MARK 15
15
Pilat Kuunga Jisu ta Anthlen
(Met 27:1–2,11–14; Luk 23:1–5; Jon 18:28–38)
1 #
Met 27:1–2; Luk 23:1; Jon 18:28 Che anrang juktiingpia akthloi thiimpu ei, ringjih lulok ei, anparuul ei in inruuia jama annaamsoh trong intelsei; che Pilat kuunga masilnatu anphurhpei. 2#Met 27:11–26; Luk 23:2–3,18–25; Jon 18:29—19:16Che Pilat in akuunga arui, “Nangi Judi eikuruung cheme?” Chunna amah in akuunga amsang, “Nangin nisonpei.” 3Che akthloi thiimpu ei in amahta janoh a maraal khalmo amithlak. 4Che Pilat in veikhat aruilapei, “Nangin namsangtu amnohsame? Anro, anmah in nangta nakjanoh a nichunga maraal jikcha namthlak ei.” 5Chuta Jisu in masangnoh luungsa, mahchunna Pilat in salungkhousa.
Jisu Thatnatu Rai Amithlak
(Met 27:15–26; Luk 23:13–25; Jon 18:39—19:16)
6Ipekva ujouhoong amipaangrel mii in annih nujuih a simma am mii khat amithlahtrang. 7Ramboomta akjanoh, simma am miithat miisun ankaarna akming Barabbas kupakhat am. 8Che miitam in anthlengche Pilat in atlohnanga ankuunga atlohnatu trongrui amthronpei. 9Che amah in ankuunga amsangei, “Nannih turella Judi ei kurungta mathlahnatu nannih angme?” 10Alamva akthloi thiimpu in kallak eia amahkuunga amisilta amah in arom. 11#Noon 3:14Chuta anmah turella Barabbas ta mathlahnatu akthloi thiimpu ei in miitamta anchok ei. 12Che Pilat in veikhat ankuunga asonei, “Chunna nannih in Judi eikuruungta nan ong mii akuunga keiin jangkitloh ume?” 13Che anmah in veikhat tranga onga, “Amahta mathluve.” 14Che Pilat in ankuunga ason, “Jarella, jaknang thranoh atloh relname?” Chuta anmah in “Amahta mathluve” ta ral ralla ongsei 15Cheva Pilat in miitamta anpelna turella, Barabbas ta mathlah a; Jisu ta maratnatu che mathlunatu anmahta amlanpei ei.
Raalmii in Jisu ta Aminuih
(Met 27:27–31; Jon 19:2–3)
16 #
Met 27:27–31; Luk 23:11; Jon 19:2–3 Cheva raalmii in amahta kurungkool asuunga anhoongpipei (mahchu, pretorian antih); che anmah in raalmii apumteta an ongpei. 17Amahta bukal amchu lungluut amisilh, che akanga kuling lukhum amikhum. 18Che amahta injah amithronpei, “Soot ringso, Judi ei kurung!” 19Che anmah in akanga sungah marat amithronpei, amaia amichil, ankhuk makamma amahta injah amimuh. 20Anmah in aminuihche, bukal amchu lungluutta anliimche amah ataksak lungluutta amisilhlapei, cheva amahta mathlunatu anphurhpei.
