Nangi̱n Fandubi̱m 22
22
1“Tebi̱mi̱m n ti kebi̱mi̱m ti̱nwe ya̱m mi̱mu ke ti̱yim tiko n ke ki̱lemi.” 2Yo n chi a nwe ki̱fwa chimi̱n ya̱mu ki̱ni yii Yafudame ka nang chikiye yii chiye, n chi a le si̱ng.
Yinu m Bulus a yi chi ko, 3“Mi̱n naba Yafudiya, ni̱bu a bi̱u mi̱n a Tarsus a ti̱m Ki̱likiya, aya n dwiyen we bi̱n di̱du. N Ka̱maliyel nang nii wu a miya miye, n ki̱n a miya mi yili̱n tukebu chi̱reti kwang, n ke mang sii Kwama yinangu n ti̱ni kwang ti̱badu ta siidangu.” 4N ni ni̱bu ki̱bunti̱ wa̱re wumu riye, n chibeti̱ bi̱kamu. Mi̱n taddu kasi no kwarta ka naye mi̱n di̱ki̱du a di̱bi̱nti̱l. 5Tikake Fanseti n ti kwa̱l tikaketinu a yim chi mi̱n fwaditu. N yiu langi̱ntu a di̱chiye ti̱du mang yika kebu chi̱remu ni̱bu Yafudam mi̱ni ki̱n a Dimasku. N ya bwako di̱ne ke n taba ni̱bu ki̱bunti̱ wa̱re wumu we bwakomu, ke m bemi̱ne Wurchalima ke ni̱bu a yo a di̱bi̱nti̱l a ni riye.
M Bulus a fwa yinangu n ki̱n a sutenangu
(Nfa 9:1-19; 26:12-18)
6Yo m mi̱n we wa̱re mang mwata Dimasku, ki̱ni tibe kuko, wuka nabwe ti ki̱yiye a chirengi wa̱liwa̱li a di̱bi̱ri. 7We fiko n yar a ti̱m, a kuteng ki̱ku n nwe di̱yal ko, “Chawulu, a mayire mun nimi̱n riye?” 8N kemi, “M muna wure Tewuduwe?” N ki̱n a ke ko m mi̱n nang Yesu wu mun ni riye, m mi̱na Yesu naba Nasa̱rete. 9Aya bi̱bu we ware n ti mi̱ni̱mu a ku ki̱yiye fiko wa̱liwa̱li aya a nwebu ya̱mu. 10Yinu n yi mi, “Mang ma wureni Tewuduwe.” Yinu Tewuduwe a ya̱i ko, “Kun n le Dimasku, we bwako ni̱bu we fwa mi̱n chi mwang maditu.” 11Yade ki̱yiye a kwel mi nuyu mang kubu diye, ni̱bu m mi̱n waremu a twa̱ki̱, ni̱n yika Dimasku.
12Wuka nii we bwako di̱n ki̱nu n Ananiya a be bwana di̱mi̱ne, n ki̱n naba Kwama wu a mabu ti̱kali ki̱ni yili̱n Musante, n ki̱n ki̱ni ki̱siyang ki̱duwang we ni̱bu Yafudamu a swe we bwako. 13A be a timituwe ko, “Kemi Chawulu, wudu nuyu ke n ku ti̱mu.” Nuyi miyu a wude ti̱n. 14Yinu n ki̱n a yi ko, “N Kwama wu a tukebi̱ chi̱reme a suti̱n ko ke n yim ki̱ke ko, ke n ku naba yile wu wauwade n nweti̱ ti̱kwa̱li yii kitu. 15Di̱ne mwang kau naba di̱mware ko we ni̱bu ki̱ni kwang, mwang fwa chimi̱n chi mwang kuutu n ti ti̱tu mwang nwetu. 16Ki̱ka̱ngu mun yam wureni? Kun m ma batisma, nura ki̱leti mwiyu we yalki̱ di̱n ki̱nangu.”
