱ni yili̱n Musatu.
25Aya ni̱bu yikayu kuuti bi̱bu a ke bi̱yili̱mu, ni̱n tu ni̱n mwal chimi̱n ko, a chadu chabtu di̱yoritu we, n ti yaritu, a wuti̱nu naiyu ni̱bu a bibubiyeyu we, n ti nam wubware.
26Yinu m Bulus n ti ni̱bu bi̱bu a ma nuraki̱ku, yinu a le Kan Kwamanu a Wurchalimanu yaka fwa di nuraki̱ chiyangu ka ride. Di ni̱bu ka ma niku di̱ne kanang ti̱ti̱le chiye.
Ni̱bu a tau Bulus we Kan Kwaman a Wurchalimanu
27Yo ditiyi yidibiin a mwatan ka ride, bi̱kam ni̱bu Yafudam a Asiya a be ku Bulus we Kan Kwamanu N chi a suke ki̱tuu ni̱be ko a tau Bulus. 28N chi a bwe kemi ko, “Kebi̱mi̱m ni̱bu Yisrelamu, ti̱be makaku! Nii wu ki̱ bwa̱lu kasi no bwa̱le ki̱fwa ya̱mu a li̱mbuli̱mem kiyi ni̱bu ko a bunti̱nu yili̱n chi̱retu we nang wu. Ki̱fwa ya̱mu we Kan Kwamanu a li̱mbu a bwin ni̱bu Yelena a wo, a le Kan Kwamani ki̱ni̱mu.”
29N chi a fwa ying, di̱ne a no ku m Bulus ki̱bwa̱lu we bi̱nu n ti Tarofimu naba Afisa. Ti̱tu nang chi a yo n chi ki̱kamadu ko kano m Bulus a le Kan Kwamanu ware.
30Bi̱nu a kayan, n chi a kunne ki̱ni kaiyan ni̱re a be tau Bulus, a chakku we kan Kwamanu a Wurchalimanu, a yingeti̱ kanu a kutengu n chi a chiri ki̱nangu. 31Kangu n chi we ki̱ma ki̱chitu wuwangu, ya̱mu a ya wuduwe ni̱bu kuni̱me ko bi̱n Wurchalima ki̱ma di̱kulan. 32N ki̱n a yal ni̱bu kuni̱m ki̱mu n ti bi̱duum chimu, a ya we bwana di̱kulane. Yo ni̱bu ki̱baska chimu a ku wuduwe ni̱bu kuni̱mu n ti ni̱bu ki̱me, n chi a du ngakku Bulusangu.
33Wuduwe a be tau Bulus a yo ni̱bu a kwabi maklan. N ki̱n a fwa ki̱tuu ni̱be mi̱n dukan ki̱nu n ti chi n ki̱n a matu. 34Ki̱tuu ni̱be a ki̱la le tukaku, bi̱bu ko ying bi̱kamu ko ying. Ya̱mu a ne da we ni swan bi̱yili̱mu. N ki̱n a to yiko, a yi ni̱bu ko a yikan sabi̱r ki̱ni Bulus#21:34 Sabi̱r: Sabi̱ru nang ki̱twalangu ni̱bu ki̱rangmu a mun loni chiyu ki̱ni yii Ki̱tule, wuka yo sabi̱ru ki̱yungdu mwang sutedu mwang yo kuteng. 35Yo n chi a lam ti̱di̱ngri lo diite, n chi a da̱u Bulus di̱ne kulangkulange ki̱lami̱ne fiko. 36Ki̱tuu ni̱be ki̱ nabu chide we kutengu ki̱ni kemi ko, “Ti̱chiu.”
M Bulus a fwa ya̱m n ti ki̱tuu ni̱be
37Yo ni̱bu kuni̱mu ya ki̱baddu ka yikadu ki̱ni Buluse, n ki̱n a yi wuduwe ko, “We mwang kedu mang fwa ya̱ma?”
Wuduwe a yi ki̱n ko, “A mwang me yii ni̱bu Yelename.” 38M mun n ke naba Masare wu a yo ni̱bu a ma kulangkulange we swa̱ti̱tu a sutu, wu a wo ni̱bu a bwarani̱mu kuliti taana a yikan nabwe di̱si̱langchangi̱na?
39M Bulus a yi ki̱n ko, “M mi̱n naba Yafudiya, m be a Tarsus wu a ti̱m Ki̱likiyame, m mi̱n bwe bi̱n di̱du a ki̱siyangi̱ne. Mi̱n wananu, dui n fwa ni̱bu bi̱bu mi̱n ya̱m.”
40Yo wuduwe a ni ki̱n da ko a fwa ya̱me, m Bulus a ti we ki̱di̱ngu, a kuku fa̱la̱ngu ko ni̱bu a lemi̱n, yo ni̱bu a le wudidiye, a fwa chimi̱n ya̱mu ki̱ni yii Yafuda.
ទើបបានជ្រើសរើសហើយ៖
Nangi̱n Fandubi̱m 21: Tula
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, The Nigeria Bible Translation Trust and Wycliffe Bible Translators, Inc. All rights reserved.