Jisu ta Amithlu
(Met 27:32–44; Luk 23:26–43; Jon 19:17–27)
21 #
Met 27:32; Luk 23:26; Rom 16:13 Che anmah in lamma antuukpi Sairini na Simon, ramboom nata akthleng, Alekjendar leh Ruphas anpata, namma thingkharh amiphurhpei. 22#Met 27:33–44; Luk 23:33–39; Jon 19:17–24Che anmah in Kolkotha ah amahta anthlengpipei (Mahchu arthava kangruh amun). 23Che anmah in tuiibuh leh amrimtui thao mairh mapoolla akuunga amilan; chuta amah in mahchu iinnohsa. 24Che amahta amithlupei, che anmah in rasi chaang anna veia amah puunreita tutu in chang umeta anromnatu ankaar a insemsei. 25Amahta amithlu laichun pung inthum tlasa. 26Che amahta janoh a majih a antaarva, “Judi ei Kurung” ta anpa. 27Che anmah in inrumii innih amahsoh inruuia amithlupei, inkhat in akchangtonga mahche khat in akveitonga. 28Ringjih in asonkha atlungnasa mahchuva, “Amahta alehchel ankaar a ateenpipei.” 29#Mak 13:2; 14:58; Jon 2:19Che amahta vanna akseh ei in akuunga manuih a, che ankang lek a anson, “Khasa! Nangin mathruunna thlaamta nikthritche nithumma kitlohtuta nisontamo, 30nikroua inkalrosa, che thingkharh nata trumrosa!” 31Cheva akthloi thiimpu leh ringjih lulok eiin khatleh khat in amahta manuih a anson, “Amah in aktleiva akalche; akrou avah inkal cheknohsa. 32Khrista, Israel va kurung, thingkharh nata ipektalla trumrosa, mahche kannihkho nakmuh a namlot tasung.”
Jisu in Thi
(Met 27:45–56; Luk 23:44–49; Jon 19:28–30)
33 #
Met 27:45–56; Luk 23:44–49; Jon 19:28–30 Che pung kuruk atlak lainata ram apumtea pungku phah inthimchetsa. 34Che pungku atlak in Jisu in ongsa, “Eloi, Eloi lama sabakhthani?” Mahchuva, “Kei Ringpu o, kei Ringpu o, jarella keita namthlah peiangme?” 35Mahchunna akseh akloon arouin mahchuta anthleih a anson, “Anve, amah in Elaijah ta aong,” 36Che mii inkhat in tlaanna putsia tuiibuh aphuumche, thing apaara khit a amah in a iinnatu amlan, che amah in ason, “Elaijah in athlengche amahta louva amthrumme anrei.” 37Che Jisu in tranga an ongche amah akphuk dongsa. 38#Hib 10:19–20Cheva mathruunna thlaamma anjaarpuun arelnata athlangphah innih suuk a inthrelsa. 39#Mak 1:11; 9:7Che amahsoh amaingat a akngir, raalmii reijapuui in amah akphuk dongchu amuh in ason, “Atak a, mahmii i Ringpu vaa Asa kupa reo!”
40 #
Luk 8:1–3; Jon 19:25 Mahchun kumei ei inkho inlabeb a anna amsei, anmah ankaar a Meri Makadalini leh Meri Jems anuleh anao Joses khatkho Solomi kho injaosei, 41amah in Kalili a amlai amahta anjuih, che rou antloh; mahche aktlei tam inkho Jerusalem a amahsoh inruuijoua thlengjousei.
Jisu ta Anphuum
(Met 27:57–61; Luk 23:50–56; Jon 19:38–42)
42 #
Met 27:57–61; Luk 23:50–56; Jon 19:38–42; Noon 13:29 Che khulouhram aphah in, mahchu sabatni athlengnoh maa a, inchaangna akni veisa, 43Arimathia Joseph, trongtloh ankaar a injahna vei, ataktal in Ringpu kurung huunnata jonna ak am in aril inthok hanga Pilat ninga sehsa, che amah in Jisu aruungta lohnatu anihpei. 44Che Pilat in thi sameta salungkhousa; che amah in raalmii reijapuuita, amah in athina sootsme ta aruipei. 45Che amah in raalmii reijapuui kuungnata aromche, amah aruungchu Joseph in alohnatu amjapei. 46Che amah in bulapuun aleiche, amahta thingkharh nata amthrumpei, bulapuun khanna atuumpei, lungpiita khurh a anseem rusuunna amahta amitolhpei; che rusuun akhaarta lunga amikhumpei. 47Meri Makadalini leh Joses anu Meri in ramma amitolhme ta anmuhpei.
ទើបបានជ្រើសរើសហើយ៖
MARK 15: TARAOBSI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.