M Bulus ka ma yikayu kuuti mi̱n di̱mwar
17Yo mang ki̱la we Wurchalima, n le mi̱n twa̱ba̱ bunitu a Kan Kwaman. We mure m ma dwakam bi̱yili̱m. 18We dwakam bi̱yili̱mu, n ku Yesu ki̱fwami ya̱mu ko, “Ma datu, yikan, du Wurchalima, di̱ne n chi a ne ke di̱mwar munu we dur mi̱nu.” 19Yinu n yi mi “Tewuduwe n chi chifwan a yim ko n le ka nang di̱di̱le kan Kwamane n kwaba bi̱bu ki̱ke bi̱yili̱mu a di̱n muni̱mu, n ngau, n ni riye.” 20Yinu yo ni̱bu a chi̱u Yistifanu, m mi̱n we fiko n ku ki̱ni numi. N ke ki̱ni chi ni̱bu a maatu, m mi̱n nang ni ki̱to kuli̱n ni̱bu bi̱bu a chi ki̱ni̱mu. 21Yinu Tewuduwe a ya̱i ko, kun n yikan, mang tum munu kutan we yikayu kuuti.
22Ki̱tuu ni̱be a le wudidi ki̱nwe ya̱m ki̱mu a lami̱nti̱ yo n ki̱n a fwa di̱kwa̱l didde, n chi a yiu ki̱ni kemi ko, “Ti̱chiu! Ti̱dudu duum ni̱bu bi̱bu we ti̱ti̱nitu, a dakabu ni duddu ka chakakku ki̱ni ti̱kuritu.” 23N chi a ri fiko ki̱ni kemiyu ki̱kukku lukei chiyu a dii ki̱ni kuri suk. 24Yinu wuduwe naba kunne ni̱bu ki̱rangmu a yi ni̱bu ki̱mu ko a yikan sabi̱r#22:24 Sabi̱r: Da̱ng Nfa 21:34. chi̱ni ki̱n. A ni da ko ni̱bu a twal Bulus we sabi̱ru ke a fwa chi a yo ki̱tuu ni̱be ki̱ma ki̱mi̱n kusi̱r di̱de. 25Yo n chi a kwaba ki̱n baddu ka twala ki̱ne, m Bulus a ki̱l yii a bi̱u tikake ni̱bu ki̱rang Romamu a ti ki̱dwan n ki̱ne ko, “A le we yilangu ni̱bu ka twal naba Roma yo ni̱bu a tibu mwa̱ta̱ki̱mi̱na?”
26Yo nii wu a nwe ya̱m bi̱be, a ki̱la bwanu a wuduwe ni̱bu kuni̱me, a yi ki̱n ko, “Yamwang ma wureni ye? Nii wu naba Roma sulo.” 27Yinu wuduwe a ya, a bi̱u Bulus ko, “Fwa bi̱yili̱m, m mun naba Roma?”
M Bulus ko, “Yi bas.”
28Wuduwe ko, “M Mi̱n ti̱n naba Roma, n kai ka̱mbi̱ru nabwen yinu n ya da wu.”
M Bulus a yi ki̱n ko, “Ni̱bu a bi̱u mi̱n we ti̱m bi̱bu.”
29Ni̱bu bi̱bu a no ki̱baddu ka ma ki̱mi̱n ti̱bi̱dirimu a ki̱lani kuteng. Tayi a tau wuduwe ti̱n yinanga nwe ya̱m bi̱bangu. Yinu ti̱nti̱ne ki̱kuru n ki̱n a tu a kwau naba Roma.
M Bulus a kakku kwa̱l kabaki̱n
30Bafi̱nenangeko wuduwe a no ki̱baddu ka yim chi a yo ni̱bu Yafudamu ki̱ma Bulus mi̱ndi ye, a mar ki̱n yinu a yale tikake Fanseti n ti kwa̱l kabaki̱nu, a muran. Yinu a be ki̱ni Bulus a yo a ti we kakku chiyangu.
ទើបបានជ្រើសរើសហើយ៖
Nangi̱n Fandubi̱m 22: Tula
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2015, The Nigeria Bible Translation Trust and Wycliffe Bible Translators, Inc. All rights reserved.
