MARK 16
16
Jisu in Veikhat Ring
(Met 28:1–8; Luk 24:1–12; Jon 20:1–10)
1 #
Met 28:1–8; Luk 23:56; 24:1–10; Jon 19:39; 20:1–2 Che Sabatni achesoh, Meri Makadalini leh Jems che Salomi anu Meri in amrimtui inteina thao anthlen, chunna anmah in seh a amahta anteinatu. 2Che kouhva matsahrem anrang juktiinga anmah in rusuunpiia sehsei mahlaiva ramvaarsa. 3Che anmah in khatkhat a insonsei, “Rusuun khaarna lungita inihngut a tunang in amilatmeio?” 4Che achunga an an in, lung inlat a amta anmuhpei, mahchu khalmo inrol lungpii. 5Che rusuunna anluut in, intlangsa khat changtonga inbok a am anmuhpei, puunngou a inliing, mahchuta anmuh in salungkhousei. 6Chunna ankuunga asonei, “Salungkhou nohve; nannih in Najareth na Jisu amithlukhata nanjon. Amahvah ringsa, onna amnohsa; amahta amitolhna munkha anve. 7#Met 26:32; 28:7; Mak 14:28; Jon 21:1–23Chuta sehve, amah aroi leh Pitar ninga sonve amahvah nannih nanmaa Kalili a lousehsa; mahchunna nannih in amahta nanmuhpitu, amah in nankuunga matsah a nanisonche khananga.” 8Che anmah in apaalla anthruhche rusuunnata tlaansei; alamva antak inchuun mahche salungkhou suuksei che intrikhemsei.
Meri Makadalini Kuunga Jisu Atakta Ammuh
(Met 28:9–10; Jon 20:11–18)
9Ipekva anmah in kouhtu matsahrem akni inranga, mah chuvah amah in matsahremma Meri Makadalini mah chuvah khousaar sirih amnomna kumeikuunga atakta ammuhpei. 10Amah in anthruhche amahsoh anruuipi ankuunga asonei, chunna anmah in marhuuia trapsei. 11Amah in ringsa mahche keiin kammuhpei ta ankuunga asonkha antheih in anmah in malotnohsei.
Aroi Innih Kuungah Jisu in Atakta Ammuh
(Luk 24:13–35)
12Mahche aknua anmah in ramboomma ansehsuunga, ahoongkhat veia anmah innih kuungah atakta ammuh ei, 13che anmah in anlengche aktlei kuungakho ansonpei, chuta anmah in malotnohsei.
Somleikhat Ankuunga Jisu in Atakta Ammuh
(Met 28:16–20; Luk 24:36–49; Jon 20:19–23; Noon 1:6–8)
14Achenaremma somleikhat in tebor a inbok a an amlaia amah in thlengsa; che anmah in amilotnoh khatkho anriltrang khanna amah in ankuunga asaallei, alamva amah in aringche aknua amahta akmuh in malotnohsei. 15#Noon 1:8Che amah in ankuunga asonei, “Tukleiram anaamte nannih in sehve che akthra trongta mii naamte kuunga raanve. 16Tukhat in malot a inlup akphahta akaltu; chuta tukhat in malotnoh a inlupta amlaaltu. 17Che amlot mii ankuungva mah daang in anruuipituei: kei kikminga anmah in khousaar aminomtu; akthar trong trongtuei; 18muruul suur seilakho che tuur iinseilakho; anmahta jakhatkho tlohnohtuei; akna aksaaeita anmah ankut in anpalla thratuei.”
Jisu ta Ringram a Ahan
(Luk 24:50–53; Noon 1:9–11)
19 #
Noon 1:9–11
Chunna Akpu Jisu in anmahsoh antrongnua, ringramma amahta ahanpei, che Ringpu akchang kuttonga inboksa. 20Che anmah in amun naamtea ansehche anraanpei, Akpu in anmahsoh thlou atlohlaia, daang in atlohthlou akthra trongchu chimsa ta anrompei. Amen.
ទើបបានជ្រើសរើសហើយ៖
MARK 16: TARAOBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.